ಕೊಲೆ ಆರೋಪಿಗಳ ಸೆರೆ

Team Udayavani, Mar 27, 2018, 12:59 PM IST

ಕೆ.ಆರ್‌.ಪುರ: ದ್ವೇಷದ ಹಿನ್ನೆಲೆ ಇತ್ತೀಚೆಗೆ ನಡೆದ ದಿನೇಶ್‌ ಎಂಬಾತನ ಕೊಲೆ ಪ್ರಕರಣದ ನಾಲ್ವರು ಆರೋಪಿಗಳನ್ನು ರಾಮಮೂರ್ತಿನಗರ ಠಾಣೆ ಪೊಲೀಸರು ಬಂಧಿಸಿದ್ದಾರೆ. ರಾಮಮೂರ್ತಿನಗರದ ನಿತಿನ್‌ (21), ಮೈಕಲ್‌ (23), ಅವಿನಾಶ್‌ (24), ಮತ್ತು ಅಬ್ರಾಹಂ (21) ಬಂಧಿತರು. ಆರೋಪಿಗಳು ಮಾ.20ರಂದು ಕಲಬುರಗಿ ಮೂಲದ ದಿನೇಶ್‌ ಎಂಬಾತನನ್ನು ಹಳೇ ದ್ವೇಷದ ಹಿನ್ನೆಲೆಯಲ್ಲಿ ಬರ್ಬರವಾಗಿ ಹತ್ಯೆಗೈದು ಪರಾರಿಯಾಗಿದ್ದರು.

ಪೋಷಕರ ಜತೆ ಕೆಲ ವರ್ಷಗಳ ಹಿಂದೆ ನಗರಕ್ಕೆ ಬಂದಿದ್ದ ದಿನೇಶ್‌ ರಾಮಮೂರ್ತಿನಗರದ ಅಂಚೆ ಕಚೇರಿ ರಸ್ತೆಯ ಬಾಡಿಗೆ
ಮನೆಯಲ್ಲಿ ನೆಲೆಸಿದ್ದ. ದ್ವಿತೀಯ ಪಿಯುಸಿಯಲ್ಲಿ ಅನುತ್ತೀರ್ಣಗೊಂಡ ಈತ ಸಂಜೆ ವೇಳೆ ಸ್ಥಳೀಯ ಯುವಕರ ಜತೆ ಸುತ್ತಾಡುತ್ತಿದ್ದು, ಕೆಲವೊಂದು ಅಪರಾಧ ಕೃತ್ಯಗಳಲ್ಲಿ ಭಾಗಿಯಾಗಿದ್ದ. ಪ್ರಕರಣವೂ ದಾಖಲಾಗಿವೆ ಎಂದು ಪೊಲೀಸರು ತಿಳಿಸಿದ್ದಾರೆ.

ದಿನೇಶ್‌ ಹಾಗೂ ನಾಲ್ವರು ಸ್ನೇಹಿತರು ಎರಡು ವರ್ಷಗಳ ಹಿಂದೆ ದೀಪಕ್‌ ಎಂಬಾತನ ಮೇಲೆ ಹಲ್ಲೆ ನಡೆಸಿದ್ದರು. ಈ ಸಂಬಂಧ ಬಾಣಸವಾಡಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ನಾಪತ್ತೆಯಾಗಿದ್ದ ದಿನೇಶ್‌ನನ್ನು ಇದೇ ಫೆ.27ರಂದು ಬಂಧಿಸಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದರು. ನಂತರ ಜಾಮೀನು ಪಡೆದು ಹೊರ ಬಂದ ದಿನೇಶ್‌ನನ್ನು ಆರೋಪಿಗಳು ಸಂಚು ರೂಪಿಸಿ ಕೊಲೆಗೈದು ಕೋಲಾರದಲ್ಲಿ ತಲೆಮರೆಸಿಕೊಂಡಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.