ಗಡುವು ಮುಗಿದಿದೆ, ಹಣ ಕೊಡದಿದ್ದರೆ ದಾಳಿ ಖಚಿತ 

Team Udayavani, Jun 3, 2017, 12:48 PM IST

ಬೆಂಗಳೂರು: ತಿಂಗಳ ಹಿಂದಷ್ಟೇ 500 ಕೋಟಿ ಹಣದ ಬೇಡಿಕೆಯೊಂದಿಗೆ ವಿಪ್ರೋ ಕಂಪೆನಿಗೆ ಇ-ಮೇಲ್‌ ರವಾನಿಸಿ “ಬಯೋ ಬಾಂಬ್‌’ ಸ್ಫೋಟ ಮಾಡುವುದಾಗಿ ಬೆದರಿಸಿದ್ದ ದುಷ್ಕರ್ಮಿಳು ಈಗ ಮತ್ತೆ ಸಂದೇಶ ನೀಡಿದ್ದಾರೆ. “ಹಣ ನೀಡಲು ನಿಮಗೆ ನಾವು ಕೊಟ್ಟಿದ್ದ ಗಡುವು ಮುಗಿದಿದೆ. ಆದರೂ, ಇನ್ನು ಏಳು ದಿನ ಸಮಯ ನೀಡುತ್ತೇವೆ. ಅಷ್ಟರೊಳಗೆ 500 ಕೋಟಿ ರೂ.ಗಳನ್ನು ನಮ್ಮ ಖಾತೆಗೆ ಜಮೆ ಮಾಡಿ ಇಲ್ಲವೇ ದಾಳಿಗೆ ಸಿದ್ಧರಾಗಿ,’ ಎಂದು ಎಚ್ಚರಿಸಿದ್ದಾರೆ. 

ಹಿನ್ನೆಲೆಯಲ್ಲಿ ಕಾರ್ಯಪ್ರವೃತ್ತರಾದ ಬೆಳ್ಳಂದೂರು ಠಾಣೆ ಪೊಲೀಸರು ಸೈಬರ್‌ ಪೊಲೀಸರ ನೆರವು ಪಡೆದು, ಈ ಮೇಲ್‌ ಎಲ್ಲಿಂದ ಬಂದದ್ದು ಎಂಬುದನ್ನು ಪತ್ತೆ ಹಚ್ಚಿದ್ದಾರೆ. ಈ ಹಿಂದೆ ಬಂದಿದ್ದ ಮೇಲ್‌ ಮತ್ತು ಸದ್ಯ ಈಗ ಬಂದಿರುವ ಮೇಲ್‌ ಎರಡೂ ಸ್ವಿಜರ್‌ಲ್ಯಾಂಡ್‌ನಿಂದ ಬಂದಿವೆ ಎಂಬುದನ್ನು ಪೊಲೀಸರು ಖಚಿತಪಡಿಸಿಕೊಂಡಿದ್ದಾರೆ. 

ಇದರ ಜಾಡು ಹಿಡಿದು ಹೊರಟಿರುವ ಪೊಲೀಸರು ಆರೋಪಿಗಳ ಬಂಧನಕ್ಕೆ ಶೋಧ ಕಾರ್ಯ ನಡೆಸುತ್ತಿದ್ದಾರೆ. ಇ-ಮೇಲ್‌ನಲ್ಲಿ ಬಂದಿರುವ ಬೆದರಿಕೆ ಪತ್ರಗಳನ್ನು ಗಮನಿಸಿದರೆ ಮೇಲ್ನೋಟಕ್ಕೆ ಕಂಪೆನಿಯ ಹಾಲಿ ಅಥವಾ ಮಾಜಿ ಉದ್ಯೋಗಿಗಳೇ ಕೃತ್ಯ ಎಸಗಿರುವ ಸಾಧ್ಯತೆಯಿದೆ. ಆದರೆ, ಇ-ಮೇಲ್‌ನ ಐಪಿ ವಿಳಾಸ ಸ್ವಿಜರ್‌ಲ್ಯಾಂಡ್‌ ತೋರಿಸುತ್ತಿದೆ. ಈ ಮೂಲಕ ತನಿಖೆಯ ದಿಕ್ಕು ತಪ್ಪಿಸಲು ಆರೋಪಿಗಳು ಯತ್ನಿಸುತ್ತಿದ್ದಾರೆ ಎಂದು ಪೊಲೀಸರು ಹೇಳಿದ್ದಾರೆ. 

ದುಷ್ಕರ್ಮಿಗಳು ಕಳುಹಿಸಿರುವ ಸಂದೇಶದಲ್ಲಿ “ಹಣ ಕಳುಹಿಸಲು ನಾವು ನೀಡಿದ ಗಡುವು ಮುಗಿದಿದೆ. ಆದರೂ ಹಣ ಜಮೆ ಮಾಡಲು ಹಿಂದೇಟು ಹಾಕುತ್ತಿದ್ದೀರಿ ಎಂದರೆ ನಮ್ಮ ಮಾತುಗಳನ್ನು ನೀವು ಗಂಭೀರವಾಗಿ ಪರಿಗಣಿಸಿಲ್ಲ ಎಂದರ್ಥ. ಇನ್ನು ಒಂದು ವಾರ ಕಾಲವಕಾಶ ಕೊಡುತ್ತೇವೆ. ಅಷ್ಟರಲ್ಲಿ ಹಣ ಕಳುಹಿಸದಿದ್ದರೆ ದಾಳಿ ನಡೆಸುವುದು ಖಚಿತ. ಎಲ್ಲರೂ ದಾಳಿಗೆ ಸಿದ್ಧರಾಗಿ,’ ಎಂದು ಎಂದು ಉಲ್ಲೇಖೀಸಿದ್ದಾರೆ. 

ವಿಪ್ರೋಗೆ ಹೋಗುವ ಪ್ರತಿ ಪಾರ್ಸೆಲ್‌ಗ‌ಳೂ ಪರಿಶೀಲನೆ: ಮೇ .5ರಂದು ಕಂಪನಿಗೆ ಸಂದೇಶ ರವಾನಿಸಿದ್ದ ದುಷ್ಕರ್ಮಿಗಳು 500 ಕೋಟಿ ರೂ.ಗಳನ್ನು ಬಿಟ್‌ಕಾಯಿನ್‌ ಮೂಲಕ ನೀಡಬೇಕು. ಹಣ ನೀಡದಿದ್ದರೆ ಸರ್ಜಾಪುರದಲ್ಲಿರುವ ವಿಪ್ರೋ ಕಂಪನಿಯ ಮೇಲೆ ರಿಸಿನ್‌ ಎಂಬ ಜೈವಿಕ ವಿಷಕಾರಿ ತೈಲವನು °ಕ್ಯಾಂಟೀನ್‌ ಊಟದಲ್ಲಿ, ಟಾಯ್ಲೆಟ್‌ ಸೀಟ್‌ ಹಾಗೂ ಟಾಯ್ಲೆಟ್‌ ಪೇಪರ್‌ಗಳಿಗೂ ಅಂಟಿಸಲಾಗುತ್ತದೆ. ಅನುಮಾನವಿದ್ದರೆ 2 ಗ್ರಾಂ ತೈಲವನ್ನು ಕಚೇರಿಗೆ ಪಾರ್ಸಲ್‌ ಕಳುಹಿಸುತ್ತೇವೆ ಎಂದು ಮೇಲ್‌ ಕಳುಹಿಸಲಾಗಿತ್ತು. ಈ ಬೆದರಿಕೆಯ ಕಾರಣದಿಂದ ವಿಪ್ರೋ ಕಚೇರಿಗಳ ಬಳಿ ಪೊಲೀಸ್‌ ಭದ್ರತೆ ಹೆಚ್ಚಿಸಲಾಗಿತ್ತು. ಸಂಸ್ಥೆಗೆ ಬರುವ ಪ್ರತಿ ಪಾರ್ಸಲ್‌ಗ‌ಳನ್ನು ಪೊಲೀಸರೇ ಪರಿಶೀಲಿಸಿ ಒಳಗಡೆ ಬಿಡುತ್ತಿದ್ದಾರೆ.