ಮಹಿಳೆಗೆ ಅಶ್ಲೀಲ ವಿಡಿಯೋ ತೋರಿಸಿದ ಕ್ಯಾಬ್‌ ಚಾಲಕ

Team Udayavani, Sep 9, 2018, 12:08 PM IST

ಬೆಂಗಳೂರು: ಖಾಸಗಿ ಕಂಪನಿಯ ಮಹಿಳಾ ಉದ್ಯೋಗಿ ಒಬ್ಬರನ್ನು ಕರೆದೊಯ್ಯುವಾಗ ಅಶ್ಲೀಲ ವಿಡಿಯೋ ತೋರಿಸಿ ಅಸಭ್ಯವಾಗಿ ವರ್ತಿಸಿದ ಓಲಾ ಕ್ಯಾಬ್‌ ಚಾಲಕನನ್ನು ಕಬ್ಬನ್‌ ಪಾರ್ಕ್‌ ಪೊಲೀಸರು ಬಂಧಿಸಿದ್ದಾರೆ. ಮಧ್ಯಪ್ರದೇಶ ಮೂಲದ ದೊಮ್ಮಲೂರು ನಿವಾಸಿ ಜಿತೇಂದ್ರ ಕುಮಾರ್‌ (35) ಬಂಧಿತ ಚಾಲಕ. ಆರೋಪಿಯ ವಿರುದ್ಧ ಐಪಿಸಿ 354(ಎ) (ಲೈಂಗಿಕ ದೌರ್ಜನ್ಯ)ಅಡಿಯಲ್ಲಿ ಬಂಧಿಸಿ, ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ ಎಂದು ಪೊಲೀಸರು ತಿಳಿಸಿದರು.

ಆ.23ರಂದು ಬೆಳಗ್ಗೆ 6.28ರಲ್ಲಿ ಯಲಹಂಕ ನ್ಯೂಟೌನ್‌ನಿಂದ ಜೆ.ಪಿ.ನಗರಕ್ಕೆ ಹೋಗಲು ಸಂತ್ರಸ್ತೆ ಓಲಾಕ್ಯಾಬ್‌ ಬುಕ್‌ ಮಾಡಿದ್ದರು. ಯಲಹಂಕ ನ್ಯೂಟೌನ್‌ಗೆ ಕ್ಯಾಬ್‌ನಲ್ಲಿ ಬಂದ ಆರೋಪಿ ಮಹಿಳೆಯನ್ನು ಕರೆದೊಯ್ಯುತ್ತಿದ್ದ. ವಿಧಾನಸೌಧ ಸಿಗ್ನಲ್‌ನಿಂದ ಕ್ವೀನ್ಸ್‌ ವೃತ್ತದ ಕಡೆ ಹೋಗುವಾಗ ಆರೋಪಿ ತನ್ನ ಮುಂಬದಿಯಲ್ಲಿದ್ದ ಕನ್ನಡಿಯಿಂದ ಹಿಂದೆ ಕುಳಿತಿದ್ದ ಮಹಿಳೆಯನ್ನು ಗಮನಿಸಿದ್ದಾನೆ. ನಂತರ ತನ್ನ ಎಡಗೈನಲ್ಲಿ ಮೊಬೈಲ್‌ ಹಿಡಿದುಕೊಂಡು ಮಹಿಳೆಗೆ ಕಾಣುವಂತೆ ಅಶ್ಲೀಲ ವಿಡಿಯೋ ನೋಡುತ್ತಿದ್ದ. ಅಲ್ಲದೆ, ಮಹಿಳೆ ಜತೆ ಅಸಭ್ಯವಾಗಿ ವರ್ತಿಸಿದ್ದಾನೆ.

ಇದರಿಂದ ಆತಂಕಗೊಂಡ ಮಹಿಳೆ ಕ್ಯಾಬ್‌ನ್ನು ನಿಲ್ಲಿಸುವಂತೆ ಸೂಚಿಸಿದ್ದರು. ನಿಮ್ಮ ಲೊಕೇಶನ್‌ ಇನ್ನೂ ದೂರದಲ್ಲಿದೆ ಎಂದ ಆರೋಪಿ ಕಾರನ್ನು ನಿಲ್ಲಿಸದೇ ಜೆ.ಪಿ.ನಗರದಲ್ಲಿ ಸಂತ್ರಸ್ತೆ ಸೂಚಿಸಿದ ವಿಳಾಸದಲ್ಲಿ ಇಳಿಸಿದ್ದಾನೆ. ಇದರಿಂದ ನೊಂದ ಮಹಿಳೆ ಓಲಾ ಕ್ಯಾಬ್‌ ಕಸ್ಟಮರ್‌ ಕೇರ್‌ಗೆ ಕರೆ ಮಾಡಿ ದೂರು ನೀಡಿದ್ದರು. ಆದರೆ, ಚಾಲಕನ ವಿರುದ್ಧ ಸಂಸ್ಥೆ ಯಾವುದೇ ಕ್ರಮಕೈಗೊಂಡಿರಲಿಲ್ಲ.

ಈ ಹಿನ್ನೆಲೆಯಲ್ಲಿ ಆ.25ರಂದು ಸಂತ್ರಸ್ತೆ ದೂರು ನೀಡಿದ್ದರು ಎಂದು ಪೊಲೀಸರು ತಿಳಿಸಿದರು. ಆರೋಪಿ ಜಿತೇಂದ್ರ ಕುಮಾರ್‌ ವಿಚಾರಣೆ ಸಂದರ್ಭದಲ್ಲಿ ವಾಟ್ಸ್‌ಆ್ಯಪ್‌ನಲ್ಲಿ ವಿಡಿಯೋ ಸಂದೇಶ ಬಂದಿದ್ದು, ಅದನ್ನು ನೋಡುವ ಸಲುವಾಗಿ ಮೊಬೈಲ್‌ ವೀಕ್ಷಣೆ ಮಾಡುತ್ತಿದ್ದೆ. ಬೇರೆ ಯಾವುದೇ ಉದ್ದೇಶ ಇಲ್ಲ ಎಂದಿದ್ದಾನೆ ಎಂದು ಪೊಲೀಸರು ತಿಳಿಸಿದರು.