ಬಿಬಿಎಂಪಿ ಕಂದಾಯ ಅಧಿಕಾರಿ ಎಸಿಬಿ ಬಲೆಗೆ

Team Udayavani, May 26, 2019, 3:03 AM IST

ಬೆಂಗಳೂರು: ಖಾತೆ ಬದಲಾವಣೆ ಮತ್ತು ವಿಭಾಗದ ಪತ್ರ ಮಾಡಿಕೊಂಡಲು ಲಂಚಕ್ಕೆ ಬೇಡಿಕೆ ಇಟ್ಟಿದ್ದ ಮಾರತ್ತಹಳ್ಳಿ ಬಿಬಿಎಂಪಿ ಉಪ ವಲಯದ ಸಹಾಯಕ ಕಂದಾಯ ಅಧಿಕಾರಿ ಎನ್‌.ಚಂದ್ರಶೇಖರ್‌ ಭ್ರಷ್ಟಾಚಾರ ನಿಗ್ರಹ ದಳ(ಎಸಿಬಿ) ಅಧಿಕಾರಿಗಳ ಬಲೆಗೆ ಬಿದ್ದಿದ್ದಾರೆ.

ದೂರುದಾರರು ಕಸವನಹಳ್ಳಿ, ಮೊದಲಿಯರ್‌ ಲೇಔಟ್‌ನಲ್ಲಿ ಖರೀದಿಸಿದ್ದ ನಿವೇಶನಕ್ಕೆ ಖಾತೆ ಬದಲಾವಣೆ ಮತ್ತು ವಿಭಾಗ ಪತ್ರವನ್ನು ಮಾಡಿಕೊಡಲು ಬಿಬಿಎಂಪಿ ಕಚೇರಿಯಲ್ಲಿ ಆನ್‌ಲೈನ್‌ ಮೂಲಕ ಅರ್ಜಿ ಸಲ್ಲಿಸಿದ್ದರು. ಅದಕ್ಕೆ ಅಧಿಕಾರಿ ಚಂದ್ರಶೇಖರ್‌ ದೂರುದಾರರಿಂದ 12 ಸಾವಿರ ರೂ. ಲಂಚಕ್ಕೆ ಬೇಡಿಕೆ ಇಟ್ಟಿದ್ದರು.

ಈ ಕುರಿತು ಅರ್ಜಿದಾರರು ಎಸಿಬಿಗೆ ದೂರು ನೀಡಿದ್ದರು. ಈ ಹಿನ್ನೆಲೆಯಲ್ಲಿ ಮೇ25ರಂದು ಚಂದ್ರಶೇಖರ್‌ ದೂರುದಾರರಿಂದ 12 ಸಾವಿರ ರೂ. ಲಂಚ ಸ್ವೀಕರಿಸುವಾಗ ಎಸಿಬಿ ಅಧಿಕಾರಿಗಳ ಬಲೆಗೆ ಬಿದ್ದಿದ್ದಾರೆ. ಸದ್ಯ ಚಂದ್ರಶೇಖರ್‌ರನ್ನು ಬಂಧಿಸಲಾಗಿದೆ.