Bengaluru: ಹೋಟೆಲ್‌ನ ಬಾತ್‌ರೂಮ್‌ನಲ್ಲಿ ಕಾರ್ಪೆಂಟರ್ ನೇಣಿಗೆ ಶರಣು

Team Udayavani, Nov 25, 2024, 10:21 AM IST

ಬೆಂಗಳೂರು: ಮರಕೆಲಸಕ್ಕೆಂದು ಉಡುಪಿಯಿಂದ ಬೆಂಗಳೂರಿಗೆ ಬಂದಿದ್ದ ವ್ಯಕ್ತಿಯೊಬ್ಬರು ಖಾಸಗಿ ಹೋಟೆಲ್‌ನ ಬಾತ್‌ರೂಮ್‌ನಲ್ಲಿ ನೇಣುಬಿಗಿದು ಕೊಂಡು ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ಕೋರಮಂಗಲ ಠಾಣೆ ವ್ಯಾಪ್ತಿಯಲ್ಲಿ ನಡೆದಿದೆ.

ಉಡುಪಿಯ ಮುಲ್ಕಿಯ ಜಯ ರಾಮ್‌ (40) ಆತ್ಮಹತ್ಯೆ ಮಾಡಿಕೊಂಡವರು. ಶನಿವಾರ ತಡರಾತ್ರಿ ಕೋರಮಂಗಲದ ಖಾಸಗಿ ಹೋಟೆಲ್‌ ನಲ್ಲಿ ಘಟನೆ ನಡೆದಿದ್ದು, ಭಾನುವಾರ ಮುಂಜಾನೆ ಸಹೋದರ ವಾಸುದೇವ್‌ ಎಚ್ಚರಗೊಂಡು ನೋಡಿದಾಗ ಘಟನೆ ಬೆಳಕಿಗೆ ಬಂದಿದೆ ಎಂದು ಪೊಲೀಸರು ಹೇಳಿದರು.

ಜಯರಾಮ್‌ ವಿಪರೀತ ಮದ್ಯ ವ್ಯಸನಿಯಾಗಿದ್ದು, ಇತ್ತೀಚೆಗೆ ಅವರ ಚಿಕ್ಕಮ್ಮ ವಯೋಸಹಜ ಕಾಯಿಲೆಯಿಂದ ಮೃತಪಟ್ಟಿದ್ದರು. ಅದರಿಂದ ಜಯರಾಮ್‌ ಬಹಳ ಬೇಸರಗೊಂಡಿದ್ದರು. ಜತೆಗೆ ಕುಟುಂಬ ಸದಸ್ಯರು ಜಯರಾಮ್‌ಗೆ ಮದ್ಯ ಸೇವನೆ ಚಟ ಬಿಡಿಸಿದ್ದರು. ಈ ಮಧ್ಯೆ ಜಯರಾಮ್‌ ಸಹೋದರ ವಾಸುದೇವ್‌ ಹಾಗೂ ಇತರೆ ಇಬ್ಬರ ಜತೆ ಕೋರಮಂಗಲದ ಸಮೀಪದ ಹೋಟೆಲ್‌ ವೊಂದರ ಮರಕೆಲಸ ಮಾಡಲು ಶುಕ್ರವಾರ ಉಡುಪಿಯಿಂದ ಬೆಂಗಳೂರಿಗೆ ಬಂದಿದ್ದರು. ಕೋರಮಂಗಲದ ಖಾಸಗಿ ಹೋಟೆಲ್‌ ನಲ್ಲಿ ತಂಗಿದ್ದರು. ಶನಿವಾರ ರಾತ್ರಿ ಎಲ್ಲರೂ ಊಟ ಮಾಡಿ ಮಲಗಿದ್ದಾರೆ. ಈ ವೇಳೆ ಜಯ ರಾಮ್‌ ಬಾತ್‌ರೂಮ್‌ಗೆ ಹೋಗಿ, ನಲ್ಲಿ ನೀರು ಆನ್‌ ಮಾಡಿ ಕಿಟಕಿಯ ಗ್ರೀಲ್‌ಗೆ ನೇಣುಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಮುಂಜಾನೆ ಸಹೋದರ ವಾಸುದೇವ್‌, ಬಾತ್‌ರೂಮ್‌ ಬಾಗಿಲು ಒಡಿದರೂ ಪ್ರತಿಕ್ರಿಯೆ ಬಂದಿಲ್ಲ. ಬಳಿಕ ಬಾಗಿಲು ಒಡೆದು ನೋಡಿದಾಗ ಆತ್ಮಹತ್ಯೆ ಮಾಡಿಕೊಂಡಿರುವುದು ಗೊತ್ತಾಗಿದೆ. ವಿಷಯ ತಿಳಿದು ಸ್ಥಳಕ್ಕೆ ತೆರಳಿದ ಪೊಲೀಸರು, ಮೃತದೇಹವನ್ನು ಮರಣೋತ್ತರ ಪರೀಕ್ಷೆ ನಡೆಸಿ ಕುಟುಂಬ ಸದಸ್ಯರಿಗೆ ಹಸ್ತಾಂತರಿಸಿದ್ದಾರೆ. ಈ ಸಂಬಂಧ ಕೋರಮಂಗಲ ಠಾಣೆಯಲ್ಲಿ ಅಸಹಜ ಸಾವು ಪ್ರಕರಣ ದಾಖಲಾಗಿದೆ ಎಂದು ಪೊಲೀಸರು ಮಾಹಿತಿ ನೀಡಿದರು.