Birds: ಸಿಲಿಕಾನ್‌ ಸಿಟಿಯಲ್ಲಿ ವಿದೇಶಿ ಪಕ್ಷಿಗಳ ಕಲರವ

Team Udayavani, Dec 23, 2024, 12:47 PM IST

ಬೆಂಗಳೂರು: ಚಳಿಗಾಲದ ಡಿಸೆಂಬರ್‌ ಮಾಸ ಬಂತೆಂದರೆ ಉದ್ಯಾನ ನಗರಿಯಲ್ಲಿ  ದೇಶ- ವಿದೇಶಗಳಿಂದ ವಲಸೆ ಬರುವ ಹಕ್ಕಿಗಳ ಕಲರವ ಶುರುವಾಗುತ್ತವೆ. ಅಂತೆಯೇ, ಈ ವರ್ಷವೂ ಯೂರೋಪ್‌, ಚೀನಾ, ಅಂಟಾರ್ಟಿಕಾ, ಮಂಗೋಲಿಯಾ, ಹಿಮಾಲಯ ಸೇರಿದಂತೆ ಹಲವು ದೇಶಗಳ ಭಿನ್ನ ಮಾದರಿಯ ಪಕ್ಷಿಗಳು ಈಗಾಗಲೇ ಬೆಂಗಳೂರಿನ ವಿವಿಧೆಡೆ ಬೀಡು ಬಿಟ್ಟಿವೆ.

ಉದ್ಯಾನನಗರಿ ಬೆಂಗಳೂರಿನಲ್ಲಿ ಹಲವು ಪ್ರಭೇದದ ದೇಶ-ವಿದೇಶಿ ಹಕ್ಕಿಗಳಿಗೆ ಅನುಕೂಲಕರವಾದ ವಿವಿಧ ಗುಣ ಲಕ್ಷಣ ಹೊಂದಿರುವ ಆವಾಸಸ್ಥಾನಗಳಿವೆ. ಈ ವರ್ಷವೂ ಚಳಿಗಾಲ ಪ್ರಾರಂಭವಾಗುತ್ತಿದ್ದಂತೆ ತಮಗೆ ಅನುಕೂಲಕರವಾದ ವಾಸಸ್ಥಾನಗಳನ್ನು ಅರಸಿ 50ಕ್ಕೂ ಹೆಚ್ಚಿನ ಪ್ರಭೇದ‌ದ ಹಲವು ವಿಶೇಷತೆಗಳನ್ನು ಒಳಗೊಂಡ ವಿದೇಶಿ ಹಕ್ಕಿಗಳು ಲಕ್ಷಾಂತರ ಕಿಲೋ ಮೀಟರ್‌ ದೂರದಿಂದ ನಗರಕ್ಕೆ ವಲಸೆ ಬಂದಿವೆ. ಇದಲ್ಲದೇ, ದೇಶದ ವಿವಿಧ ರಾಜ್ಯಗಳ ವಿರಳವಾದ ನೂರಾರು ಹಕ್ಕಿಗಳನ್ನೂ ಅಲ್ಲಲ್ಲಿ ಗಮನಿಸಬಹುದು.

ಯೂರೋಪ್‌ನ ಪಕ್ಷಿಗಳು ಲಗ್ಗೆ: ಬೆಂಗಳೂರಿಗೆ ವಲಸೆ ಬರುವ ಬಹುತೇಕ ಹಕ್ಕಿಗಳು ಯೂರೋಪ್‌ನ ವಿವಿಧ ದೇಶಗಳಿಂದ ಬರುತ್ತವೆ. ಈಸ್ಟನ್‌ ಯೂರೋಪಿನಿಂದ ಸ್ಪೈನ್‌ ಮಾಂಟೆಗೂ ಹಾಗೂ ಪ್ಯಾಲಿಡ್‌ ಹ್ಯಾರಿಯರ್‌ಗಳು ಹೆಸರುಘಟ್ಟ ಹುಲ್ಲುಗಾವಲು ಪ್ರದೇಶಗಳಲ್ಲಿ ಕಾಣ ಸಿಗುತ್ತಿವೆ. ಮಾರ್ಷ್‌ ಹ್ಯಾರಿಯರ್‌ ಕೆರೆ ಬದಿಗಳಲ್ಲಿದ್ದುಕೊಂಡು ಮೀನು, ನೀರಿನ ಹಕ್ಕಿಗಳನ್ನು ತಿಂದರೆ, ಮಾಂಟೆಗೂ ಹ್ಯಾರಿಯರ್‌ಗೆ ಇಲಿ, ಸರಿಸೃಪ ಆಹಾರವಾಗಿದೆ. ಇನ್ನು ಪ್ಯಾಲಿಡ್‌ ಹ್ಯಾರಯರ್‌ ಮೊಲ, ಸಣ್ಣ-ಪುಟ್ಟ ಹಕ್ಕಿಗಳನ್ನು ಬೇಟೆಯಾಡುತ್ತಿವೆ. ಇವುಗಳು ಮಾರ್ಚ್‌ನಲ್ಲಿ ಮತ್ತೆ ಯೂರೋಪ್‌ನತ್ತ ಸಾಗುತ್ತವೆ.

ರಣಹದ್ದುಗಳ ಗಾತ್ರದಲ್ಲಿರುವ ಈ ಪಕ್ಷಿಗಳು ಬಹಳಷ್ಟು ಎತ್ತರಕ್ಕೆ ಹಾರದೇ, 10 ರಿಂದ 20 ಅಡಿ ಎತ್ತರದಲ್ಲಷ್ಟೇ ಹಾರಾಡುವುದು ಇದರ ವಿಶೇಷತೆ. ಇನ್ನು ಯೂರೋಪಿನ ಆರ್ಟಿಕ್‌ನಿಂದ ವಾಲ್ಬìರ್ಸ್‌ ಜಾತಿಯ ಹಕ್ಕಿಗಳು ಬರಲಾರಂಭಿಸಿವೆ. ಗುಬ್ಬಚ್ಚಿಯ ಗಾತ್ರಕ್ಕಿಂತಲೂ ಸಣ್ಣವಾಗಿರುವ ಇವುಗಳು ನಗರದ ಅಲ್ಲಲ್ಲಿ ಕಂಡು ಬಂದಿವೆ. ಯೂರೋಪ್‌ ದೇಶಗಳಿಂದ ಯುರೇಷಿಯನ್‌ ಕುಕ್ಕೂ, ಯುರೋಪಿಯನ್‌ ರೋಲರ್‌ಗಳು ಸಾಕಷ್ಟು ಪ್ರಮಾಣದಲ್ಲಿ ನಗರದಲ್ಲಿ ತಮ್ಮ ಕಲರವ ಶುರುಮಾಡಿದೆ. ಲಕ್ಷಾಂತರ ಸಂಖ್ಯೆಯಲ್ಲಿ ಜೊತೆಯಾಗಿ ವಲಸೆ ಬಂದಿರುವ ಹಕ್ಕಿಗಳ ಪೈಕಿ ಇಂಗ್ಲೆಂಡ್‌ನ‌ ರೋಸಿ ಸ್ಟಾರ್ಲಿಂಗ್‌ ಪ್ರಮುಖವಾಗಿದೆ. ಯೂರೋಪ್‌ನ ವಿವಿಧ ಭಾಗಗಳಿಂದ ಟೆಮಿಂಗ್‌ ಸ್ಟಿಂಟ್‌, ಕಾಮನ್‌ ಸ್ಟಿಂಟ್‌ ಜಾತಿಯ ಎರಡು, ಮೂರು ಹಕ್ಕಿಗಳು ಕಾಲಿಟ್ಟಿವೆ.

ಭಿನ್ನ ವೈಶಿಷ್ಟ್ಯದ ಅಮೂರ್‌ ಫಾಲ್ಕನ್‌: ಮಂಗೋ ಲಿಯಾ, ಸೈಬೀರಿಯಾದಿಂದ ಟಫೆrಡ್‌ ಡಕ್‌, ಕಾಮನ್‌ ಟೀಲ್‌, ಪೋ ಚಾಸ್ಟ್ಸ್ನಂತಹ ಪಕ್ಷಿಗಳು ಸಿಲಿಕಾನ್‌ ಸಿಟಿಯ ಪ್ರಕೃತಿ ವೈಶಿಷ್ಟéಗಳಿರುವ ಪ್ರದೇಶಗಳಲ್ಲಿ ಓಡಾಡುತ್ತಿವೆ. ರಷ್ಯಾದ ಸಣ್ಣ ಗಾತ್ರದ ಅಮೂರ್‌ ಫಾಲ್ಕನ್‌ ಗುಂಪು-ಗುಂಪಾಗಿ ವಿದೇಶದಿಂದ ಬೆಂಗಳೂ ರಿಗೆ ಬಂದಿದ್ದು, ಕೆಲ ತಿಂಗಳ ಬಳಿಕ ಇಲ್ಲಿಂದ ಆಫ್ರಿಕಾ ದತ್ತ ಹಾರುತ್ತವೆ. ಇನ್ನು ಅಲಸ್ಕಾದಿಂದ ಬೆಂಗಳೂರಿಗೆ ಬಂದಿರುವ ರೆಡ್‌ ರೋಟೆಡ್‌ ಪಿಪಿಟ್‌ ಎಂಬ ಭಿನ್ನ ಜಾತಿಯ ಪಕ್ಷಿಯು ಫೆಬ್ರವರಿಯಲ್ಲಿ ಅಂಡಮಾನ್‌-ನಿಕೋಬಾರ್‌ಗೆ ತೆರಳಲಿವೆ. ಪುಟ್ಟದಾದ ಈ ಜಾತಿಯ ಹಕ್ಕಿಗಳು ಐದಾರು ಗುಂಪುಗಳ‌ಲ್ಲಿ ಕೆರೆದಂಡೆ ಬಳಿ ಬಂದು ನೆಲೆಸುತ್ತವೆ. ಅಲ್ಲಿ ಸಿಗುವ ಸೊಳ್ಳೆಗಳಂತಹ ಕ್ರಿಮಿ ಕೀಟಗಳೇ ಇವುಗಳ ಪ್ರಮುಖ ಆಹಾರ. ಜೊತೆಗೆ ರೆಡ್‌ ನೆಕ್ಕಡ್‌ ಫಾಲ್ಕನ್‌, ಸ್ಟೆಪಿ ಈಗಲ್, ಪೈಲ್ಡ್‌ ಹ್ಯಾರಿಯರ್‌, ಕ್ರೇಕ್ಸ್‌, ಲಿಟಲ್‌ ಸ್ಟಿಂಟ್‌, ಏಶಿಯನ್‌ ಫೇರಿ ಬ್ಲೂಬರ್ಡ್‌ ಪಕ್ಷಿಗಳನ್ನೂ ವೀಕ್ಷಿಸಬಹುದು.

ವಿದೇಶಿ ಹಕ್ಕಿಗಳು ಎಲ್ಲಿ ಕಾಣ ಸಿಗುತ್ತವೆ? :

ಬೆಂಗಳೂರಿನ ಬನ್ನೇರುಘಟ್ಟ, ನಂದಿಬೆಟ್ಟ, ಜಿಕೆ ವಿಕೆ, ಕನಕಪುರ ರಸ್ತೆಯ ವ್ಯಾಲಿ ಸ್ಕೂಲ್‌ ಭಾಗ ಗಳಲ್ಲಿ ವಿದೇಶಿ ಪಕ್ಷಿಗಳು ಕಾಣ ಸಿಗುತ್ತವೆ. ಹ್ಯಾರಿ ಯರ್ಸ್‌ನಂತರ ಪಕ್ಷಿಗಳು ಹೊಸಕೋಟೆ, ಹೆಸರುಘಟ್ಟ ಪಕ್ಕದ ಕೆರೆಗಳಲ್ಲಿ ಇವೆ. ಹೆಸರು ಘಟ್ಟ, ಟಿಜೆ ಹಳ್ಳಿ, ನಗರದ ಹೊರವಲಯದಲ್ಲಿ ರುವ ಹೊಸಕೋಟೆ ಕೆರೆ, ಆನೇಕಲ್‌, ಮೈಸೂರು ರಸ್ತೆಯ ಒಣ ಗುಡ್ಡಗಳು ವಲಸೆ ಹಕ್ಕಿಗಳ ಪ್ರಮುಖ ಆವಾಸಸ್ಥಾನಗಳಾಗಿವೆ.

ವಿದೇಶಿ ಹಕ್ಕಿಗಳ ವಲಸೆ ಪಯಣವೇ ರೋಮಾಂಚನ: 

ವಿದೇಶಗಳಿಂದ ಬೆಂಗಳೂರಿಗೆ ಆಗಮಿಸುವ ಹತ್ತಾರು ಜಾತಿಗಳ ಹಕ್ಕಿಗಳಿಗೆ ಅದರದೇ ಆಗ ವಲಸೆ ಮಾರ್ಗಗಳಿರುತ್ತವೆ. ಋತುಮಾನಗಳಿಗೆ ಅನುಗುಣವಾಗಿ ಅವುಗಳು ತಮ್ಮ ವಾಸ ಸ್ಥಳ ಬದಲಾಯಿಸುತ್ತವೆ. ಸೂರ್ಯ, ಚಂದ್ರ, ನಕ್ಷತ್ರಗಳು ಹಾಗೂ ಭೂಮಿಯ ಗುರುತ್ವಾಕರ್ಷಣಾ ಶಕ್ತಿಗಳನ್ನೆಲ್ಲಾ ಗ್ರಹಿಸಿ ಸಾಗುತ್ತವೆ. ಇವೆಲ್ಲವೂ ಪ್ರಕೃತಿಯ ವೈಶಿಷ್ಟéಗಳಾಗಿವೆ. ಕೆಲವು ಹಕ್ಕಿಗಳು ಎಲ್ಲೂ ವಿಶ್ರಾಂತಿ ಪಡೆಯದೇ ವಿದೇಶಗಳಿಂದ ಒಂದೆರಡು ದಿನಗಳಲ್ಲೇ ಬೆಂಗಳೂರಿಗೆ ತಲುಪಿದರೆ, ಇನ್ನು ಕೆಲ ಜಾತಿಯ ಪಕ್ಷಿಗಳು ತಿಂಗಳುಗಟ್ಟಲೆ ಪ್ರಯಾಣ ಮಾಡುತ್ತವೆ. ಉದಾಹರಣೆಗೆ ಬಾರ್‌ ಹೆಡೆಡ್‌ ಗೂಸ್‌ ಲಡಾಖ್‌ನಿಂದ ಒಂದೇ ಬಾರಿಗೆ ಹಾರಿ ಬರುತ್ತವೆ. ಹ್ಯಾರಿಯರ್ಸ್‌ನಂತಹವುಗಳು ಯೂರೋಪಿನಿಂದ ಬರಲು 1 ತಿಂಗಳು ಬೇಕಾಗುತ್ತವೆ. ಬಹುತೇಕ ಹಕ್ಕಿಗಳು ಪ್ರಯಾಣದ ಮಧ್ಯೆ ಆಹಾರಕ್ಕಾಗಿ ಭೂ ಮಾರ್ಗದ ಮೇಲೆ ಹಾರಿಕೊಂಡು ಬರುತ್ತವೆ. ಸಮುದ್ರದ ಮಧ್ಯೆ ಹಾರಾಟ ಮಾಡಿ ಬರುವುದು ವಿರಳ ಎನ್ನುತ್ತಾರೆ ಪಕ್ಷಿ ವೀಕ್ಷಕ ಕ್ಲೆಮೆಂಟ್‌ ಫ್ರಾನ್ಸಿಸ್‌.

30 ಸಾವಿರ ಅಡಿ ಎತ್ತರಕ್ಕೆ ಹಾರುವ ಹೆಡೆಡ್‌ ಗೂಸ್‌:

ಲಡಾಖ್‌, ಚೀನಾ, ಟಿಬೇಟ್‌, ಸೈಬೀರಿಯಾದಿಂದ ಸಾವಿರಾರು ಸಂಖ್ಯೆಯಲ್ಲಿ ಬಾರ್‌ ಹೆಡೆಡ್‌ ಗೂಸ್‌ ಸಿಲಿಕಾನ್‌ ಸಿಟಿಗಳಲ್ಲಿರುವ ಕೆರೆಗಳಲ್ಲಿ ಕಾಣ ಸಿಗುತ್ತಿವೆ. ಇವುಗಳು ಫೆಬ್ರುವರಿ ವರೆಗೆ ಇಲ್ಲೇ ಇದ್ದು ನಂತರ ತಮ್ಮ ಊರಿಗೆ ಮರಳುತ್ತವೆ. ಇದು 30 ಸಾವಿರ ಅಡಿಗೂ ಎತ್ತರದಲ್ಲಿ ಹಾರಾಡಬಲ್ಲ ಸಾಮರ್ಥ್ಯ ಹೊಂದಿದ್ದು, ಎತ್ತರದಲ್ಲಿ ವಿಮಾನ ಸಂಚರಿಸುವ ವೇಳೆ ಪೈಲಟ್‌ಗಳಿಗೆ ಕಾಣ ಸಿಗುತ್ತವೆ. ಇವುಗಳು ಬಾತುಕೋಳಿಗಿಂತ ದೊಡ್ಡ ಗಾತ್ರದಲ್ಲಿದ್ದು, ಮಾಗಡಿ, ವರ್ತೂರು ಕೆರೆಗಳಲ್ಲಿ ಕಾಣ ಸಿಗುತ್ತವೆ. ಇದು ಸಸ್ಯಹಾರಿಯಾಗಿದ್ದು, ಭತ್ತ, ಹುಲ್ಲಿನಂತವುಗಳೇ ಇದರ ಆಹಾರ.

ಹಿಮಾಲಯ ಟು ಬೆಂಗಳೂರು:

ಹಿಮಾಲಯದ ಭಾಗಗಳಲ್ಲಿ ಅತ್ಯಧಿಕ ಚಳಿ ಉಂಟಾಗಿರುವ ಹಿನ್ನೆಲೆಯಲ್ಲಿ ಅಲ್ಲಿನ ಬ್ಲೂ ಕ್ಯಾಪಡ್‌ ರಾಕ್‌ಥ್ರಶ್‌, ಟಿಕಿಲ್‌ ಫ್ಲೈ ಕ್ಯಾಚರ್‌, ಅಲ್ಟ್ರಾ ಮರೆನ್‌ ಪ್ಲೈ ಕ್ಯಾಚರ್‌, ರೆಡ್‌ ಪೋರ್ಟೆಡ್‌ ಪ್ಲೆ„ ಕ್ಯಾಚರ್‌ ಎಂಬ ಭಿನ್ನ ರೀತಿಯ ಹಕ್ಕಿಗಳು ಬೆಂಗಳೂರಿಗೆ ವಲಸೆ ಬಂದಿದ್ದು, ಇವುಗಳು 2025ರ ಮಾರ್ಚ್‌ನಲ್ಲಿ ಇಲ್ಲಿಂದ ಮರಳಲಿವೆ. ಇವುಗಳು ಸಣ್ಣ ಗಾತ್ರದ ಹಕ್ಕಿಗಳಾಗಿದ್ದು, ಕಬ್ಬನ್‌ ಪಾರ್ಕ್‌, ನಂದಿಬೆಟ್ಟ, ಐಐಎಸ್‌ಸಿ, ಬನ್ನೇರುಘಟ್ಟ, ಲಾಲ್‌ಬಾಗ್‌ಗಳಲ್ಲಿ ಸಾಮಾನ್ಯವಾಗಿ ಕಾಣ ಸಿಗುತ್ತವೆ. ಇದು ಒಂದು ಅಥವಾ ಹತ್ತಾರು ಸಂಖ್ಯೆಯಲ್ಲಿ ಬರುತ್ತವೆ.

ಯೂರೋಪ್‌ ಸೇರಿ ವಿವಿಧೆಡೆ ಚಳಿ ಹೆಚ್ಚಾಗಿರುತ್ತವೆ. ಹೀಗಾಗಿ ಅಲ್ಲಿನ ಪಕ್ಷಿಗಳು ಬೆಂಗಳೂರಿನತ್ತ ವಲಸೆ ಬಂದು ಹೋಗುತ್ತವೆ. ಬೆಂಗಳೂರಿನಲ್ಲಿ ಡಿಸೆಂಬರ್‌, ಜನವರಿಯಲ್ಲಿ ಹೆಚ್ಚಾಗಿ ವಿದೇಶಿ ಪಕ್ಷಿಗಳು ಕಾಣ ಸಿಗುತ್ತವೆ. -ಕ್ಲೆಮೆಂಟ್‌ ಫ್ರಾನ್ಸಿಸ್‌, ವನ್ಯಜೀವಿ ಫೋಟೊಗ್ರಾಫ‌ರ್‌

ಕೆರೆಯ ಸಹಜತೆ ಇಂದು ಉಳಿದಿಲ್ಲ. ಹೀಗಾಗಿ ಬೆಂಗಳೂರಿಗೆ ಹಿಂದೆ ಬರುತ್ತಿದ್ದ ಪ್ರಮಾಣದಲ್ಲಿ ವಿದೇಶಿ ಹಕ್ಕಿಗಳು ಬರುತ್ತಿಲ್ಲ. ಕೆರೆಗೆ ಜೀವಕಳೆ ಇರಬೇಕು. ಮನುಷ್ಯನಿಗೋಸ್ಕರ ಕೆರೆ ಇಟ್ಟುಕೊಳ್ಳುವುದಲ್ಲ. ಹಕ್ಕಿಗಳಿಗೆ ತೊಂದರೆಯಾದರೆ ಅವುಗಳು ಅಂತಹ ಕಡೆ ಬರುವುದಿಲ್ಲ.-ಸತೀಶ್‌ ಪೂಜಾರಿ, ಹವ್ಯಾಸಿ ಪಕ್ಷಿ ವೀಕ್ಷಕ

– ಅವಿನಾಶ ಮೂಡಂಬಿಕಾನ