CCB Raids: ಸಿಲಿಂಡರ್‌ ರಿಫಿಲ್ಲಿಂಗ್‌, ಇಸ್ಪೀಟ್‌ ಅಡ್ಡೆ ಮೇಲೆ ದಾಳಿ: ಲಕ್ಷಾಂತರ ರೂ. ವಶ

Team Udayavani, Dec 14, 2023, 10:10 AM IST

ಬೆಂಗಳೂರು: ಕೇಂದ್ರ ಅಪರಾಧ ವಿಭಾಗ (ಸಿಸಿಬಿ) ಪೊಲೀಸರು ಅಕ್ರಮ ಸಿಲಿಂಡರ್‌ ರಿಫಿಲ್ಲಿಂಗ್‌, ಇಸ್ಪೀಟ್‌ ಅಡ್ಡೆಗಳ ಮೇಲೆ ದಾಳಿ ನಡೆಸಿ, ಲಕ್ಷಾಂತರ ರೂ. ನಗದು, ಸಿಲಿಂಡರ್‌ಗಳನ್ನು ವಶಕ್ಕೆ ಪಡೆದುಕೊಂಡಿದ್ದಾರೆ.

ಗೃಹ ಬಳಕೆ ಸಿಲಿಂಡರ್‌ಗಳನ್ನು ಅಕ್ರಮವಾಗಿ ರಿಫಿಲ್ಲಿಂಗ್‌ ಮಾಡಿ ಮಾರಾಟ ಮಾಡುತ್ತಿದ್ದ ಕೋರಮಂಗಲದಲ್ಲಿರುವ ಶರಬೀಶ್‌ ಎಂಟರ್‌ ಪ್ರೈಸಸ್‌ ಮೇಲೆ ಪೊಲೀಸರು ದಾಳಿ ನಡೆಸಿ, ಹರೀಶ್‌ ಎಂಬಾತನನ್ನು ಬಂಧಿಸಲಾಗಿದೆ. ಆರೋಪಿಯಿಂದ 14 ಲಕ್ಷ ರೂ.ನ ವಿವಿಧ ಕಂಪನಿಯ 135 ಅಡುಗೆ ಸಿಲಿಂಡರ್‌ಗಳು, ಎರಡು ರೀಫಿಲ್ಲಿಂಗ್‌ ರಾಡ್‌ಗಳು, ಒಂದು ತೂಕದ ಯಂತ್ರ, ಈಚರ್‌ ವಾಹನ ವಶಕ್ಕೆ ಪಡೆಯಲಾಗಿದೆ.

ಕ್ಲಬ್‌ಗಳ ಮೇಲೆ ದಾಳಿ: ಇನ್ನೊಂದು ಪ್ರಕರಣದಲ್ಲಿ ಜೂಜಾಟ ನಡೆಯುತ್ತಿದ್ದ ನಗರದ 2 ಕ್ಲಬ್‌ಗಳ ಮೇಲೆ ಸಿಸಿಬಿ ದಾಳಿ ನಡೆಸಿ 70 ಮಂದಿಯನ್ನು ಬಂಧಿಸಿ, ಲಕ್ಷಾಂತರ ರೂ. ನಗದು ವಶಕ್ಕೆ ಪಡೆದುಕೊಂಡಿದೆ. ಕೋಣನಕುಂಟೆ ಠಾಣಾ ವ್ಯಾಪ್ತಿಯ ಕಲ್ಚರಲ್‌ ಅಸೋಸಿಯೇಷನ್‌ ಕ್ಲಬ್‌ ಮೇಲೆ ಸಿಸಿಬಿ ಪೊಲೀಸರು ದಾಳಿ ನಡೆಸಿ, 26 ಮಂದಿಯನ್ನು ಬಂಧಿಸಿದ್ದಾರೆ.

ಆರೋಪಿಗಳ ಬಳಿಯಿದ್ದ 1 ಲಕ್ಷ ರೂ. ನಗದು ಜಪ್ತಿ ಮಾಡಿಕೊಳ್ಳಲಾಗಿದೆ. ಪುಲಕೇಶಿನಗರ ಪೊಲೀಸ್‌ ಠಾಣೆ ವ್ಯಾಪ್ತಿಯ ಯಂಗ್‌ ಮ್ಯಾನ್‌ ಇಂಡಿಯನ್‌ ಅಸೋಸಿಯೇಷನ್‌ ಆವರಣದಲ್ಲಿರುವ ಇಂಡಿಯನ್‌ ಪೋರ್ಕ್‌ ಅಸೋಸಿಯೇಷನ್‌ ಮೇಲೆ ದಾಳಿ ನಡೆಸಿ, 46 ಆರೋಪಿಗಳನ್ನು ಬಂಧಿಸಿ 2.29 ಲಕ್ಷ ರೂ. ನಗದು ಜಪ್ತಿ ಮಾಡಿಕೊಳ್ಳಲಾಗಿದೆ ಎಂದು ಸಿಸಿಬಿ ಪೊಲೀಸರು ಹೇಳಿದರು.