Bengaluru: ಬೆಕ್ಕಿನ ಮೇಲೆ ಹಲ್ಲೆ: ರೂಮ್‌ಮೇಟ್‌ ವಿರುದ್ದ ಕೇಸ್‌

Team Udayavani, Dec 2, 2024, 12:46 PM IST

ಬೆಂಗಳೂರು: ಬೆಕ್ಕಿನ ಮೇಲೆ ಹಲ್ಲೆ ನಡೆಸಿದ ಆರೋಪದ ಮೇಲೆ ರೂಮ್‌ಮೇಟ್‌ ವಿರುದ್ಧ ಯುವಕನೊಬ್ಬ ಮೈಕೋ ಲೇಔಟ್‌ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾನೆ.

ಮೈಕೋ ಲೇಔಟ್‌ನ ಬಿಟಿಎಂ 2ನೇ ಹಂತದ ನಿವಾಸಿ ಮೊಹಮ್ಮದ್‌ ಅಫ್ತಾಬ್‌ ಎಂಬಾತ ನೀಡಿದ ದೂರಿನನ್ವಯ ಆತನ ರೂಮ್‌ಮೇಟ್‌ ಮನೀಶ್‌ ರತ್ನಾಕರ್‌ ಎಂಬಾತನ ವಿರುದ್ಧ ಕೇಸ್‌ ದಾಖಲಾಗಿದೆ.

ದೂರುದಾರ ಮೊಹಮ್ಮದ್‌ ಅಫ್ತಾಬ್‌ ಹಾಗೂ ಆರೋಪಿ ಮನೀಶ್‌ ರತ್ನಾಕರ್‌ ಬಿಟಿಎಂ ಲೇಔಟ್‌ 2ನೇ ಹಂತದಲ್ಲಿ ಒಂದೇ ಮನೆಯಲ್ಲಿ ವಾಸವಿದ್ದರು.

ನ.26ರಂದು ಮನೀಶ್‌ ರತ್ನಾಕರ್‌ ಮನೆಯಲ್ಲಿದ್ದಾಗ ಬೆಕ್ಕು ಮನೆಯಲ್ಲಿ ಮೂತ್ರ ವಿಸರ್ಜನೆ ಮಾಡಿದೆ. ಅದರಿಂದ ಕೋಪಗೊಂಡ ಮನೀಶ್‌, ಬೆಕ್ಕಿಗೆ ಕಾಲಿನಿಂದ ಒದ್ದು ಗಾಯಗೊಳಿಸಿದ್ದಾನೆ. ಬಳಿಕ ಮೊಹಮ್ಮದ್‌ ಅಫ್ತಾಬ್‌ಗ ಕರೆ ಮಾಡಿ, “ನಿನ್ನ ಬೆಕ್ಕು ಮನೆಯಲ್ಲಿ ಗಲೀಜು ಮಾಡಿದೆ, ಅದನ್ನು ಹೊರಗೆಸೆದು ಬಾ’ ಎಂದಿದ್ದಾನೆ. ಮೊಹಮ್ಮದ್‌ ಅಫ್ತಾಬ್‌ ಮನೆಗೆ ಬಂದು ನೋಡಿದಾಗ ಮನೆಯ ಟೆರೇಸ್‌ ಮೇಲಿನ ಬಕೆಟ್‌ನಲ್ಲಿ ಬೆಕ್ಕು ಬಿದ್ದಿರುವುದು ಗಮನಕ್ಕೆ ಬಂದಿದೆ. ತಕ್ಷಣ ಅದನ್ನು ಆಸ್ಪತ್ರೆಗೆ ಕರೆದೊಯ್ದು ಚಿಕಿತ್ಸೆ ಕೊಡಿಸಿದ್ದಾರೆ. “ಮದ್ಯಪಾನ ಮಾಡಿದ ಬಳಿಕ ಬೆಕ್ಕಿನ ಮರಿ ಕಂಡರೆ ಮನೀಶ್‌ ಆಗುತ್ತಿರಲಿಲ್ಲ. ನನ್ನ ಬೆಕ್ಕು ಸಹ ಆತನ ಸುತ್ತ ಸುಳಿಯುತ್ತಿರಲಿಲ್ಲ. ನಾನು ಬರುವವರೆಗೂ ರೂಮ್‌ ನಲ್ಲಿ ಅಡಗಿರುತ್ತಿತ್ತು. ಚಳಿ ಇದ್ದುದರಿಂದ ಹೊರಗೆ ಹೋಗಲಾರದೆ ಬೆಕ್ಕು ಮನೆಯಲ್ಲಿ ಮೂತ್ರ ವಿಸರ್ಜನೆ ಮಾಡಿದೆ. ಅಷ್ಟಕ್ಕೆ ನನ್ನ ಬೆಕ್ಕಿನ ಮೇಲೆ ಮೃಗೀಯವಾಗಿ ಹಲ್ಲೆ ಮಾಡಿದ್ದಾನೆ’ ಎಂದು ಸಾಮಾಜಿಕ ಜಾಲತಾಣದಲ್ಲಿ ಮೊಹಮ್ಮದ್‌ ಅಫ್ತಾಬ್‌ ತಿಳಿಸಿದ್ದಾರೆ.