ರಾಮಮಂದಿರ ಪಾಕ್‌ನಲ್ಲಿ ನಿರ್ಮಿಸಲು ಸಾಧ್ಯವೇ?

Team Udayavani, Nov 2, 2018, 11:26 AM IST

ಬೆಂಗಳೂರು: “ರಾಮಮಂದಿರವನ್ನು ಭಾರತದಲ್ಲಿ ಅಲ್ಲದೆ ಪಾಕಿಸ್ತಾನದಲ್ಲಿ ನಿರ್ಮಿ ಸಲು ಸಾಧ್ಯವೇ? ಹಿಂದೂ ಸಹೋ ದರರ ಭಾವನೆಗಳಿಗೆ ಮುಸ್ಲಿಮರು ಯಾವತ್ತೂ ಗೌರವ ಕೊಡುತ್ತಾರೆ.’  ಹೀಗೆಂದು ಹೇಳಿರುವುದು ಕಾಂಗ್ರೆಸ್‌ ಶಾಸಕ, ಮಾಜಿ ಸಚಿವ ರೋಷನ್‌ ಬೇಗ್‌.

ಗುರುವಾರ ಪಿಟಿಐಗೆ ನೀಡಿದ ಸಂದರ್ಶನದಲ್ಲಿ ಅವರು, ಅಯೋಧ್ಯೆಯಲ್ಲಿ ರಾಮಮಂದಿರ ನಿರ್ಮಾಣ ಮಾಡುವ ಕುರಿತು ಈ ರೀತಿ ಪ್ರತಿಕ್ರಿಯಿಸಿದ್ದಾರೆ. ಬಿಜೆಪಿ ಮಾಡಿದ್ದೆಲ್ಲ  ಸಾಕು. ಚುನಾವಣೆಗೆ ಮುನ್ನ ಸಮಾಜವನ್ನು ಧ್ರುವೀಕರಿಸಲು ಯತ್ನಿಸುವುದು ಬೇಡ. ಹಿಂದೂಗಳು ಮತ್ತು ಮುಸ್ಲಿಮರು ಶಾಂತಿಯಿಂದ ಬದುಕಬೇಕು. 

ಸುಖಾಸುಮ್ಮನೇ ಈ ವಿಚಾರವನ್ನು ಎಳೆಯುತ್ತಾ ಸಾಗುವುದೇಕೆ ಎಂದೂ ಕೇಳಿದ್ದಾರೆ ಬೇಗ್‌. ಇದೇ ವೇಳೆ, ರಾಮಮಂದಿರ ವಿಚಾರದಲ್ಲಿ ಸುಗ್ರೀವಾಜ್ಞೆ  ತರಲು ಚಿಂತನೆ ನಡೆಸುತ್ತಿರುವ ಬಿಜೆಪಿ ಬಗ್ಗೆ ಕಿಡಿಕಾರಿದ ಬೇಗ್‌, “ರಾಜಸ್ಥಾನ, ಛತ್ತೀಸ್‌ಗಡ, ಮಧ್ಯಪ್ರದೇಶದಲ್ಲಿ ಚುನಾವಣೆ ಹಾಗೂ ಲೋಕಸಭೆ  ಚುನಾವಣೆ ಸಮೀಪಿಸಿದ ಕಾರಣ ಬಿಜೆಪಿ ಮಂದಿರದ ಬಗ್ಗೆ ಮಾತನಾಡುತ್ತಿದೆ.

ಕೇಂದ್ರದಲ್ಲಿ ಅಧಿಕಾರದಲ್ಲಿರುವ ಬಿಜೆಪಿ ಕಳೆದ ನಾಲ್ಕೂವರೆ ವರ್ಷಗಳಲ್ಲಿ  ಏನು ಮಾಡುತ್ತಿತ್ತು’ ಎಂದು ಪ್ರಶ್ನಿಸಿದ್ದಾರೆ. ವಿವಾದ ಕೋರ್ಟ್ನಲ್ಲಿರುವಾಗ ಅವರು ಸುಗ್ರೀವಾಜ್ಞೆ ಬಗ್ಗೆ ಮಾತನಾಡುತ್ತಾರೆ. ಈಗ ತೈಲ ದರ ಏರಿಕೆ, ನಿರುದ್ಯೋಗ, ಜಿಎಸ್‌ಟಿ ಎಫೆಕ್ಟ್, ನೋಟು ಅಮಾನ್ಯದಿಂದ ಜನರು ಆಕ್ರೋಶ ಗೊಂಡಿದ್ದಾರೆ. ಇಂಥ ಸಮಯದಲ್ಲಿ ಬಿಜೆಪಿ ರಾಮ ಮಂದಿರದ  ವಿಚಾರವನ್ನೆತ್ತಿ ಜನರ ಗಮನ ಬೇರೆಡೆಗೆ ಸೆಳೆಯುತ್ತಿದೆ ಎಂದೂ ರೋಷನ್‌ ಬೇಗ್‌ ಆರೋಪಿಸಿದ್ದಾರೆ.