Bengaluru: ಬಸ್‌ ಚಾಲಕನ ಮೇಲೆ ಹಲ್ಲೆಗೆ ಯತ್ನ; ಮೆಕ್ಯಾನಿಕ್‌ ಬಂಧನ

Team Udayavani, Nov 13, 2024, 11:56 AM IST

ಬೆಂಗಳೂರು: ಬೈಕ್‌ಗೆ ಬಸ್‌ ತಗುಲಿದಕ್ಕೆ ಬಿಎಂಟಿಸಿ ಬಸ್‌ ಚಾಲಕನ ಮೇಲೆ ಹಲ್ಲೆಗೆ ಮುಂದಾಗಿದಲ್ಲದೆ, ಬಸ್‌ನ ಗಾಜು ಧ್ವಂಸಗೊಳಿಸಿದ ಮ್ಯಾಕಾನಿಕ್‌ನನ್ನು ಎಸ್‌. ಜೆ.ಪಾರ್ಕ್‌ ಪೊಲೀಸರು ಬಂಧಿಸಿದ್ದಾರೆ.

ಕಲಾಸಿಪಾಳ್ಯ ನಿವಾಸಿ ಮುಜಾಹಿದ್‌(34) ಬಂಧಿತ. ಆರೋಪಿ ಕಲಾಸಿಪಾಳ್ಯದಲ್ಲಿ ಮ್ಯಾಕಾನಿಕ್‌ ಆಗಿದ್ದಾನೆ. ಮಂಗಳವಾರ ಮಧ್ಯಾಹ್ನ 3 ಗಂಟೆ ಸುಮಾರಿಗೆ ಕಾರ್ಪೋರೆಷನ್‌ ಕಡೆಯಿಂದ ಪುರಭವನ ಕಡೆ ಬೈಕ್‌ನಲ್ಲಿ ಮುಜಾಹಿದ್‌ ಹೋಗುತ್ತಿದ್ದ. ಅದೇ ಮಾರ್ಗದಲ್ಲಿ ಬರುತ್ತಿದ್ದ ಬಿಎಂಟಿಸಿ ಬಸ್‌ ಮುಜಾಹಿದ್‌ ತಗುಲಿದೆ ಎಂದು ಹೇಳಲಾಗಿದೆ. ಅದಕ್ಕೆ ಕೋಪಗೊಂಡ ಮುಜಾಹಿದ್‌, ಬಸ್‌ ಚಾಲಕನಿಗೆ ಕೈ ತೋರಿಸಿ ನಿಂದಿಸಿದ್ದಾನೆ. ಅದಕ್ಕೆ ಪ್ರತಿಯಾಗಿ ಬಸ್‌ ಚಾಲಕ ಕೂಡ ನಿಂದಿಸಿದ್ದಾನೆ. ಅದರಿಂದ ಕೋಪಗೊಂಡ ಮುಜಾಹಿದ್‌, ಕಾರ್ಪೋರೆಷನ್‌ ಜಂಕ್ಷನ್‌ ಬಳಿ ಬಸ್‌ ಅಡ್ಡಗಟ್ಟಿ ಸುತ್ತಿಗೆಯಿಂದ ಬಸ್‌ನ ಮುಂಭಾಗದ ಗಾಜಿಗೆ ಒಡೆದು ಧ್ವಂಸಗೊಳಿಸಿದ್ದಾನೆ. ಗಾಂಜಿನ ಚೂರುಗಳು ಚಾಲಕನಿಗೂ ಸಿಡಿದು ಗಾಯವಾಗಿದೆ. ಆಗ ಬಸ್‌ನಲ್ಲಿದ್ದ ಪ್ರಯಾಣಿಕರು ಮತ್ತು ಬಸ್‌ ನಿರ್ವಾಹಕರ ಹಾಗೂ ಸಾರ್ವಜನಿಕರು ಮುಜಾಹಿದ್‌ನನ್ನು ಹಿಡಿದುಕೊಂಡು ಹಿಗ್ಗಾಮುಗ್ಗಾ ಥಳಿಸಿದ್ದಾರೆ. ವಿಷಯ ತಿಳಿದು ಸ್ಥಳಕ್ಕೆ ದೌಡಾಯಿಸಿದ ಪೊಲೀಸರಿಗೆ ಆರೋಪಿಯನ್ನು ಒಪ್ಪಿಸಿದ್ದಾರೆ.

ಬಿಎಂಟಿಸಿ ಚಾಲಕನ ಮೇಲೆ ಹಲ್ಲೆಗೆ ಯತ್ನ: ಮತ್ತೂಂದು ಪ್ರಕರಣದಲ್ಲಿ ಬನಶಂಕರಿ ಬಸ್‌ ನಿಲ್ದಾಣದ ಬಳಿ ಕ್ಷುಲ್ಲಕ ಕಾರಣಕ್ಕೆ ಆಟೋ ಚಾಲಕನೊಬ್ಬ ಜಾಕ್‌ ರಾಡ್‌ನಿಂದ ಬಿಎಂಟಿಸಿ ಬಸ್‌ ಚಾಲಕನ ಮೇಲೆ ಹಲ್ಲೆಗೆ ಯತ್ನಿಸಿರುವ ಘಟನೆ ಮಂಗಳವಾರ ನಡೆದಿದೆ. ‌

ಬಸ್‌ ಚಲಿಸುವಾಗ ಆಟೋ ಚಾಲಕ ಅಡ್ಡ ಬಂದಿದ್ದಾನೆ. ಅದರಿಂದ ಕೋಪಗೊಂಡ ಬಸ್‌ ಚಾಲಕ ಪ್ರಶ್ನಿಸಿ ನಿಂದಿಸಿದ್ದಾನೆ. ಅದರಿಂದ ರೊಚ್ಚಿಗೆದ್ದ ಆಟೋ ಚಾಲಕ ಜಾಕ್‌ ರಾಡ್‌ ನಿಂದ ಬಲ್‌ ಗಾಜು ಒಡೆಯಲು ಮುಂದಾಗಿದ್ದಾನೆ. ಚಾಲಕನ ಮೇಲೆ ಹಲ್ಲೆಗೂ ಯತ್ನಿಸಿದ್ದಾನೆ. ಅಷ್ಟರಲ್ಲಿ ಪ್ರಯಾಣಿಕರು ಆತನನ್ನು ಹಿಡಿದುಕೊಂಡಿದ್ದಾರೆ. ಬಳಿಕ ರಾಜೀಸಂದಾನ ಮಾಡಿಕೊಂಡು ಸ್ಥಳದಿಂದ ತೆರಳಿದ್ದಾನೆ.