Bangalore: ಹಣಕಾಸಿನ ವಿಚಾರಕ್ಕೆ ಮಾರಕಾಸ್ತ್ರಗಳಿಂದ ಹಲ್ಲೆ

Team Udayavani, Jan 29, 2024, 12:37 PM IST

ಬೆಂಗಳೂರು: ಹಣಕಾಸಿನ ವಿಚಾರಕ್ಕೆ ದೊಡ್ಡಪ್ಪನ ಮಗನೇ ಸಹೋದರನಿಗೆ ಮಾರಕಾಸ್ತ್ರಗಳಿಂದ ಹಲ್ಲೆ ನಡೆಸಿರುವ ಘಟನೆ ನಂದಿನಿ ಲೇಔಟ್‌ ಠಾಣೆ ವ್ಯಾಪ್ತಿಯಲ್ಲಿ ನಡೆದಿದೆ.

ಈ ಸಂಬಂಧ ಲಗ್ಗೆರೆ ನಿವಾಸಿ ಮಾರುತಿ ಎಂಬವರು ಅವರ ದೊಡ್ಡಪ್ಪನ ಮಗ ಕೆಂಚಪ್ಪ, ಈತನ ಸ್ನೇಹಿತರಾದ ತೇಜ, ನವೀನ್‌, ಕೆಂಪರಾಜು, ಮಯೂರು ಎಂಬವರು ವಿರುದ್ಧ ನೀಡಿದ ದೂರಿನ ಮೇರೆಗೆ ನಂದಿನಿಲೇಔಟ್‌ ಪೊಲೀಸರು ಎಫ್ಐಆರ್‌ ದಾಖಲಿಸಿದ್ದಾರೆ.

ಕ್ಯಾಬ್‌ ಚಾಲಕರಾಗಿರುವ ಮಾರುತಿ, 2023ರಲ್ಲಿ ತನ್ನ ದೊಡ್ಡಪ್ಪನ ಪುತ್ರ ಕೆಂಚಪ್ಪನಿಗೆ 25 ಸಾವಿರ ರೂ. ಸಾಲ ನೀಡಿದ್ದರು. ಆದರೆ, ಇದುವರೆಗೂ ಆತ ಹಣ ವಾಪಸ್‌ ನೀಡಿರಲಿಲ್ಲ. ಕೆಲ ದಿನಗಳಿಂದ ಹಣ ವಾಪಸ್‌ ನೀಡುವಂತೆ ಒತ್ತಾಯಿಸಿದ್ದಾರೆ. ಆಗ ಆರೋಪಿಗಳ ಪೈಕಿ ಕೆಂಚಪ್ಪ ಹಣ ಕೊಡುವುದಿಲ್ಲ ಏನಾದರೂ ಮಾಡಿಕೊ ಎಂದು ಬೆದರಿಕೆ ಹಾಕಿದ್ದಾನೆ. ಜ.25ರಂದು ರಾತ್ರಿ 11.45ಕ್ಕೆ ಮಾರುತಿ, ಲಗ್ಗೆರೆಯ ವಾಯುನಂದನ ಬಾರ್‌ ಬಳಿ ಹೋಗುವಾಗ ಕಾರಿನಲ್ಲಿ ಬಂದು ಅಡ್ಡಗಟ್ಟಿದ ಆರೋಪಿಗಳ ತಂಡ, ಮಾರುತಿ ಮೇಲೆ ಮಾರಕಾಸ್ತ್ರಗಳಿಂದ ಹಲ್ಲೆ ನಡೆಸಿ ಪರಾರಿಯಾಗಿದೆ.

ತೀವ್ರ ರಕ್ತಸ್ರಾವದಿಂದ ಗಾಯಗೊಂಡಿದ್ದ ಮಾರುತಿ ಸ್ಥಳೀಯರ ನೆರವಿನಿಂದ ಆಸ್ಪತ್ರೆಗೆ ದಾಖಲಾಗಿದ್ದರು. ಬಳಿಕ ಠಾಣೆಗೆ ಬಂದು ದೂರು ನೀಡಿದ್ದಾರೆ. ಆರೋಪಿಗಳ ಪತ್ತೆ ಕಾರ್ಯ ನಡೆಯುತ್ತಿದೆ ಎಂದು ಪೊಲೀಸರು ಹೇಳಿದರು.