Chamarajpete: ಕೆಚ್ಚಲು ಕೊಯ್ದ ಕೇಸ್‌; 3 ಲಕ್ಷ ರೂ.ಮೌಲ್ಯದ 3 ಹಸು ಕೊಡಿಸಿದ ಸಚಿವ ಜಮೀರ್‌

Team Udayavani, Jan 16, 2025, 12:56 AM IST

ಬೆಂಗಳೂರು: ಚಾಮರಾಜಪೇಟೆಯ ವಿನಾಯಕ ನಗರದಲ್ಲಿ ಹಸುವಿನ ಕೆಚ್ಚಲು ಕೊಯ್ದ ಅಮಾನವೀಯ ಘಟನೆಗೆ ವ್ಯಾಪಕ ಖಂಡನೆ ವ್ಯಕ್ತವಾದ ಬೆನ್ನಲ್ಲೇ ಇದೀಗ ಸ್ಥಳೀಯ ಶಾಸಕ ಹಾಗೂ ವಸತಿ ಸಚಿವ ಜಮೀರ್‌ ಅಹಮದ್‌ ಖಾನ್‌ ಅವರು ಹಸುವಿನ ಮಾಲಕ ಕರ್ಣ ಕುಟುಂಬದವರಿಗೆ ತಲಾ 1 ಲಕ್ಷ ರೂ. ಬೆಲೆಬಾಳುವ 3 ಹಸುಗಳನ್ನು ಕೊಡಿಸಿದ್ದಾರೆ.

ಕರ್ಣ ಅವರು ಆರಂಭದಲ್ಲಿ ಹಸುಗಳನ್ನು ಪಡೆಯಲು ಒಪ್ಪಿಕೊಂಡು ಅನಂತರ ನಿರಾಕರಿಸಿದ್ದರು. ಆದರೆ ಅವರ ತಾಯಿ ಸವರಿ ಅಮ್ಮಳ್‌, ಸಹೋದರಿ ಅಮುದಾ ಹಸುಗಳನ್ನು ಪಡೆಯಲು ಒಪ್ಪಿದ್ದರಿಂದ 3 ಲಕ್ಷ ರೂ. ಬೆಲೆಬಾಳುವ 3 ಹಸುಗಳನ್ನು ಖರೀದಿಸಿ ಬುಧವಾರ ಸಚಿವ ಜಮೀರ್‌ ಹಸ್ತಾಂತರಿಸಿದರು.

ಹಸುವಿನ ಕೆಚ್ಚಲು ಕೊಯ್ದು ಕೌರ್ಯ ಮೆರೆದಿದ್ದ ಪ್ರಕರಣ ರಾಜಕೀಯ ಸ್ವರೂಪ ಪಡೆದು ರಾಜ್ಯವ್ಯಾಪಿ ಕೋಲಾಹಲಕ್ಕೆ ಕಾರಣವಾಗಿತ್ತು. ಸಚಿವ ಜಮೀರ್‌ ಖಾನ್‌ ಸ್ವಂತ ಖರ್ಚಿನಲ್ಲಿ ಹಸುಗಳನ್ನು ಕೊಡಿಸುವುದಾಗಿ ಭರವಸೆ ನೀಡಿದ್ದರು. ಇದೀಗ ಕೊಟ್ಟ ಮಾತಿನಂತೆ ನಡೆದುಕೊಂಡಿದ್ದಾರೆ.

ಈ ವೇಳೆ ಅಮುದಾ ಮಾತನಾಡಿ, ಹಸು ನಿರಾಕರಿಸಿದ ನನ್ನ ಸಹೋದರನ ಪರವಾಗಿ ನಾನು ಕ್ಷಮೆ ಕೋರುತ್ತೇನೆ. ಜಮೀರಣ್ಣ ಅವರು ಒಳ್ಳೆಯ ಮನಸ್ಸಿನಿಂದ ಹಸು ಕೊಡಿಸಿದ್ದಾರೆ. ಕೆಲವರು ಇದರಲ್ಲಿ ರಾಜಕಾರಣ ಮಾಡುತ್ತಿದ್ದು, ನಾವು ಶಾಸಕರ ಜತೆ ಇದ್ದೇವೆ ಎಂದು ಹೇಳಿದರು.

pic.twitter.com/zzkcQX8dOe

— B Z Zameer Ahmed Khan (@BZZameerAhmedK) January 15, 2025