ಎಲೆಕ್ಟ್ರಾನಿಕ್‌ ಸಿಟಿಮೇಲ್ಸೇತುವೆಯಲ್ಲಿ ಬಿರುಕು

Team Udayavani, Jun 20, 2017, 12:33 PM IST

ಬೆಂಗಳೂರು: ಹೊಸೂರು ಮಾರ್ಗದಲ್ಲಿ ಬಿಬಿಎಂಪಿ ಮತ್ತು ಬಿಡಿಎ ವತಿಯಿಂದ ನಿರ್ಮಿಸಿರುವ ಎಲೆಕ್ಟ್ರಾನಿಕ್‌ ಸಿಟಿ ಮೇಲ್ಸೇತುವೆಯ ಕೋನಪ್ಪನ ಅಗ್ರಹಾರದ ಬಳಿಯ ಪಿಲ್ಲರ್‌ನಲ್ಲಿ ಎರಡು ಎಲಿಮೆಂಟ್‌ಗಳ ನಡುವೆ ಬಿರುಕು ಕಾಣಿಸಿಕೊಂಡಿರುವುದು ವಾಹನ ಸವಾರರಲ್ಲಿ ಆತಂಕ ಮೂಡಿಸಿದೆ. 

ಕೋನೆನಪ್ಪನ ಅಂಗ್ರಹಾರದ ಬಳಿಯ ಪಿಲ್ಲರ್‌ ಮೇಲೆ ಕೂರಿಸಿರುವ ಎರಡು ಎಲಿಮೆಂಟ್‌ಗಳ ನಡುವೆ 4-5 ಇಂಚಿನಷ್ಟು ಬಿರುಕು ಉಂಟಾಗಿದ್ದು, ಭಾರೀ ವಾಹನಗಳು ಸಂಚರಿಸಿದಾಗ ಮೇಲ್ಸೇತುವೆ ಕಂಪಿಸುವ ಅನುಭವವಾಗುತ್ತಿರುವುದರಿಂದ ಸವಾರರು ಗಾಬರಿಗೊಂಡಿದ್ದಾರೆ ಎನ್ನಲಾಗಿದೆ. 

ಈ ಕುರಿತು ಪ್ರತಿಕ್ರಿಯಿಸಿರುವ ವಾಹನ ಸವಾರ ರೇಣುಕೇಶ್‌, ಎರಡು ಎಲಿಮೆಂಟ್‌ಗಳನ್ನು ಜೋಡನೆ ಮಾಡಿರುವ ಭಾಗದಲ್ಲಿ ಎರಡು ಮೂರು ದಿನಗಳಿಂದ ಬಿರುಕು ಕಾಣಿಸಿಕೊಂಡಿದೆ. ಇದರೊಂದಿಗೆ ಭಾರಿ ವಾಹನಗಳು ಮತ್ತು ಬಸ್‌ಗಳು ಸಂಚರಿಸಿದಾಗ ಲಘು ಕಂಪದ ಅನುಭವವಾಗುತ್ತಿರುವುದರಿಂದ ಮೇಲ್ಸೇತುವೆಯಲ್ಲಿ ಸಂಚರಿಸಲು ಭಯವಾಗುತ್ತಿದೆ,’ ಎಂದು ತಿಳಿಸಿದ್ದಾರೆ. 

ಸಂಬಂಧಿಸಿದ ಅಧಿಕಾರಿಗಳು ಈ ಕೂಡಲೇ ಇದನ್ನು ಗಂಭೀರವಾಗಿ ಪರಿಗಣಿಸಿ ಸರಿಪಡಿಸಲು ಮುಂದಾಗಬೇಕು. ಇದರೊಂದಿಗೆ ಸಾರ್ವಜನಿಕರ ಸಂಚಾರಕ್ಕೆ ಯಾವುದೇ ತೊಂದರೆಯಿಲ್ಲ ಎಂಬ ಭರವಸೆಯನ್ನು ನೀಡಬೇಕು ಎಂದು ಒತ್ತಾಯಿಸಿದ್ದಾರೆ.