ಗೀತಾವಿಷ್ಣುಗೆ ಸಿಸಿಬಿ ಡ್ರಿಲ್‌!

Team Udayavani, Oct 6, 2017, 11:45 AM IST

ಬೆಂಗಳೂರು: ಅಪಘಾತ ಹಾಗೂ ಮಾದಕವಸ್ತು ಹೊಂದಿದ್ದ ಪ್ರಕರಣದ ಆರೋಪಿ ಉದ್ಯಮಿ ಆದಿಕೇಶವಲು ಮೊಮ್ಮಗ ಗೀತಾ ವಿಷ್ಣುವನ್ನು ಗುರುವಾರ ಪೊಲೀಸರು ಹಲವು ಗಂಟೆಗಳ ಕಾಲ ತೀವ್ರವಿಚಾರಣೆ ನಡೆಸಿ ಹೇಳಿಕೆ ದಾಖಲಿಸಿಕೊಂಡಿದ್ದಾರೆ.

ಸಿಸಿಬಿ ಕೇಂದ್ರಕಚೇರಿಯಲ್ಲಿ ನಡೆದ ವಿಚಾರಣೆಯಲ್ಲಿ ಆರೋಪಿ ವಿಷ್ಣುವನ್ನು, ಅಪಘಾತವಾದ ಕಾರಿನಲ್ಲಿ ಹೊಂದಿದ್ದ 110 ಗ್ರಾಂ ಮಾದಕವಸ್ತುವನ್ನೇ ಪ್ರಮುಖವಾಗಿಟ್ಟುಕೊಂಡು ತನಿಖಾಧಿಕಾರಿಗಳು ವಿಚಾರಣೆ ನಡೆಸಿದ್ದಾರೆ. ಮಾದಕವಸ್ತು ಹೇಗೆ ಸಿಕ್ಕಿತ್ತು ಬೇರೆ ರಾಜ್ಯಗಳ ಜೊತೆ  ನಂಟಿದಿಯೇ? ಎಂಬಿತಾದಿ ಪ್ರಶ್ನೆಗಳನ್ನು ಕೇಳಿದ್ದಾರೆ.

ತನಿಖಾಧಿಕಾರಿಗಳ ಪ್ರಶ್ನೆಗಳಿಗೆ ನಿಖರ ಉತ್ತರ ನೀಡದ ಆರೋಪಿ ವಿಷ್ಣು, ತನ್ನ ಕಾರಿನಲ್ಲಿ ಮಾದಕವಸ್ತು ಇಟ್ಟುಕೊಂಡಿರಲಿಲ್ಲ. ಅಪಘಾತದ ಬಳಿಕ ಬೇರೆ ಯಾರೋ ತಂದಿಟ್ಟಿದ್ದಾರೆ ಎಂದು ಸಮರ್ಥಿಸಿಕೊಂಡಿದ್ದು, ತಮಗೂ ಮಾದಕ ವಸ್ತು ಮಾರಾಟ ಜಾಲಕ್ಕೂ ಸಂಬಂಧವಿಲ್ಲ ಎಂದು ನುಣುಚಿಕೊಳ್ಳಲು,ಯತ್ನಿಸುತ್ತಿದ್ದಾನೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಕೆಲವು ಮಾಹಿತಿಯನ್ನು ಪಡೆದುಕೊಳ್ಳಲಾಗಿದ್ದು, ಅಗತ್ಯವಿದ್ದರೆ ಪುನಃ ಕರೆಸಿ ವಿಚಾರಣೆ ನಡೆಸಲಾಗುತ್ತದೆ ಎಂದು ಹಿರಿಯ ಪೊಲೀಸ್‌ ಅಧಿಕಾರಿಯೊಬ್ಬರು ತಿಳಿಸಿದರು.