ಚಂದ್ರಶೇಖರ ಸ್ವಾಮೀಜಿ ಹುಟ್ಟುಹಬ್ಬ ಇಂದು

Team Udayavani, Oct 25, 2017, 12:58 PM IST

ಬೆಂಗಳೂರು: ಅಂತಾರಾಷ್ಟ್ರೀಯ ವಾಸ್ತು ತಜ್ಞ, ವೈಜ್ಞಾನಿಕ ಜ್ಯೋತಿಷಿ, ಆಧ್ಯಾತ್ಮಿಕ ವಿಶ್ವಗುರು ಶ್ರೀ ಚಂದ್ರಶೇಖರ ಸ್ವಾಮೀಜಿಯವರ ಹುಟ್ಟುಹಬ್ಬವನ್ನು ಬುಧವಾರ (ಅ.25) ಸರಳವಾಗಿ ಆಚರಿಸಲು ಆಶ್ರಮದ ಪ್ರತಿನಿಧಿಗಳು ನಿರ್ಧರಿಸಿದ್ದಾರೆ. 

ಸ್ವಾಮೀಜಿಯವರು ಬೆಂಗಳೂರಿನ ಆರ್‌.ಟಿ. ನಗರ ಹಾಗೂ ಹುಟ್ಟೂರು ಮೂಲ್ಕಿಯ ಸೇವಾಶ್ರಮದಲ್ಲಿ ಧಾರ್ಮಿಕ ಮತ್ತು ಸಾಮಾಜಿಕ ಕಾರ್ಯಕ್ರಮಗಳಿಗೆ ಚಾಲನೆ ನೀಡಿದ ನಂತರ ತಮ್ಮ ಧರ್ಮಪತ್ನಿ ಹಾಗೂ ಆಶ್ರಮದ ಸಂಚಾಲಕ ರಜನಿ ಸಿ. ಭಟ್‌ ಅವರೊಂದಿಗೆ ತಿರುಪತಿ ಕ್ಷೇತ್ರಕ್ಕೆ ಭೇಟಿ ನೀಡಿ ವಿಶೇಷ ಪೂಜೆ ಸಲ್ಲಿಸಲಿದ್ದಾರೆ.

ಲಂಡನ್‌ ಸಮಾವೇಶ: ಲಂಡನ್‌ನಲ್ಲಿ ನಡೆಯಲಿರುವ ಜ್ಯೋತಿಷ್ಯ ಹಾಗೂ ವಾಸ್ತು ತಜ್ಞರ ವಿಶೇಷ ಸಮಾವೇಶವನ್ನು ಸ್ವಾಮೀಜಿಯವರು ಉದ್ಘಾಟಿಸಲಿದ್ದು ಸಮಾವೇಶದ ಏಕೈಕ ಪ್ರತಿನಿ ಧಿಯಾಗಿ ಹಾಗೂ ಭಾರತೀಯ ವೈಜ್ಞಾನಿಕ ವಾಸ್ತುತಜ್ಞರಾಗಿ ನಿಯುಕ್ತಿಗೊಂಡಿರುವುದು ವಿಶೇಷ ಎನಿಸಿದೆ. ಅಲ್ಲದೆ, ಲಂಡನ್‌ನಲ್ಲಿ ನಿರ್ಮಾಣಗೊಳ್ಳಲಿರುವ ಧನ್ವಂತರಿ ದೇವಳದ ರೂಪರೇಷೆಯನ್ನು ಸಿದ್ಧಗೊಳಿಸುವ ಕಾರ್ಯಕ್ರಮದಲ್ಲೂ ಸಹ ಭಾಗವಹಿಸಿ ಮಾರ್ಗದರ್ಶನ ನೀಡಲಿದ್ದಾರೆ.

ಬೆಂಗಳೂರು ಹಾಗೂ ಮೂಲ್ಕಿಯ ವಿವಿಧ ಅನಾಥಾಶ್ರಮಗಳಿೆ ಊಟೋಪಚಾರ, ಹಣ್ಣು ಹಂಪಲು ವಿತರಣೆ, ವಸ್ತ್ರ ವಿತರಣೆ ಹಾಗೂ ಇನ್ನಿತರ ಸಾಮಾಜಿಕ ಸೇವಾ ಕಾರ್ಯಕ್ರಮಗಳು ಸೇವಾಶ್ರಮದ ವತಿಯಿಂದ ಹಮ್ಮಿಕೊಳ್ಳುವುದಾಗಿ ಆಶ್ರಮದ ಪ್ರಕಟನೆ ತಿಳಿಸಿದೆ.