“ಲಕ್ಕಿ’ ಬಂಗಲೆ ಬೇಕೆಂದ ಬಿಎಸ್‌ವೈ

Team Udayavani, Jun 12, 2018, 11:45 AM IST

ಬೆಂಗಳೂರು: ಪ್ರತಿಪಕ್ಷ ನಾಯಕ ಬಿ.ಎಸ್‌.ಯಡಿಯೂರಪ್ಪ ಅವರು ರೇಸ್‌ಕೋರ್ಸ್‌ ರಸ್ತೆ ಬಳಿ ಇರುವ ಸರ್ಕಾರಿ ಬಂಗಲೆ ನೀಡುವಂತೆ ಕೋರಿಕೆ ಸಲ್ಲಿಸಿದ್ದಾರೆ. ಈ ಹಿಂದೆ ಮುಖ್ಯಮಂತ್ರಿಯಾಗಿದ್ದಾಗ ವಾಸವಿದ್ದ ರೇಸ್‌ಕೋರ್ಸ್‌ ಬಳಿಯ ಬಂಗಲೆಯನ್ನೇ ಪ್ರತಿಪಕ್ಷ ನಾಯಕರಾಗಿರುವ ತಮಗೆ ಕೊಡಬೇಕು ಎಂದು ಕೇಳಿದ್ದಾರೆ.

ಆ ಬಂಗಲೆ ವಿಶಾಲವಾಗಿದ್ದು, ನಾಲ್ಕು ಕೋಣೆ ಹೊಂದಿದೆ. ಬಿಜೆಪಿಯ 104 ಶಾಸಕರೊಂದಿಗೆ ಸಭೆ ನಡೆಸಲು ವಿಶಾಲವಾದ ಬಂಗಲೆ ಬೇಕಾಗಿದೆ. ಹೀಗಾಗಿ, ಅದನ್ನೇ ಕೊಡಿ ಎಂದು ಪತ್ರ ಬರೆದಿದ್ದರು. ಈ ಸಂಬಂಧ ಮೇ 25ರಂದೇ ಯಡಿಯೂರಪ್ಪ ಮನವಿ ಸಲ್ಲಿಸಿದ್ದರೂ ಆಡಳಿತ ಮತ್ತು ಸಿಬ್ಬಂದಿ ಸುಧಾರಣೆ ಇಲಾಖೆಯಿಂದ ಸೂಕ್ತ ಸ್ಪಂದನೆ ದೊರೆತಿಲ್ಲ. ಹೀಗಾಗಿ ಜೂ.7ರಂದು ಮುಖ್ಯಮಂತ್ರಿ ಹಾಗೂ ಮುಖ್ಯ ಕಾರ್ಯದರ್ಶಿಗೆ ಮತ್ತೂಂದು ಪತ್ರ ಬರೆದಿದ್ದಾರೆ.

ಪ್ರಸ್ತುತ ರೇಸ್‌ಕೋರ್ಸ್‌ ಬಂಗಲೆಯಲ್ಲಿ ಮಾಜಿ ಸಚಿವ ರಮಾನಾಥ್‌ ರೈ ವಾಸವಿದ್ದಾರೆ. ಅವರು ತೆರವು ಮಾಡಿದ ನಂತರ ಬೇರೆಯವರಿಗೆ ನೀಡಬೇಕಾಗಿದೆ. ಆದರೆ, ತಮಗೆ ಆ ಬಂಗಲೆ ಸಿಗುವುದು ಅನುಮಾನ ಎಂದು ಗೊತ್ತಾಗಿದ್ದರಿಂದ ಯಡಿಯೂರಪ್ಪ ನೇರವಾಗಿ ಮುಖ್ಯಮಂತ್ರಿ ಹಾಗೂ ಮುಖ್ಯ ಕಾರ್ಯದರ್ಶಿಗೆ ಪತ್ರ ಬರೆದಿದ್ದಾರೆ. ಆ ಬಂಗಲೆ ತಮ್ಮ “ಲಕ್ಕಿ’  ಎಂಬ ಕಾರಣಕ್ಕೆ ಯಡಿಯೂರಪ್ಪ ಅದೇ ಬಂಗಲೆಗೆ ಬೇಡಿಕೆ ಇಟ್ಟಿದ್ದಾರೆ ಎನ್ನಲಾಗಿದೆ.

ಕಾವೇರಿ ಬಿಡ್ತಾರಾ ಸಿದ್ದು: ಈ ಮಧ್ಯೆ, ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು “ಕಾವೇರಿ’ ತೆರವು ಮಾಡಿ ವಿಜಯನಗರದಲ್ಲಿರುವ ಸ್ವಂತ ನಿವಾಸ “ಪ್ರಸಿದ್ಧಿ’ಗೆ ಹೋಗಲಿದ್ದಾರೆ ಎಂಬ ಮಾತುಗಳು ಕೇಳಿಬರುತ್ತಿವೆ.  ಈ ಹಿಂದೆ ಉಪ ಮುಖ್ಯಮಂತ್ರಿಯಾಗಿದ್ದಾಗ ಹಾಗೂ ಐದು ವರ್ಷ ಮುಖ್ಯಮಂತ್ರಿಯಾಗಿ ಮುಖ್ಯಮಂತ್ರಿಯವರ ಗೃಹ ಕಚೇರಿ ಕೃಷ್ಣಾಗೆ ಹೊಂದಿಕೊಂಡಿರುವ ಕಾವೇರಿಯಲ್ಲಿ ವಾಸವಿದ್ದ ಸಿದ್ದರಾಮಯ್ಯ ಅವರಿಗೂ ಒಂದು ರೀತಿಯಲ್ಲಿ ಲಕ್ಕಿ ನಿವಾಸವೇ ಆಗಿತ್ತು.

ಆದರೆ, ಇದೀಗ ಮುಖ್ಯಮಂತ್ರಿ ಸ್ಥಾನದಿಂದ ಕೆಳಗೆ ಇಳಿದಿರುವುದರಿಂದ ಕಾವೇರಿ ಬಿಡಬೇಕಾಗಿದೆ. ಮತ್ತೂಂದು ಮೂಲಗಳ ಪ್ರಕಾರ ಸಮನ್ವಯ ಸಮಿತಿ ಅಧ್ಯಕ್ಷರಾಗಿರುವ ಅವರಿಗೆ ಸಂಪುಟ ದರ್ಜೆ ಸ್ಥಾನಮಾನ ದೊರೆತರೆ ಸರ್ಕಾರಿ ಬಂಗಲೆ ದೊರೆಯಲಿದ್ದು ಕಾವೇರಿಯಲ್ಲೇ ಇರಬಹುದು ಎಂದೂ ಹೇಳಲಾಗಿದೆ.