ಹೆಗಡೆಗೆ ಸಿಎಂ ಟ್ವೀಟ್‌ ಕುಟುಕು

Team Udayavani, Mar 29, 2019, 11:48 AM IST

ಬೆಂಗಳೂರು: ಕೇಂದ್ರ ಸಚಿವ ಅನಂತಕುಮಾರ್‌ ಹೆಗಡೆ ಅವರ ಪದ ಬಳಕೆ ಕುರಿತು “ಕಟು ಟ್ವೀಟ್‌’ ಮೂಲಕ ಕುಟುಕುವ ಮೂಲಕ ಮುಖ್ಯಮಂತ್ರಿ ಎಚ್‌.ಡಿ.ಕುಮಾರಸ್ವಾಮಿ ನೀಡಿದ್ದಾರೆ.

“ನಿಮ್ಮ ಭಾಷೆ ನಿಮ್ಮ ಸಂಸ್ಕೃತಿ ತೋರಿಸುತ್ತದೆ. ಆದರೆ, ದುರದೃಷ್ಟವಷಾತ್‌ ನೀವು ಕೇಂದ್ರದ ಸಚಿವರು ಹಾಗೂ ಲೋಕಸಭೆ ಚುನಾವಣೆಯಲ್ಲಿ ಅಭ್ಯರ್ಥಿ. ತಾವು ವಿಷ ಉಗುಳುವ ಸಂದರ್ಭದಲ್ಲಿ ಮಾನಸಿಕ ಕಾಯಿಲೆಗೆ ಸಂಬಂಧಿಸಿದ ಶಬ್ದಗಳನ್ನು ಬಳಸಬೇಡಿ.

ಮಾನಸಿಕ ಕಾಯಿಲೆಯಿಂದ ಸಾವಿರಾರು ಜನರು ಹಾಗೂ ಅವರ ಕುಟುಂಬದವರು ಮೌನವಾಗಿ ನೋವು ಅನುಭವಿಸುತ್ತಿದ್ದಾರೆ. ಆದರೆ, ಕೆಲವು ಪದ ಬಳಕೆ ಮಾಡಿ ನಿಂದಿಸಿ ವಿಷ ಕಾರುವ ಮೂಲಕ ಅವರಿಗೆ ಅವಮಾನ ಮಾಡಬೇಡಿ.

ನೀವು ಒಂದು ರೀತಿಯಲ್ಲಿ ಅಂತಹ ಹೇಳಿಕೆಗಳನ್ನು ನೀಡುವ ಚಾಳಿಕೋರರಾಗಿದ್ದೀರಿ, ಹಾಗೂ ಹೇಳಿಕೆ ನಂತರ ಪಲಾಯನ ಮಾಡುವ ನಿಮ್ಮ ಬಗ್ಗೆ ಅನುಕಂಪವಿದೆ,’ ಎಂದು ಹೇಳಿದ್ದಾರೆ.

ಅನಂತ್‌ ಹೇಳಿದ್ದೇನು?: ಆದಾಯ ತೆರಿಗೆ ದಾಳಿಗೆ ಸಂಬಂಧಿಸಿದಂತೆ ಮುಖ್ಯಮಂತ್ರಿ ಕುಮಾರಸ್ವಾಮಿ ಬಿಜೆಪಿ ವಿರುದ್ಧ ವಾಗ್ಧಾಳಿ ನಡೆಸಿದ್ದನ್ನು ಖಂಡಿಸಿದ್ದ ಅನಂತ್‌ಕುಮಾರ್‌ ಹೆಗ‌ಡೆ, “ಕುಮಾರಸ್ವಾಮಿಯವರು ಗುಮಾಸ್ತ ಹುದ್ದೆಗೂ ಅರ್ಹರಲ್ಲ.

ಅವರು ರಾಜಕೀಯ ಮಾನಸಿಕ ಕಾಯಿಲೆಯಿಂದ ಬಳಲುತ್ತಿದ್ದಾರೆ. ಭ್ರಮೆಯಲ್ಲಿ ಬೊಬ್ಬೆ ಹಾಕುತ್ತಿದ್ದಾರೆ’ ಎಂಬ ಅರ್ಥ ಬರುವ ಟ್ವೀಟ್‌ ಮಾಡಿದ್ದರು. ಇದಕ್ಕೆ ಪ್ರತ್ಯುತ್ತರವಾಗಿ ಕುಮಾರಸ್ವಾಮಿಯವರು ಟ್ವೀಟ್‌ ಮೂಲಕ ತಿರುಗೇಟು ನೀಡಿದ್ದಾರೆ.