ಡೇಟಿಂಗ್‌ ಆ್ಯಪ್‌ನಲ್ಲಿ ಯುವತಿಗೆ ವಂಚನೆ

Team Udayavani, Jun 11, 2023, 12:38 PM IST

ಬೆಂಗಳೂರು: ಡೇಟಿಂಗ್‌ ಆ್ಯಪ್‌ನಲ್ಲಿ ಹೆಸರು ಬದಲಿಸಿಕೊಂಡು ನಕಲಿ ಪ್ರೊಫೈಲ್‌ ಸೃಷ್ಟಿಸಿ ಮಹಿಳಾ ಟೆಕಿಗೆ ವಂಚಿಸಿದ ಜಮ್ಮು-ಕಾಶ್ಮೀರ ಮೂಲದ ಆರೋಪಿಯನ್ನು ಅಮೃತಹಳ್ಳಿ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ಬಾಗಲೂರು ನಿವಾಸಿ ಮುದಾಸಿರ್‌ (41) ಬಂಧಿತ. 33 ವರ್ಷದ ಮಹಿಳಾ ಟೆಕಿಗೆ ಆರೋಪಿ ವಂಚಿಸಿದ್ದು, ಆಕೆ ನೀಡಿದ ದೂರಿನ ಮೇರೆಗೆ ಆರೋಪಿಯನ್ನು ಬಂಧಿಸಲಾಗಿದೆ.

ಜಮ್ಮು-ಕಾಶ್ಮೀರ ಮೂಲದ ಆರೋಪಿ ಮುದಾಸಿರ್‌ಗೆ ಈಗಾಗಲೇ ಮದುವೆಯಾಗಿದ್ದು, ಇಬ್ಬರು ಮಕ್ಕಳು ಇದ್ದಾರೆ. ಎಂಬಿಎ ಪದವೀಧರನಾಗಿದ್ದು ರಿಯಲ್‌ ಎಸ್ಟೇಟ್‌ ಕಂಪನಿಯಲ್ಲಿ ಕೆಲಸ ಮಾಡಿಕೊಂಡಿದ್ದಾನೆ. ಈ ನಡುವೆ ಬಂಬಲ್‌ ಎಂಬ ಡೇಟಿಂಗ್‌ ಆ್ಯಪ್‌ನಲ್ಲಿ ನಕಲಿ ಪ್ರೊಫೈಲ್‌ ಸೃಷ್ಟಿಸಿ, ಯುವತಿಯರಿಗಾಗಿ ಶೋಧಿಸುತ್ತಿದ್ದ. ಇದೇ ವೇಳೆ ಅದೇ ಆ್ಯಪ್‌ನಲ್ಲಿದ್ದ ಯುವತಿ, ಮದುವೆಗಾಗಿ ಸಂಗಾತಿ ಹುಡುಕಾಡುತ್ತಿದ್ದರು. ಆಗ ಆರೋಪಿ ಆಕೆ ಜತೆ ಚಾಟಿಂಗ್‌ ಆರಂಭಿಸಿದ್ದು, ತನ್ನನ್ನು ಅನಿರುದ್ಧ/ ಅಭಿಷೇಕ್‌ ಎಂದು ಪರಿಚಯಿಸಿಕೊಂಡಿದ್ದಾನೆ. ಅಲ್ಲದೆ, ಲಕ್ಷಾಂತರ ರೂ. ವೇತನದ ಕೆಲಸ ಮಾಡುತ್ತಿದ್ದೇನೆ ಎಂದು ಹೇಳಿಕೊಂಡಿದ್ದಾನೆ.

ಹೀಗಾಗಿ ಆಕೆ ಕೂಡ ಆತನೊಂದಿಗೆ ಸಂಪರ್ಕ ಮುಂದುವರಿಸಿದ್ದರು. ಬಳಿಕ ಇಬ್ಬರು ಪರಸ್ಪರ ವಾಟ್ಸ್‌ಆ್ಯಪ್‌ ಮತ್ತು ಕರೆಗಳು ಹಾಗೂ ವಿಡಿಯೋ ಕರೆಗಳನ್ನು ಮಾಡುತ್ತ ಆತ್ಮೀಯರಾಗಿದ್ದರು. ಈ ನಡುವೆ ಒಮ್ಮೆ ಯುವತಿಯನ್ನು ಭೇಟಿಯಾದ ಆರೋಪಿ, ಮದುವೆ ಆಗುವುದಾಗಿ ನಂಬಿಸಿ ಆಕೆ ಜತೆ ದೈಹಿಕ ಸಂಪರ್ಕ ಬೆಳೆಸಿದ್ದಾನೆ. ಅಲ್ಲದೆ, ಕೆಲ ದಿನಗಳ ಬಳಿಕ ತನ್ನ ತಾಯಿಗೆ ಅನಾರೋಗ್ಯವಾಗಿದೆ ಎಂದು ಒಂದು ಲಕ್ಷ ರೂ. ಪಡೆದುಕೊಂಡಿದ್ದ. ಆ ನಂತರ ತಾಯಿ ಮೃತಪಟ್ಟಿದ್ದಾರೆ ಎಂದು ಮತ್ತೆ ಸುಳ್ಳು ಹೇಳಿ, ಆಗಲು ಒಂದಷ್ಟು ಹಣ ಪಡೆದುಕೊಂಡಿದ್ದಾನೆ ಎಂದು ಪೊಲೀಸರು ಹೇಳಿದರು.

ದುಬೈಗೆ ಹೋಗುವುದಾಗಿ ಹೇಳಿದ್ದ!: ಕೆಲ ತಿಂಗಳ ಹಿಂದೆ ಆರೋಪಿ ಕರೆ ಮಾಡಿ, ತನ್ನ ಸಹೋದರ ದುಬೈನಲ್ಲಿದ್ದಾನೆ. ಆತನ ಭೇಟಿಗೆ ಹೋಗುತ್ತಿದ್ದೇನೆ ಎಂದು ಹೇಳಿದ್ದಾನೆ. ಆ ಬಳಿಕ ಆತನ ಮೊಬೈಲ್‌ ಸ್ವಿಚ್ಡ್ ಆಫ್ ಆಗಿದೆ. ಅದರಿಂದ ಅನುಮಾನಗೊಂಡ ಯುವತಿ, ಆತನ ಪ್ರೊಫೈಲ್‌ ಪರಿಶೀಲಿಸಿದಾಗ, ಆತ ಅನ್ಯ ಕೋಮಿನ ಯುವಕ ಎಂಬುದು ಗೊತ್ತಾಗಿದೆ. ಅಲ್ಲದೆ, ಯುವತಿಯರಿಗೆ ವಂಚಿಸುವುದೇ ಈತನ ಕಾಯಕವಾಗಿದೆ ಎಂಬುದು ತಿಳಿದು, ಕೂಡಲೇ ಪೊಲೀಸ್‌ ಠಾಣೆಗೆ ದೂರು ನೀಡಿದ್ದಾರೆ. ‌

ಈ ಸಂಬಂಧ ಮೊಬೈಲ್‌ ನೆಟ್‌ವರ್ಕ್‌ ಹಾಗೂ ಇತರೆ ತಾಂತ್ರಿಕ ತನಿಖೆ ಮೂಲಕ ಆರೋಪಿಯನ್ನು ಬಂಧಿಸಲಾಗಿದೆ ಎಂದು ಪೊಲೀಸರು ಹೇಳಿದರು. ಅಮೃತಹಳ್ಳಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.