Missing Case: ನಾಪತ್ತೆ ಆದ 1,578 ಮಕ್ಕಳು ಇನ್ನೂ ನಿಗೂಢ!

Team Udayavani, Aug 15, 2023, 3:50 PM IST

ಬೆಂಗಳೂರು: ರಾಜ್ಯದಲ್ಲಿ ಕಳೆದ ಐದು ವರ್ಷಗಳಲ್ಲಿ ನಾಪತ್ತೆಯಾಗಿರುವ 1,578 ಮಕ್ಕಳು ನಿಗೂಢ ವಾಗಿದ್ದು, ಇವರ ಸಣ್ಣ ಸುಳಿವೂ ಸಿಗದ ಕಾರಣ ಪತ್ತೆ ಕಾರ್ಯ ಸವಾಲಾಗಿದೆ. ಆದಕ್ಕಾಗಿ ಇದೀಗ ರಾಜ್ಯ ಪೊಲೀ ಸರು ಅಪರಿಚಿತ ಶವಗಳೊಂದಿಗೆ ತಾಳೆ ಮಾಡಲು ಮುಂದಾಗಿದ್ದಾರೆ.

ಕರ್ನಾಟಕದಲ್ಲಿ ಪ್ರತಿ ವರ್ಷ ನಾಪತ್ತೆ ಆಗುವ ಮಕ್ಕಳ ಸಂಖ್ಯೆ ದುಪ್ಪಟ್ಟಾಗುತ್ತಿರುವುದು ಪಾಲಕರನ್ನು ಆತಂಕ ಕ್ಕೀಡು ಮಾಡಿದೆ. 2018ರಿಂದ 2023ರ(ಜುಲೈ)ವರೆಗೆ ಕಾಣೆಯಾಗಿರುವ 10,687 ಅಪ್ರಾಪ್ತರ ಪೈಕಿ 9,109 ಮಕ್ಕಳು ಪತ್ತೆಯಾಗಿದ್ದಾರೆ. ಬಾಕಿ ಉಳಿದ 1,578 ಮಕ್ಕಳು ಏನಾಗಿದ್ದಾರೆ ಎಂಬುದು ಪ್ರಶ್ನೆ ಯಾಗಿಯೇ ಉಳಿದಿದೆ. ಇದನ್ನು ಗಂಭೀರವಾಗಿ ಪರಿ ಗಣಿಸಿರುವ ರಾಜ್ಯ ಪೊಲೀಸ್‌ ಇಲಾಖೆಯು ಅಪರಿ ಚಿತ ಶವಗಳೊಂದಿಗೆ ನಾಪತ್ತೆಯಾದ ಮಕ್ಕಳನ್ನು ತಾಳೆ ಮಾಡಿ ಆ್ಯಂಟಿ ಹ್ಯೂಮನ್‌ ಟ್ರಾಫಿಕಿಂಗ್‌ ಯೂನಿಟ್‌ (ಎಎಚ್‌ಟಿಯು) ಮೂಲಕ ವಿಶೇಷ ಕಾರ್ಯಾಚರಣೆ ಕೈಗೊಂಡು ಪತ್ತೆ ಕಾರ್ಯ ಚುರುಕುಗೊಳಿಸಿದೆ.

ಮಕ್ಕಳು ನಾಪತ್ತೆಯಾಗುವುದು ಏಕೆ?: ನಿಗೂಢ ವಾಗಿ ರುವ 1,578 ಮಕ್ಕಳಲ್ಲಿ 1,195 ಹೆಣ್ಣು ಮಕ್ಕಳಿದ್ದರೆ, 383 ಬಾಲಕರಿದ್ದಾರೆ. ಪಾಲಕರು ಪೊಲೀಸ್‌ ಠಾಣೆಗೆ ಅಲೆದು ಬಳಲಿ ಮತ್ತೆ ಮಕ್ಕಳು ಮಡಿಲು ಸೇರುವ ನಿರೀಕ್ಷೆ ಕಳೆದುಕೊಂಡಿದ್ದಾರೆ. ಮಾನವ ಕಳ್ಳ ಸಾಗಾಣಿಕೆ, ಪ್ರೀತಿ-ಪ್ರೇಮ, ಮಕ್ಕಳ ಅಪಹರಣ, ವೇಶ್ಯಾವಾಟಿಕೆ, ಆಮೀಷ ವೊಡ್ಡಿ ಬಾಲ ಕಾರ್ಮಿಕರಾಗಿ ದುಡಿಸಿಕೊಳ್ಳುವುದು, ಶಾಲೆ-ಮನೆಯಲ್ಲಿ ಜಗಳದಿಂದಾಗಿ ಶೇ.80 ಪ್ರಕರಣಗಳಲ್ಲಿ ಮಕ್ಕಳು ನಾಪತ್ತೆಯಾಗುತ್ತಿದ್ದಾರೆ ಎಂಬ ಸಂಗತಿ ಪತ್ತೆಯಾದ ಮಕ್ಕಳ ವಿಚಾರಣೆ ವೇಳೆ ಬಹಿರಂಗಗೊಂಡಿದೆ.

ಇತ್ತೀಚೆಗೆ ಪಾಲಕರ ಅತೀಯಾದ ಒತ್ತಡದಿಂದ ಮನೆ ಬಿಟ್ಟು ತೆರಳುವ ಮಕ್ಕಳ ಪ್ರಮಾಣ ಹೆಚ್ಚಾಗಿದೆ ಎಂಬ ಆಘಾತಕಾರಿ ಅಂಶವನ್ನು ಪೊಲೀಸ್‌ ಮೂಲಗಳು ತಿಳಿಸಿವೆ.

ನಾಪತ್ತೆಯಾದವರ ಪತ್ತೆಗೆ ತೀವ್ರ ಶೋಧ: ಮಕ್ಕಳು ನಾಪತ್ತೆಯಾಗಿರುವ ಪ್ರದೇಶದ ಆಸು-ಪಾಸಿನ ಪೊಲೀಸ್‌ ಠಾಣೆಗಳಲ್ಲಿ ದಾಖಲಾದ ಅಪರಿಚಿತ ಶವ ಪ್ರಕರಣ (ಯೂಡಿಆರ್‌) ಪತ್ತೆ ಹಚ್ಚಿ ನಾಪತ್ತೆಯಾದ ಮಕ್ಕಳಿಗೆ ಸಾಮ್ಯತೆ ಇದೆಯೇ ಎಂದು ಪರಿಶೀಲಿಸಲಾಗುತ್ತಿದೆ. ಲುಕ್‌ಔಟ್‌ ನೋಟಿಸ್‌ ನೀಡಿ ಅಕ್ಕ-ಪಕ್ಕದ ಜಿಲ್ಲೆ, ರಾಜ್ಯಗಳಲ್ಲೂ ಹುಡುಕಾಟ ನಡೆದಿದೆ. ಅನಾಥಾಶ್ರಮ, ಆಶ್ರಮ, ಆಧ್ಯಾತ್ಮಿಕ ಸ್ಥಳಗಳಲ್ಲಿ ಮತ್ತು ಬಾಲಮಂದಿರಗಳಲ್ಲಿ ಶೋಧ ನಡೆಸಲಾಗುತ್ತಿದೆ. ತನಿಖಾಧಿಕಾರಿಗಳಿಗೆ ನಿರ್ದಿಷ್ಟ ಕಾರ್ಯವಿಧಾನ ಸಿದ್ಧಪಡಿಸಲಾಗಿದೆ.

ನಾಪತ್ತೆಯಾದ ಬಹುತೇಕ ಕೇಸ್‌ಗಳನ್ನು ಹೆಚ್ಚಿನ ತನಿಖೆಗಾಗಿ ಎಎಚ್‌ಟಿಯು ಘಟಕಗಳಿಗೆ ವರ್ಗಾಯಿಸಲಾಗಿದೆ. ಆದರೆ, 1,578 ಮಕ್ಕಳ ಸುಳಿವು ಸಿಕ್ಕಿಲ್ಲ ಎಂದು ತಿಳಿದು ಬಂದಿದೆ. ಇನ್ನು ಮಕ್ಕಳ ರಕ್ಷಣೆಗಾಗಿ ವಿಶೇಷ ಘಟಕ ರಚಿಸಲಾಗಿದ್ದು, ಈ ಘಟಕದ ಸಿಬ್ಬಂದಿ ಶಾಲಾ-ಕಾಲೇಜು, ಹಾಸ್ಟೆಲ್‌ಗ‌ಳು, ಪಿಜಿ, ಬಸ್‌ ನಿಲ್ದಾಣ, ಹಾಸ್ಟೆಲ್‌ಗ‌ಳಲ್ಲಿ ಗಸ್ತು ತಿರುಗುತ್ತಿವೆ. ರೈಲ್ವೆ ನಿಲ್ದಾಣ, ಬಸ್‌ ನಿಲ್ದಾಣಗಳಲ್ಲಿ ಅಳವಡಿಸಿದರುವ ಸಿಸಿ ಕ್ಯಾಮೆರಾ ಪರಿಶೀಲಿಸಿ ಅಪ್ರಾಪ್ತರ ಕಳ್ಳ ಸಾಗಾಣಿಕೆ ಮೇಲೆ ನಿಗಾ ಇರಿಸುತ್ತಾರೆ.

ಪಾಲಕರು ವಹಿಸಬೇಕಾದ ಮುನ್ನೆಚ್ಚರಿಕೆಗಳು:

ನಾಪತ್ತೆಯಾದ ವಿಚಾರ ಗೊತ್ತಾದ ಕೂಡಲೇ ಸ್ಥಳೀಯ ಪೊಲೀಸ್‌ ಠಾಣೆಗೆ ಮಾಹಿತಿ ನೀಡಿ.

ಅಪರಿಚಿತರ ಜೊತೆ ಮಕ್ಕಳು ಹೆಚ್ಚು ಸಂಪರ್ಕ ಇಟ್ಟುಕೊಳ್ಳದಂತೆ ಎಚ್ಚರವಹಿಸಿ.

ಆಸೆ, ಆಮೀಷವೊಡ್ಡುವ ವ್ಯಕ್ತಿಗಳ ಮಾತಿಗೆ ಮಕ್ಕಳು ಮರುಳಾಗದಂತೆ ನೋಡಿಕೊಳ್ಳಿ.

ಮಕ್ಕಳ ಮೇಲೆ ಹೆಚ್ಚಿನ ಒತ್ತಡ ಹಾಕದೇ ಅವರ ಸಮಸ್ಯೆ ಪರಿಶೀಲಿಸಿ ಪರಿಹರಿಸಿ.

ನಾಪತ್ತೆಯಾಗಿರುವ ಮಕ್ಕಳ ಪತ್ತೆಗೆ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಪ್ರಕರಣಗಳಲ್ಲಿ ಗಣನೀಯ ಏರಿಕೆಯಾಗಿಲ್ಲ. ಮಕ್ಕಳು ನಾಪತ್ತೆಯಾದ ಕೂಡಲೇ ಪಾಲಕರು ಪೊಲೀಸರಿಗೆ ದೂರು ನೀಡಿ.-ಬಿ.ದಯಾನಂದ್‌, ಬೆಂಗಳೂರು ನಗರ ಪೊಲೀಸ್‌ ಆಯುಕ್ತ. 

-ಅವಿನಾಶ ಮೂಡಂಬಿಕಾನ