ನಿಯಮದಂತೆ ಮನೆ ಕಟ್ಟಿ ಎಂದಿದ್ದಕ್ಕೆ ತಾಯಿ, ಮಗನ ಮೇಲೆ ಹಲ್ಲೆ

Team Udayavani, Mar 13, 2017, 12:07 PM IST

ಬೆಂಗಳೂರು/ಕೆ.ಆರ್‌ಪುರಂ: ಕೆ.ಆರ್‌.ಪುರಂನ ರಾಮಮೂರ್ತಿ ನಗರ ಪೊಲೀಸ್‌ ಠಾಣೆ ವ್ಯಾಪ್ತಿಯ ರಾಘವೇಂದ್ರ ಬಡಾವಣೆಯಲ್ಲಿ ಮನೆ ನಿರ್ಮಾಣ ವಿಚಾರದಲ್ಲಿ ನೆರೆ ಮನೆಯವರ ಮೇಲೆ ವ್ಯಕ್ತಿಯೊಬ್ಬರು ರೌಡಿಗಳ ಮೂಲಕ ಹಲ್ಲೆ ಮಾಡಿಸಿದ್ದಾರೆ. 

ಪಾಲಿಕೆ ನಿಯಮಗಳ ಪ್ರಕಾರ ಯಾವುದೇ ಆಸ್ತಿದಾರ ಮನೆ ನಿರ್ಮಿಸಬೇಕಾದರೆ ಸೆಟ್‌ಬ್ಯಾಕ್‌ ಜಾಗ ಎಂದು ಸುತ್ತಲೂ ಮೂರು ಅಡಿ ಬಿಟ್ಟು ಮನೆ ಕಟ್ಟಬೇಕು. ಪಾಲಿಕೆ ನಿಯಮಗಳ ಪ್ರಕಾರ ಮನೆ ನಿರ್ಮಿಸುಂತೆ ನೆರೆ ಮನೆಯವರು ಹೇಳಿದ ಕಾರಣಕ್ಕೆ ಆಕ್ರೋಶಗೊಂಡ ಪಕ್ಕದ ಆಸ್ತಿ ಮಾಲೀಕ ತಾಯಿ ಮಗನ ಮೇಲೆ ಹಲ್ಲೆ ಮಾಡಿಸಿದ್ದಾರೆ.

ಹಲ್ಲೆಯಿಂದ ರಾಘವೇಂದ್ರ ಬಡಾವಣೆಯ ರಾಜು ಮತ್ತು ಆತನ ತಾಯಿ ಲಕ್ಷ್ಮೀಬಾಯಿ ಗಾಯಗೊಂಡಿದ್ದು, ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದು ಬಿಡುಗಡೆಯಾಗಿದ್ದಾರೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಕೇರಳ ಮೂಲದ ದೇವಸ್ವಿ, ಜಾನ್‌ ಹಾಗೂ ಬಾಬು ಎಂಬುವರನ್ನು ಬಂಧಿಸಲಾಗಿದೆ ಎಂದು ಪೊಲೀಸರು ಹೇಳಿದ್ದಾರೆ.

ಐಐಟಿಯ ನಿವೃತ್ತ ಉದ್ಯೋಗಿಯಾಗಿರುವ ದೇವಸ್ವಿ, ರಾಘವೇಂದ್ರ ಬಡವಾಣೆಯಲ್ಲಿ ಮನೆ ನಿರ್ಮಾಣ ಕಾಮಗಾರಿ ಆರಂಭಿಸಿದ್ದಾರೆ. ಈ ಸಂದರ್ಭದಲ್ಲಿ ಸೆಟ್‌ಬ್ಯಾಕ್‌ ಜಾಗ ಬಿಟ್ಟಿಲ್ಲ ಎಂದು ಆಕ್ಷೇಪ ತೆಗೆದ ಪಕ್ಕದ ಮನೆಯ ರಾಜು ಎಂಬುವರು, ಬಿಬಿಎಂಪಿ ನಿಯಮಾವಳಿಯಂತೆ ಓಡಾಡಲು ಮೂರು ಅಡಿ ಸೆಟ್‌ಬ್ಯಾಕ್‌ ಜಾಗ ಬಿಟ್ಟು ಕಾಮಗಾರಿ ನಡೆಸುವಂತೆ ಸೂಚಿಸಿದ್ದರು.

ಇದೇ ವಿಚಾರದಲ್ಲಿ ರಾಜು ಮತ್ತು ದೇವಸ್ವಿ ನಡುವೆ ಜಗಳವಾಗಿದ್ದು, ಈ ಸಂದರ್ಭದಲ್ಲಿ ಸ್ಥಳೀಯರು ಮಧ್ಯಪ್ರವೇಶಿಸಿ ರಾಜಿ ಸಂಧಾನ ಮಾಡಿದ್ದಾರೆ. ಈ ಮಧ್ಯೆ, ದೇವಸ್ವಿ ಅವರು ಮನೆ ನಿರ್ಮಾಣದ ವೇಳೆ ಸೆಟ್‌ಬ್ಯಾಕ್‌ ಜಾಗ ಬಿಡದೆ ನಿಯಮ ಉಲ್ಲಂ ಸಿದ್ದಾರೆ ಎಂದು ಆರೋಪಿಸಿ ರಾಜು ಬಿಬಿಎಂಪಿ ಅಧಿಕಾರಿಗಳಿಗೆ ದೂರು ನೀಡಿದ್ದರು. ಅದರಂತೆ ಸೆಟ್‌ಬ್ಯಾಕ್‌ ಜಾಗ ಬಿಟ್ಟು ಮನೆ ನಿರ್ಮಿಸುವಂತೆ ಪಾಲಿಕೆಯೂ ಸೂಚಿಸಿತ್ತು.  

ಈ ನಡುವೆ ಶನಿವಾರ ಮಧ್ಯಾಹ್ನ 12 ಗಂಟೆ ಸುಮಾರಿಗೆ ಮನೆ ನಿರ್ಮಾಣ ಕಾಮಗ­ರಿಗಾಗಿ ದೇವಸ್ವಿ ಅವರು ಲಾರಿಯಲ್ಲಿ ಮರಳು ತರಿಸಿದ್ದರು. ಈ ವೇಳೆ ಮನೆ ಬಳಿ ಮರಳು ಲಾರಿ ಅಡ್ಡಗಟ್ಟಿದ ರಾಜು, ಮರಳು ಸುರಿಯದಂತೆ ಲಾರಿ ಚಾಲಕನನ್ನು ಬೆದರಿಸಿದ್ದ. ಅಷ್ಟರಲ್ಲಿ ಸ್ಥಳಕ್ಕೆ ಆಗಮಿಸಿದ ದೇವಸ್ವಿ ಹಾಗೂ ಆತನ ಸಹಚರರಾದ ಜಾನ್‌, ಬಾಬು ಅವರು, ರಾಜುವನ್ನು ಪ್ರಶ್ನಿಸಿದ್ದಾರೆ. ಈ ಸಂದರ್ಭದಲ್ಲಿ ರಾಜು ಹಾಗೂ ದೇವಸ್ವಿ ಜತೆಗಿದ್ದವರ ಮಧ್ಯೆ ಮಾತಿನ ಚಕಮಕಿ ನಡೆದಿದೆ.

ಆಕ್ರೋಶ­ಗೊಂಡ ದೇವಸ್ವಿ ಮತ್ತಿತರರು ರಾಜು ಮನೆಯ ಕಾಂಪೌಂಡ್‌ ಹಾರಿ ಆತನನ್ನು ಹಿಗ್ಗಾಮುಗ್ಗಾ ಥಳಿ­ಸಿದ್ದಾರೆ. ಮಗನ ರಕ್ಷಣೆಗೆ ಬಂದ ತಾಯಿ  ಲಕ್ಷ್ಮೀ­ಬಾಯಿ ಮೇಲೂ ಹಲ್ಲೆ ನಡೆಸಿದ್ದಾರೆ. ಈ ದೃಶ್ಯಾ ವಾಳಿಗಳನ್ನು ರಾಜು ಪುತ್ರಿ ಮೊಬೈಲ್‌ನಲ್ಲಿ  ಸೆರೆಹಿಡಿ­ದ್ದರು. ಈ ಸಂಬಂಧ ದೇವಸ್ವಿ ಹಾಗೂ ಆತನ ಬೆಂಬ­ಲಿಗರ ವಿರುದ್ಧ ರಾಜು ಹಲ್ಲೆ ಪ್ರಕರಣ ದಾಖಲಿಸಿದ್ದರು. 

ಹಲ್ಲೆಗೊಳಗಾಗಿದ್ದ ರಾಜು ನೀಡಿದ್ದ ದೂರನ್ನು ಆಧರಿಸಿ ಮತ್ತು ಮೊಬೈಲ್‌ ದೃಶ್ಯಾವಳಿಗಳನ್ನು ವೀಕ್ಷಿಸಿದ ಮೇಲೆ ಮೂವರು ಆರೋಪಿಗಳನ್ನು ವಶಕ್ಕೆ ಪಡೆದು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ. ಆರೋಪಿ ದೇವಸ್ವಿ ಅವರು ನಿಯಮ ಉಲ್ಲಂ ಸಿ ಮನೆ ನಿರ್ಮಾಣಕ್ಕೆ ಮುಂದಾಗಿರುವ ಬಗ್ಗೆ ಬಿಬಿಎಂಪಿ ಪರಿಶೀಲನೆ ನಡೆಸಿ ಕ್ರಮ  ಕೈಗೊಳ್ಳಬೇಕಿದೆ ಎಂದು ಹಿರಿಯ ಪೊಲೀಸ್‌ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.