ಬಾಲ ಶತಾವಧಾನ ಕಾರ್ಯಕ್ರಮ ಡಿ.2ರಂದು

Team Udayavani, Nov 24, 2018, 11:39 AM IST

ಬೆಂಗಳೂರು: ರಾಜಾಜಿನಗರದ ಶ್ರೀನಾಕೋಡಾ ಪಾರ್ಶ್ವನಾಥ ಜೈನ್‌ ಶ್ವೇತಂಬರ ಮಂದಿರ ಟ್ರಸ್ಟ್‌ ಹಾಗೂ ಮೆಡಿಟೇಷನ್‌ ರಿಸರ್ಚ್‌ ಪ್ರತಿಷ್ಠಾನದ ವತಿಯಿಂದ ಡಿ.2ರಂದು ಅವಳಿ ಬಾಲಮುನಿಗಳಾದ ನಮಿಚಂದ್ರಸಾಗರ್‌ ಮತ್ತು ನೇಮಿಚಂದ್ರಸಾಗರ್‌ ಅವರಿಂದ ಬಾಲ ಶತಾವಧಾನ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿದೆ.

ಅರಮನೆ ಮೈದಾನದಲ್ಲಿ ಬೆಳಗ್ಗೆ 9 ಗಂಟೆಗೆ ನಡೆಯುವ ಕಾರ್ಯಕ್ರಮದಲ್ಲಿ ಅವಳಿ ಬಾಲಮುನಿಗಳ ಸ್ಮರಣಾಶಕ್ತಿಯ ಪವಾಡ ನೋಡಬಹುದು. ಗಣಿತದ ಕಗ್ಗಂಟು, ಜೈನ ಆಗಮ ಗ್ರಂಥದ ಪಠ್ಯ, ಖುರಾನ್‌ ಆಯಾತ್‌, ಬೈಬಲ್‌ ಅಧ್ಯಾಯಗಳ ಬಗ್ಗೆ ಕೇಳಲಾಗುವ ಪ್ರಶ್ನೆಗಳಿಗೆ ಬಾಲ ಮುನಿಗಳು ಉತ್ತರ ನೀಡಲಿದ್ದಾರೆ ಎಂದು ಮೆಡಿಟೇಷನ್‌ ರಿಸರ್ಚ್‌ ಪ್ರತಿಷ್ಠಾನದ ಸದಸ್ಯ ಕಮಲ್‌ ಜೈನ್‌ ಶುಕ್ರವಾರ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.

ಗುಜರಾತಿನ ಸೂರತ್‌ ನಗರದ ಪಿಯೂಷ್‌ಭಾಯ್‌, ಸೋನಲ್‌ಬೆನ್‌ ದಂಪತಿಯ ಅವಳಿ ಮಕ್ಕಳಾಗಿರುವ ಇವರು, 9ನೇ ವಯಸ್ಸಿನಲ್ಲೇ ಸನ್ಯಾಸ ಸ್ವೀಕರಿಸಿದ್ದು, ಈಗಾಗಲೇ 5 ಸಾವಿರ ಕಿ.ಮೀ. ದೂರ ಪಾದಯಾತ್ರೆ ಮಾಡಿದ್ದಾರೆ ಎಂದು ಹೇಳಿದರು.