ಚಂದ್ರಶೇಖರ್‌ ರಾಜಕಾರಣದಲ್ಲಿ ಮುಂದೆ ಬರಲು ಸಾಧ್ಯವಿಲ್ಲ: ಡಿವಿಎಸ್‌

Team Udayavani, Nov 2, 2018, 6:00 AM IST

ಬೆಂಗಳೂರು: ಬಿಜೆಪಿಯ ತತ್ವಾದರ್ಶ, ನರೇಂದ್ರ ಮೋದಿಯವರನ್ನು ಒಪ್ಪಿ ಪಕ್ಷ ಸೇರಿದ್ದ ಚಂದ್ರಶೇಖರ್‌ ಯಾವುದೋ ಸಣ್ಣ ಪುಟ್ಟ ಆಸೆ, ಆಕಾಂಕ್ಷೆಗಳಿಗೆ ಬಲಿಯಾಗಿ ದ್ರೋಹ ಮಾಡಿದ್ದು, ಇಂತಹ ದ್ರೋಹಿ ಖಂಡಿತವಾಗಿಯೂ ರಾಜಕಾರಣದಲ್ಲಿ ಮುಂದೆ ಬರಲು ಸಾಧ್ಯವಿಲ್ಲ ಎಂದು ಕೇಂದ್ರ ಸಚಿವ ಡಿ.ವಿ.ಸದಾನಂದಗೌಡ ಆಕ್ರೋಶ ವ್ಯಕ್ತಪಡಿಸಿದರು. ಸುದ್ದಿಗಾರರ ಜೊತೆ ಮಾತನಾಡಿ, ಪಕ್ಷ ಸಂಘಟನೆಯಾಗುವ ಸಂದರ್ಭದಲ್ಲಿ ಹಲವಾರು ಜನರು ಪಕ್ಷ ಸೇರುತ್ತಾರೆ. ಯೋಗೇಶ್ವರ್‌ ಕಳೆದ ಚುನಾವಣೆಯಲ್ಲಿ ಹಲವಾರು ಜನರನ್ನು ಪಕ್ಷಕ್ಕೆ ಕರೆದುಕೊಂಡು ಬಂದಿದ್ದರು. ಅದೇ ರೀತಿ, ಕಾಂಗ್ರೆಸ್‌ ಬಗ್ಗೆ ಅತೃಪ್ತಿಯಿದ್ದ ಚಂದ್ರಶೇಖರ್‌ ಅವರನ್ನು ಪಕ್ಷಕ್ಕೆ ಕರೆದುಕೊಂಡು ಬಂದು ಸಂಪೂರ್ಣ ಜವಾಬ್ದಾರಿಯನ್ನು ಅವರೇ ವಹಿಸಿಕೊಂಡಿದ್ದರು. ಆದರೆ, ಆತ ಎಲ್ಲರಿಗೂ ದ್ರೋಹ ಮಾಡಿದ್ದು ತುಂಬಾ ನೋವು ಹಾಗೂ ಬೇಸರವಾಗಿದೆ ಎಂದು ಹೇಳಿದರು.

ಬಿಜೆಪಿ ರಾಮನಗರ ಭಾಗದಲ್ಲಿ ಬೆಳವಣಿಗೆಯಾಗಬೇಕೆಂಬ ಉದ್ದೇಶದಿಂದ ಚಂದ್ರಶೇಖರ್‌ ಅಭ್ಯರ್ಥಿಯಾಗುತ್ತೇನೆಂದು ಕೇಳಿದಾಗ ನಾವು ಸಹಮತ ನೀಡಿ ಅಭ್ಯರ್ಥಿಯನ್ನಾಗಿಸಿದ್ದೇವು. ಆದರೆ, ಅವರ ಕಾಂಗ್ರೆಸ್‌ ಬುದ್ದಿ ಬಿಟ್ಟು ಅವರು ಬಿಜೆಪಿಗೆ ಬಂದಿರಲಿಲ್ಲ. ಅವರ ರಕ್ತದಲ್ಲಿದ್ದ ಕಾಂಗ್ರೆಸ್‌ ವಿದ್ರೋಹಿ ಘಟನೆಗಳು ಅವರ ಮನಸ್ಸಿನಲ್ಲಿಯೇ ಉಳಿದಿತ್ತು. ಹೀಗಾಗಿ ಅವರು ನಮಗೆ ಕೈಕೊಟ್ಟಿದ್ದು, ಇಂತಹ ದ್ರೋಹಿಗೆ ದೇವರೇ ಬುದ್ದಿ ಕಲಿಸುತ್ತಾನೆ ಎಂದು ಹೇಳಿದರು.