ಸೈಟ್‌ ಅಳತೆಯ ಜಾಗದಲ್ಲಿ ಕೃಷಿ 30ಸಾವಿರ ಗಳಿಕೆ

Team Udayavani, Mar 22, 2018, 12:23 PM IST

ಬೆಂಗಳೂರು: ಕೃಷಿ ತೊರೆದು ಯುವಕರು ಹಳ್ಳಿಗಳಿಂದ ನಗರದ ಕಡೆಗೆ ಮುಖಮಾಡುತ್ತಿರುವ ಪ್ರಸ್ತುತ ಸಂದರ್ಭದಲ್ಲಿ ಮಹಿಳೆಯೊಬ್ಬರು ಬೆಂಗಳೂರಿನಂತಹ ಮಹಾನಗರದಲ್ಲಿ ಕೇವಲ 30×40 ಅಡಿ ನಿವೇಶನದಲ್ಲಿ ಬೇಸಾಯ ಮಾಡಿ, ಪ್ರತಿ ತಿಂಗಳು 30ಸಾವಿರ ರೂ. ಆದಾಯ ಗಳಿಸುತ್ತಿದ್ದಾರೆ!

ಹೆಸರಘಟ್ಟದ ನಿವಾಸಿ ಕಮಲಾ ನರಸೀಪುರ 20 ವರ್ಷಗಳಿಂದ ಕೆಲಸ ಮಾಡುತ್ತಿದ್ದ ಗಾರ್ಮೆಂಟ್‌ ಉದ್ಯೋಗ ತೊರೆದು, ಈಗ ಅಣಬೆ ಬೇಸಾಯದಲ್ಲಿ ತೊಡಗಿದ್ದಾರೆ. ಇದರ ಪ್ರತಿಫ‌ಲವಾಗಿ ನಿತ್ಯ 10ರಿಂದ 15 ಕೆಜಿ ಅಣಬೆ ಉತ್ಪಾದಿಸಿ, ತಿಂಗಳಿಗೆ 30ಸಾವಿರ ರೂ. ಎಣಿಸುತ್ತಿದ್ದಾರೆ. 

ಸ್ವಾವಲಂಬಿ ಗುರಿ: ಪ್ರಸ್ತುತ ಹೆಸರಘಟ್ಟ ಆಸುಪಾಸು ನಾಲ್ಕಾರು ಗ್ರಾಹಕರಿಗೆ ಅಣಬೆ ಪೂರೈಸುತ್ತಿರುವ ಕಮಲಾ, ಅಣಬೆ ಆಕರ್ಷಕವಾಗಿ ಪ್ಯಾಕ್‌ ಮಾಡಿ, ತಮ್ಮದೇ ಆದ ಬ್ರ್ಯಾಂಡ್‌ ಕೊಟ್ಟು ನಗರದ ದೊಡ್ಡ ಮಾಲ್‌ಗ‌ಳಿಗೆ ಪೂರೈಸಲೂ ಚಿಂತಿಸಿದ್ದಾರೆ. ಅಷ್ಟೇ ಅಲ್ಲ, ಕೊಡಗಿನಲ್ಲಿ ಅಣಬೆ ಖಾದ್ಯಗಳನ್ನು ತಯಾರಿಸುವ ವಿಶೇಷ ಹೋಟೆಲ್‌ವೊಂದನ್ನು ತೆರೆಯುವ ಗುರಿ ಹೊಂದಿದ್ದಾರೆ.

ಈ ಮೂಲಕ ಸ್ವಾವಲಂಬಿ ಜೀವನದ ಗುರಿ ಹೊಂದಿದ್ದಾರೆ. 40 ವರ್ಷದ ಕಮಲಾ ಓದಿದ್ದು ಪಿಯುಸಿ. 20 ವರ್ಷ ಗಾರ್ಮೆಂಟ್‌ ಕಾರ್ಖಾನೆ ಕೆಲಸ ಮಾಡಿ, ಈಗ ಕೃಷಿಯತ್ತ ಮುಖಮಾಡಿದ್ದಾರೆ. ಕಾರ್ಖಾನೆಯಲ್ಲಿ 8-10 ತಾಸು ದುಡಿಯಬೇಕಿತ್ತು. ಇಲ್ಲಿಯೂ ಅಷ್ಟೇ ಹೊತ್ತು ಶ್ರಮ ಹಾಕುತ್ತಿದ್ದೇನೆ ಎನ್ನುತ್ತಾರೆ.

ಒಣಗಿಸಿದರೂ ಅನುಕೂಲ: ಅಣಬೆ ಕೆಜಿಗೆ 140ರಿಂದ 150 ರೂ.ಗೆ ಮಾರಾಟ ಆಗುತ್ತದೆ. ಇದರಲ್ಲಿ ಅರ್ಧದಷ್ಟು ಬೀಜ, ಹುಲ್ಲು ಸೇರಿದಂತೆ ಮತ್ತಿತರ ಖರ್ಚು ಆಗುತ್ತದೆ. ಒಂದು ವೇಳೆ ಅಣಬೆ ಮಾರಾಟವಾಗದೆ ಉಳಿದರೆ, ಅದನ್ನು ಒಣಗಿಸಿ, ರಸಂ ಮತ್ತು ಚಟ್ನಿಪುಡಿ ಮಾಡುವ ಸಂಬಂಧ ತರಬೇತಿ ಪಡೆದಿದ್ದು, ಅದನ್ನೂ ಮಾರುಕಟ್ಟೆಗೆ ಬಿಡುಗಡೆ ಮಾಡುತ್ತಿದ್ದೇನೆ ಎಂದರು.

ನಿವೇಶನದಲ್ಲಿ ಶೆಡ್‌ ಮತ್ತಿತರ ಸೌಲಭ್ಯಕ್ಕಾಗಿ 7ರಿಂದ 8 ಲಕ್ಷ ರೂ. ಹೂಡಿಕೆ ಮಾಡಲಾಗಿದೆ. ನನ್ನ ಈ ಕೆಲಸಕ್ಕೆ ಮಕ್ಕಳು ಮತ್ತು ಪತಿ ಕೂಡ ಕೈಜೋಡಿಸುತ್ತಾರೆ. ಅಂದಹಾಗೆ ಪತಿ ಗಾರ್ಮೆಂಟ್‌ ಕಾರ್ಖಾನೆಯೊಂದರಲ್ಲಿ ಕೆಲಸ ಮಾಡುತ್ತಿದ್ದಾರೆ. ಸರ್ಕಾರದ ಸಹಕಾರ ದೊರೆತರೆ ಅನುಕೂಲ ಎಂದು ಹೇಳಿದರು.

ರಾಷ್ಟ್ರೀಯ ಮೇಳದಲ್ಲಿ ಗೌರವ: ಗಾರ್ಮೆಂಟ್‌ ಕಾರ್ಖಾನೆಗಳಲ್ಲಿನ ದೌರ್ಜನ್ಯದಿಂದ ಸಿಡಿದೆದ್ದ ಮಹಿಳೆಯರು ನಗರದಲ್ಲಿ ಬೀದಿಗಿಳಿದು ವರ್ಷಗಳ ಹಿಂದೆ ಪ್ರತಿಭಟನೆ ಮಾಡಿದ್ದರು. ಹೀಗೆ ಸಮಸ್ಯೆ ಎದುರಿಸುತ್ತಿರುವ ಮಹಿಳೆಯರಿಗೆ ಕಮಲಾ ಮಾದರಿ ಆಗಿದ್ದಾರೆ. ನಗರದಲ್ಲಿ ಇತರೆ ಕೆಲ ಮಹಿಳೆಯರಿಗೆ ಅಣಬೆ ಬೇಸಾಯದ ಬಗ್ಗೆ ತಿಳಿಸಿಕೊಟ್ಟಿದ್ದೇನೆ. ಇದರಿಂದ ಹಲವರು ಆಸಕ್ತಿ ತೋರಿಸಿದ್ದಾರೆ ಎಂದೂ ಅವರು ತಿಳಿಸಿದರು.

ಭಾರತೀಯ ತೋಟಗಾರಿಕಾ ಸಂಶೋಧನಾ ಸಂಸ್ಥೆ (ಐಐಎಚ್‌ಅರ್‌)ಯು ಹಮ್ಮಿಕೊಂಡ ರಾಷ್ಟ್ರೀಯ ತೋಟಗಾರಿಕೆ ಮೇಳದಲ್ಲಿ ಕಮಲಾ ಅವರ ಈ ಸ್ವಾವಲಂಬಿ ಬದುಕನ್ನು ಗುರುತಿಸಿ ಗೌರವಿಸಲಾಯಿತು. ಅಣಬೆ ಬೇಸಾಯ ಕುರಿತು ಮಾಹಿತಿಗೆ ಕಮಲಾ (ಮೊ: 78296 33450) ಅವರನ್ನು ಸಂಪರ್ಕಿಸಬಹುದು.

2 ವರ್ಷದ ಹಿಂದೆ ಕೆಲಸಕ್ಕೆ ಗುಡ್‌ಬೈ: “ಗಾರ್ಮೆಂಟ್‌ ಫ್ಯಾಕ್ಟರಿಯಲ್ಲಿ 20 ವರ್ಷ ಕೆಲಸ ಮಾಡಿದ ನನಗೆ ಜೈಲಿನಲ್ಲಿ ಇದ್ದಂತೆ ಭಾಸವಾಗುತ್ತಿತ್ತು. ಎರಡು ವರ್ಷಗಳ ಹಿಂದೆ ಈ ಕೆಲಸಕ್ಕೆ ಗುಡ್‌ಬೈ ಹೇಳಿದೆ. ಅಲ್ಲಿ ಕೇವಲ 8-10 ಸಾವಿರ ರೂ.ಗೆ ಬೆಳಗ್ಗೆಯಿಂದ ಸಂಜೆವರೆಗೂ ದುಡಿಯಬೇಕು.

ಕೆಲಸದಲ್ಲಿದ್ದಾಗ ಮೂತ್ರವಿಸರ್ಜನೆಗೆ ಹೋಗುವುದೂ ಕಷ್ಟ. ಅಂತಹ ಒತ್ತಡ ಬದುಕು ಬೇಡವಾಯಿತು. ನಂತರ ಹೆಸರಘಟ್ಟದಲ್ಲೇ ಸ್ವಂತ ನಿವೇಶನ ಇತ್ತು. ಖಾಲಿ ಜಾಗದಲ್ಲೇ ಅಣಬೆ ಬೇಸಾಯ ಶುರು ಮಾಡಿದೆ. ಪರಿಣಾಮ ಮಾಸಿಕ 30ಸಾವಿರ ರೂ. ಆದಾಯ ಬರುತ್ತಿದೆ’ ಎಂದು ಹರ್ಷ ವ್ಯಕ್ತಪಡಿಸಿದರು.

* ವಿಜಯಕುಮಾರ್‌ ಚಂದರಗಿ