ಚುನಾವಣಾ ಅಕ್ರಮಗಳ ವಿರುದ್ಧ “ಶೂನ್ಯ ಸೈರಣೆ’

Team Udayavani, Apr 27, 2018, 7:05 AM IST

ಬೆಂಗಳೂರು: ವಿಧಾನಸಭಾ ಚುನಾವಣೆ ಹಿನ್ನೆಲೆಯಲ್ಲಿ ಚುನಾವಣಾ ಅಕ್ರಮಗಳ ವಿರುದ್ಧ “ಶೂನ್ಯ ಸೈರಣೆ’ ಘೋಷಿಸಿರುವ ಕೇಂದ್ರ ಚುನಾವಣಾ ಆಯೋಗ ಚುನಾವಣಾ ವೆಚ್ಚದ ಮೇಲೆ ನಿಗಾ ಇಡಲು ಬಲಿಷ್ಠ ಜಾಲ ಹೆಣೆದಿದ್ದು, ಇದಕ್ಕಾಗಿ “ಭಾರತೀಯ ಕಂದಾಯ ಸೇವೆ’ಯ (ಐಆರ್‌ಎಸ್‌) ಅಧಿಕಾರಿಗಳ  ತಂಡವನ್ನು ಕರ್ನಾಟಕಕ್ಕೆ ರವಾನಿಸಿದೆ. 

ಈಗಾಗಲೇ ಉತ್ತರಪ್ರದೇಶ, ದಿಲ್ಲಿ, ಬಿಹಾರ, ರಾಜಸ್ಥಾನ, ಮಧ್ಯಪ್ರದೇಶ, ಪಶ್ಚಿಮ ಬಂಗಾಳ ಸೇರಿ ನೆರೆಯ ರಾಜ್ಯಗಳಾದ ಮಹಾ ರಾಷ್ಟ್ರ, ತಮಿಳುನಾಡು, ಆಂಧ್ರ,  ಕೇರಳದ ಸುಮಾರು 136 ಐಆರ್‌ಎಸ್‌ ಅಧಿಕಾರಿಗಳನ್ನು ಕರ್ನಾಟಕದ ಚುನಾವಣಾ ವೆಚ್ಚ ವೀಕ್ಷಕರನ್ನಾಗಿ ನೇಮಕ ಮಾಡಲಾಗಿದ್ದು, ಪ್ರತಿ 2 ಕ್ಷೇತ್ರಕ್ಕೆ ಒಬ್ಬ ಅಧಿಕಾರಿಯನ್ನು ನಿಯೋಜಿಸಲಾಗಿದೆ. ಇವರಿಗೆ ಆದಾಯ ತೆರಿಗೆ, ವಾಣಿಜ್ಯ ತೆರಿಗೆ, ಅಬಕಾರಿ, ಕಂದಾಯ, ಪೊಲೀಸ್‌ ಇಲಾಖೆಯ ಅಧಿಕಾರಿಗಳ ತಂಡ ಸಾಥ್‌ ನೀಡುತ್ತಿದೆ. 

ಇಡೀ ಆಡಳಿತ ಯಂತ್ರವನ್ನು ತನ್ನ ವಶಕ್ಕೆ ಪಡೆದು ಕೊಂಡಿರುವ ಆಯೋಗ, ಅದನ್ನು ಮುಖ್ಯ ಚುನಾವಣಾಧಿ ಕಾರಿಗಳ ಮೂಲಕ ನಿರ್ವಹಿಸುತ್ತಿದೆ. ಚುನಾವಣಾ ವೆಚ್ಚ ಸೇರಿ ಅಕ್ರಮ ಹಣ ವರ್ಗಾವಣೆ, ಹಂಚಿಕೆ, ಮತದಾರರಿಗೆ ಆಮಿಷವೊಡ್ಡಲು ಹಣ ಮತ್ತು ಹೆಂಡ ಹಂಚುವುದು, ಗಿಫ್ಟ್ ಗಳನ್ನು ವಿತರಣೆ ಮಾಡುವುದಕ್ಕೆ ಕಡಿವಾಣ ಹಾಕಲು ಜಿಲ್ಲಾ ಚುನಾವಣಾಧಿಕಾರಿಗಳ ನೇತೃತ್ವದಲ್ಲಿ “ಚುನಾ ವಣಾ ವೆಚ್ಚ ನಿಗಾ ಸಮಿತಿ’ ರಚಿಸಲಾಗಿದೆ. ಇದರ ಜತೆಗೆ ಹೆಚ್ಚುವರಿಯಾಗಿ 136 ಐಆರ್‌ಎಸ್‌ ಅಧಿಕಾರಿಗಳನ್ನು ಕೇಂದ್ರ ಚುನಾವಣಾ ಆಯೋ ಗದಿಂದ ವಿಶೇಷವಾಗಿ ನೇಮಿಸಲಾ ಗಿದೆ. ಇದಲ್ಲದೇ ಚುನಾ ವಣಾ ಪ್ರಕ್ರಿಯೆ ಸುಸೂತ್ರವಾಗಿ ನಡೆಯಲು  ಏ.24ರಿಂದ ಉತ್ತರ ಭಾರತ ರಾಜ್ಯಗಳ 154 ಐಎಎಸ್‌ ಅಧಿಕಾರಿಗಳನ್ನು ಸಾಮಾನ್ಯ ವೀಕ್ಷಕರು, 35 ಐಪಿಎಸ್‌ ಅಧಿಕಾರಿಗಳನ್ನು ಪೊಲೀಸ್‌ ವೀಕ್ಷಕಕರನ್ನಾಗಿ ನಿಯೋಜಿಸಲಾಗಿದೆ.
 
ಆದಾಯ ತೆರಿಗೆ ಅಧಿಕಾರಿಗಳನ್ನೂ ನಿಗಾ ಇಡಲು ನಿಯೋಜಿಸಲಾಗಿದೆ. ಹಣ, ಹೆಂಡದ ಚಲಾವಣೆ, ಆಮಿಷಗಳ ಮೇಲೆ ನಿಗಾಯಿಡಲು ಒಂದು ವಿಧಾನಸಭಾ ಕ್ಷೇತ್ರಕ್ಕೆ 6ರಂತೆ ಒಟ್ಟು 1,344 ಫ್ಲಯಿಂಗ್‌ ಸ್ಕ್ವಾಡ್‌, 1,255 ಸ್ಟಾಟಿಕ್‌ ಸರ್ವ ಲೆನ್ಸ್‌ ತಂಡಗಳು ಕಾರ್ಯಾ ಚರಣೆಯಲ್ಲಿವೆ. ಫ್ಲಯಿಂಗ್‌ ಸ್ಕ್ವಾಡ್‌ ವಾಹನಗಳ ಸಂಚಾರ ಮೇಲೆ ನಿಗಾ ಇಡಲು ಅವುಗ ಳಿಗೆ ಜಿಪಿಎಸ್‌ ಅಳವಡಿಸಲಾಗಿದೆ. ಬ್ಯಾಂಕುಗಳ ಅನುಮಾನಾ ಸ್ಪದ ವಹಿವಾಟುಗಳ ಮೇಲೂ ಆಯೋಗ ಕಣ್ಣಿಟ್ಟಿದೆ.

ಏರ್‌ಇಂಟಲಿಜೆನ್ಸ್‌ ಯುನಿಟ್‌
ಆದಾಯ ತೆರಿಗೆ ಇಲಾಖೆಯಿಂದ ಬೆಂಗಳೂರು, ಬೆಳಗಾವಿ, ಮಂಗಳೂರು, ಹುಬ್ಬಳ್ಳಿ, ಬಳ್ಳಾರಿ ವಿಮಾನ ನಿಲ್ದಾಣಗಳಲ್ಲಿ “ಏರ್‌ ಇಂಟಲಿಜೆನ್ಸ್‌ ಯುನಿಟ್‌’ಗಳನ್ನು ಸ್ಥಾಪಿಸಲಾಗಿದೆ. ಹಣ ವರ್ಗಾವಣೆ ಬಗ್ಗೆ ನಿಗಾ ಇಡಲು ಪ್ರಮುಖ ರೈಲು ನಿಲ್ದಾಣಗಳಲ್ಲಿ “ರೈಲ್ವೆ ಭದ್ರತಾ ಪಡೆ’ಯ ತಂಡಗಳು ಕಾರ್ಯಾಚರಿಸುತ್ತಿವೆ.

41 ಕೋಟಿ ವಶ
ಮಾ.27ರಿಂದ ಇಲ್ಲಿಯ ತನಕ ಚುನಾವಣಾ ನೀತಿ ಸಂಹಿತೆ ಜಾರಿ ತಂಡಗಳು ಕಾರ್ಯಾಚರಣೆ ನಡೆಸಿ ಒಟ್ಟು 41 ಕೋಟಿ ರೂ. ನಗದು ವಶಪಡಿಸಿಕೊಂಡಿವೆ. 20 ಕೋಟಿ ರೂ. ಮೌಲ್ಯದ ಮದ್ಯ ಮತ್ತು 20 ಕೋಟಿ ರೂ. ಮೊತ್ತದ ಗೃಹಬಳಕೆ ವಸ್ತುಗಳು, 3.71 ಕೋಟಿ ರೂ. ಮೊತ್ತದ 14 ಕೆ.ಜಿ. ಚಿನ್ನ-ಬೆಳ್ಳಿ, 66 ಕೆ.ಜಿ. ಮಾದಕ ಪದಾರ್ಥಗಳನ್ನು ವಶಪಡಿಸಿಕೊಳ್ಳಲಾಗಿದೆ. 

ರಾಜ್ಯದಲ್ಲಿ 2,400ಕ್ಕೂ ಹೆಚ್ಚು ಫ್ಲಾಯಿಂಗ್‌ ಸ್ಕ್ವಾಡ್ಸ್‌ ಮತ್ತು ಸ್ಟಾಟಿಕ್‌ ಸರ್ವಲೆನ್ಸ್‌ ಟೀಂಗಳು ನೀತಿ ಸಂಹಿತೆ ಜಾರಿಯ ಜತೆಗೆ ಚುನಾವಣಾ ವೆಚ್ಚದ ಮೇಲೂ ನಿಗಾ ಇಡುತ್ತಿವೆ. ಇದಲ್ಲದೆ, 1,095 ವಿಡಿಯೋ ಸರ್ವಲೆನ್ಸ್‌, ವಿಡಿಯೋ ವೀವಿಂಗ್‌, ಅಕೌಂಟಿಂಗ್‌ ತಂಡಗಳನ್ನು ರಚಿಸಲಾಗಿದ್ದು, ಈ ತಂಡಗಳು ಚುನಾವಣಾ ವೆಚ್ಚದ ಮೇಲೆ ನಿಗಾ ಇಡಲಿವೆ.
– ಡಾ. ಕೆ.ಜಿ. ಜಗದೀಶ್‌, ಅಪರ ಮುಖ್ಯ ಚುನಾವಣಾಧಿಕಾರಿ (ಚುನಾವಣ ವೆಚ್ಚ)

– ರಫೀಕ್‌ ಅಹ್ಮದ್‌