ಬೊಲ್ಲಾರ್ಡ್‌ ಕಣ್ಮರೆ ವಿರುದ್ಧ ಪಾಲಿಕೆ ದೂರು

Team Udayavani, Nov 7, 2019, 3:03 AM IST

ಬೆಂಗಳೂರು: ಸೇಂಟ್‌ ಮಾರ್ಕ್ಸ್ ರಸ್ತೆಯಲ್ಲಿನ ಎಂಟು ಬೊಲ್ಲಾರ್ಡ್‌ (ಬಿಗಿಗಂಬ)ಗಳು ಕಾಣೆಯಾಗಿರುವ ಸಂಬಂಧ ಕಬ್ಬನ್‌ ಪಾರ್ಕ್‌ ಠಾಣೆಯಲ್ಲಿ ಬಿಬಿಎಂಪಿ ದೂರು ದಾಖಲಿಸಿದೆ. ಬಿಬಿಎಂಪಿಯು ಟೆಂಡರ್‌ ಶ್ಯೂರ್‌ ಕಾಮಗಾರಿ ಅಡಿ ಸೇಂಟ್‌ ಮಾರ್ಕ್ಸ್ ರಸ್ತೆಯ ಸ್ಟೇಟ್‌ ಬ್ಯಾಂಕ್‌ ಆಫ್ ಇಂಡಿಯಾ ಬ್ಯಾಂಕ್‌ ಮುಂಭಾಗದ ರಸ್ತೆಯನ್ನು ಅಭಿವೃದ್ಧಿಪಡಿಸಿತ್ತು.

ಈ ಮಾರ್ಗದಲ್ಲಿ ಮಾರ್ಚ್‌ನಲ್ಲೂ ಮೂರು ಬೊಲ್ಲಾರ್ಡ್‌ಗಳು ಕಾಣೆಯಾಗಿದ್ದವು. ಇತ್ತೀಚೆಗೆ 8 ಬೊಲ್ಲಾರ್ಡ್‌ಗಳು ಕಾಣೆಯಾಗಿದ್ದ ಹಿನ್ನೆಲೆಯಲ್ಲಿ ಬುಧವಾರ ಬಿಬಿಎಂಪಿಯ ಅಧಿಕಾರಿಗಳು ದೂರು ದಾಖಲಿಸಿದ್ದರು. “ಸ್ಟೇಟ್‌ ಬ್ಯಾಂಕ್‌ ಆಫ್ ಇಂಡಿಯಾ ಬ್ಯಾಂಕ್‌ ಮುಂಭಾಗದ ರಸ್ತೆಯಲ್ಲಿ ಅ.28ಕ್ಕೆ ಟಾಟಾಎಸ್‌ ಮತ್ತು ಬುಲೆರೋ ವಾಹನಗಳ ನಡುವೆ ಅಪಘಾತ ಸಂಭವಿಸಿತ್ತು. ಈ ಅಪಘಾತದಲ್ಲಿ 8 ಬೊಲ್ಲಾರ್ಡ್‌ಗಳಿಗೆ ಹಾನಿಯಾಗಿತ್ತು ಹಾಗೂ ಬೊಲ್ಲಾರ್ಡ್‌ಗಳಿಂದ ವಾಹನ ಸಂಚಾರಕ್ಕೂ ತೊಂದರೆ ಆಗುತ್ತಿತ್ತು.

ಹೀಗಾಗಿ, ಬೊಲ್ಲಾರ್ಡ್‌ಗಳನ್ನು ವಶಕ್ಕೆ ಪಡೆದುಕೊಳ್ಳಲಾಗಿತ್ತು. ಬಿಬಿಎಂಪಿಯ ಅಧಿಕಾರಿಗಳು ದೂರು ನೀಡಿದ ಮೇಲೆ 8 ಬೊಲ್ಲಾರ್ಡ್‌ಗಳನ್ನು ಈ ರಸ್ತೆಯ ನಿರ್ವಹಣೆ ಜವಾಬ್ದಾರಿ ಹೊಂದಿರುವ ಪ್ರಸ್ಟೀಜ್‌ ಸಂಸ್ಥೆಗೆ ಹಸ್ತಾಂತರಿಸಲಾಗಿದ್ದು, ಸಂಸ್ಥೆ ಎಲ್ಲ ಬೊಲ್ಲಾರ್ಡ್‌ಗಳನ್ನು ಮರಳಿ ಅಳವಡಿಸಿದೆ’ ಎಂದು ಕಬ್ಬನ್‌ಪಾರ್ಕ್‌ ಠಾಣೆಯ ಪೊಲೀಸರು ತಿಳಿಸಿದರು.