ಮ್ಯಾಂಗೋ ಪಿಕ್ಕಿಂಗ್‌ನಲ್ಲಿ  3 ಟನ್‌ ಮಾವು ಖರೀದಿ

Team Udayavani, Apr 30, 2017, 12:20 PM IST

ಬೆಂಗಳೂರು: “ಮ್ಯಾಂಗೋ ಪಿಕ್ಕಿಂಗ್‌ ಟೂರಿಸಂ’ ಕಾರ್ಯಕ್ರಮದಡಿ ಶ್ರೀನಿವಾಸಪುರ ಹಾಗೂ ಕನಕಪುರದ ಮಾವಿನ ತೋಟಗಳಿಗೆ ಭೇಟಿ ನೀಡಿದ ಬೆಂಗಳೂರಿನ ಗ್ರಾಹಕರು ಮೊದಲ ದಿನವೇ ಬರೋಬ್ಬರಿ 3 ಟನ್‌ಗಿಂತಲೂ ಹೆಚ್ಚು ಮಾವು ಖರೀದಿಸಿದ್ದಾರೆ.

ಮಾವಿನ ತೋಟಗಳಿಗೆ ಭೇಟಿ ನೀಡಿದ ಗ್ರಾಹಕರು ಅಲ್ಫಾನ್ಸೋ, ಸೇಂದೂರ, ಮಲ್ಲಿಕಾ, ದಶೇರಿ ಸೇರಿದಂತೆ ನಾನಾ ತಳಿಯ ಮಾವುಗಳಿಗೆ ಮುಗಿಬಿದ್ದರು. ರಸಾಯನಿಕ ಮುಕ್ತ ಮಾವು ಖರೀದಿಗೆ ಪೈಪೋಟಿಗೆ ಬಿದ್ದವರಂತೆ 8, 10, 12 ಕೆ.ಜಿ. ಖರೀದಿಸಿದ ಗ್ರಾಹಕರು, ತೋಟದಲ್ಲಿಯೇ ಮಾಗಿದ್ದ ಮಾವಿನ ಹಣ್ಣು ಸವಿದು ಸಂತೃಪ್ತರಾದರು.

ಇದಕ್ಕೂ ಮೊದಲು ರಾಜ್ಯ ಮಾವು ಅಭಿವೃದ್ಧಿ ಮತ್ತು ಮಾರುಕಟ್ಟೆ ನಿಗಮ ಕಬ್ಬನ್‌ಪಾರ್ಕ್‌ನ ಬ್ಯಾಂಡ್‌ ಸ್ಟಾಂಡ್‌ ಸಮೀಪ ಶನಿವಾರ ಹಮ್ಮಿಕೊಂಡಿದ್ದ “ಮ್ಯಾಂಗೋ ಪಿಕ್ಕಿಂಗ್‌ ಟೂರಿಸಂ’ ಕಾರ್ಯಕ್ರಮಕ್ಕೆ ಮೇಯರ್‌ ಜಿ.ಪದ್ಮಾವತಿ ಹಸಿರು ನಿಶಾನೆ ತೋರಿದರು. 

ಬಳಿಕ ಮಾತನಾಡಿದ ಅವರು, ಗ್ರಾಹಕರು ಮತ್ತು ಮಾವು ಬೆಳೆಗಾರರು ನೇರ ಸಂಪರ್ಕ ವ್ಯವಸ್ಥೆ ಕಲ್ಪಿಸಲು ನಿಗಮ ಆಯೋಜಿಸಿರುವ “ಮ್ಯಾಂಗೋ ಪಿಕ್ಕಿಂಗ್‌ ಟೂರಿಸಂ’ ಕಾರ್ಯಕ್ರಮ ಗ್ರಾಹಕರು ಮತ್ತು ರೈತರಿಬ್ಬರಿಗೆ ಅನುಕೂಲಕರವಾಗಿದೆ. ಈ ಉದ್ದೇಶದಿಂದಲೇ ನಿಗಮ ಜಾರಿಗೆ ತಂದಿರುವ ಕಾರ್ಯಕ್ರಮ ಉಪಯುಕ್ತವಾಗಿದೆ ಎಂದರು. ನಿಗಮದ ವ್ಯವಸ್ಥಾಪಕ ನಿರ್ದೇಶಕ ಕದಿರೇಗೌಡ ಮತ್ತಿತರರು ಇದ್ದರು. 

ಬಣ್ಣ ನೋಡಿ ಮರುಳಾಗಿ ಹೆಚ್ಚು ದುಡ್ಡುಕೊಟ್ಟು ಖರೀದಿಸಿದರೂ ಉತ್ತಮ ರುಚಿಕರ ಮಾವು ಸಿಗುತ್ತಿಲ್ಲ. ಮಾವನ್ನು ಹಣ್ಣು ಮಾಡಲು ರಸಾಯನಿಕ ಬಳಸುತ್ತಿದ್ದು, ಆರೋಗ್ಯಕ್ಕೆ ಹಾನಿಕರವೂ ಹೌದು. ಮಾವು ಅಭಿವೃದ್ಧಿ ನಿಗಮದ ಈ ಯೋಜನೆ ತುಂಬಾ ಇಷ್ಟ ಆಯ್ತು. ಆರೋಗ್ಯಕರ ಹಣ್ಣು ತಿನ್ನಲು ಅವಕಾಶ ಸಿಕ್ಕಂತಾಗಿದೆ.
-ಸುರೇಖಾ, ಗೃಹಿಣಿ