ತೃತೀಯ ಹಂತದ ಸಂಸ್ಕರಿಸಿದ ನೀರಿಗೆ ಬೇಡಿಕೆ

Team Udayavani, Sep 19, 2019, 3:07 AM IST

ಬೆಂಗಳೂರು: ಜಲಮಂಡಳಿ ಪೂರೈಸುತ್ತಿರುವ ತೃತೀಯ ಹಂತದ ಸಂಸ್ಕರಿಸಿದ ನೀರಿಗೆ ಸಾರ್ವಜನಿಕರಿಂದ ಬೇಡಿಕೆ ಆರಂಭವಾಗಿದೆ. ಹೀಗಾಗಿ ಜಲಮಂಡಳಿ ಅಧಿಕಾರಿಗಳು, ನಗರದ ಪ್ರಮುಖ ರಿಯಲ್‌ ಎಸ್ಟೇಟ್‌ ಕಂಪನಿಗಳ ಜತೆ ಮಾತುಕತೆಗೆ ಮುಂದಾಗಿದ್ದಾರೆ.

ಸದ್ಯ ಜಲಮಂಡಳಿಗೆ ಸಂಸ್ಕರಿಸಿದ ನೀರು ಪೂರೈಸುವಂತೆ ಸಾರ್ವಜನಿಕರಿಂದ ಹತ್ತಾರು ಕರೆಗಳು ಬರುತ್ತಿವೆ. ಈಗಾಗಲೇ ವೃಷಭಾವತಿ ಕಾಲುವೆಯ ತ್ಯಾಜ್ಯ ನೀರು ಸಂಸ್ಕರಣ ಘಟಕದಿಂದ ನಿತ್ಯ 4 ಸಾರು ನೀರು ಪೂರೈಸಲಾಗುತ್ತಿದೆ. ಜತೆಗೆ ಪೀಣ್ಯ, ಹೊಸಕೋಟೆ, ನೆಲಮಂಗಲ, ಬ್ಯಾಟರಾಯನಪುರ, ನಾಯಂಡಹಳ್ಳಿ, ವಿದ್ಯಾರಣ್ಯಪುರ ಭಾಗದಿಂದ ಸಂಸ್ಕರಿಸಿದ ನೀರಿಗೆ ಬೇಡಿಕೆ ಬರುತ್ತಿದೆ.

ನಗರದ ಕೆಲ ಕಂಪನಿಗಳು ಸ್ವಯಂ ನಿರ್ಧಾರದಿಂದ ಸಂಸ್ಕರಿಸಿದ ತ್ಯಾಜ್ಯ ನೀರು ಬಳಕೆಗೆ ಮುಂದೆ ಬಂದಿದ್ದು, ಪ್ರಮುಖವಾಗಿ ನಾಯಂಡಹಳ್ಳಿ ಬಳಿಯ ಕೆಬಿಆರ್‌ ಕನ್‌ಸ್ಟ್ರಕ್ಟರ್‌ ಕಂಪನಿ, ನಾಗಸಂದ್ರದ ಐಕ್ಯ ಇಂಟರ್‌ನ್ಯಾಷನಲ್‌ ಫ‌ರ್ನಿಚರ್‌ ಕಂಪನಿಯು (ನಿತ್ಯ 20 ಸಾವಿರ ಲೀ), ಹೊಸಕೋಟೆಯ ರಸ್ತೆ ಕಾಮಗಾರಿ ಕಂಪನಿ, ವಿಮಾನ ನಿಲ್ದಾಣ ರಸ್ತೆಯ ಟಾಟಾ ಕನ್‌ಸ್ಟ್ರಕ್ಟರ್‌ ಕಂಪನಿಗಳು ಮುಂದೆ ಬಂದಿವೆ. ಕೆಲವು ಕಂಪನಿಗಳಿಗೆ ಪೂರೈಸಲಾಗುತ್ತಿದೆ ಎಂದು ಜಲಮಂಡಳಿ ಸಂಸ್ಕರಿಸಿದ ತ್ಯಾಜ್ಯ ನೀರು ಮಾರಾಟ ಅಧಿಕಾರಿ ರುದ್ರೇಗೌಡ ತಿಳಿಸಿದರು.

ಕಂಪನಿಗಳ ಸಭೆ: ಜಲಮಂಡಳಿಯು ನಗರದ ದೊಡ್ಡ ರಿಯಲ್‌ ಎಸ್ಟೇಟ್‌ ಕಂಪನಿಗಳನ್ನು ಸಂಸ್ಕರಿಸಿದ ತ್ಯಾಜ್ಯನೀರು ಕಟ್ಟಡ ಕಾಮಗಾರಿಗೆ ಬಳಸುವ ಸಂಬಂಧ ಮಾತುಕತೆ ನಡೆಸುತ್ತಿದೆ. ಜತೆಗೆ ತಿಂಗಳಾಂತ್ಯಕ್ಕೆ ಕಂಪನಿಗಳ ಮುಖ್ಯಸ್ಥರೊಡನೆ ಸಭೆ ನಡೆಸಲು ಸಜ್ಜಾಗಿದೆ. ಸಂಸ್ಕರಿಸಿದ ತ್ಯಾಜ್ಯ ನೀರಿನ ಬಳಕೆ ಬಗ್ಗೆ ಮನವರಿಕೆ ಮಾಡಿ, ರಿಯಲ್‌ ಎಸ್ಟೇಟ್‌ ಸಂಸ್ಥೆಗಳಿಂದ ನಿರ್ಮಿಸುವ ಕಟ್ಟಡ, ಅಪಾರ್ಟ್‌ಮೆಂಟ್‌, ವಿಲ್ಲಾ ಸೇರಿದಂತೆ ಎಲ್ಲಾ ಕಾಮಗಾರಿಗಳಿಗೆ ಸಂಸ್ಕರಿಸಿದ ತ್ಯಾಜ್ಯ ನೀರನ್ನು ಬಳಸಲು ಸಭೆಯಲ್ಲಿ ಕಂಪನಿಗಳೊಂದಿಗೆ ಒಪ್ಪಂದ ಮಾಡಿಕೊಳ್ಳಲಾಗುತ್ತದೆ.

ನಂತರ ಕಾಂಕ್ರೀಟ್‌ ರೆಡಿಮಿಕ್ಸರ್‌ ಗುತ್ತಿಗೆದಾರರ ಸಭೆ ಕರೆಯಲು ನಿರ್ಧರಿಸಲಾಗಿದೆ. ಈ 2 ಸಭೆಗಳಲ್ಲಿ ಸಂಸ್ಕರಿಸಿದ ನೀರು ಕೊಂಡುಕೊಳ್ಳುವ ಕುರಿತು ಒಪ್ಪಂದಗಳಾದರೆ ಸಂಸ್ಕರಿಸುತ್ತಿರುವ ತ್ಯಾಜ್ಯ ನೀರಲ್ಲಿ ಬಹುಪಾಲು ಮಾರಾಟವಾಗಲಿದೆ ಎನ್ನುತ್ತಾರೆ ಜಲಮಂಡಳಿ ಅಧಿಕಾರಿಗಳು.

ನಿರ್ವಹಣೆ ವಿಭಾಗದ ಎಂಜಿನಿಯರ್‌ಗಳ ಸಭೆ: ಜಲಮಂಡಳಿಯು ಸಂಸ್ಕರಿಸಿದ ತ್ಯಾಜ್ಯನೀರಿನ ಬಳಕೆ ಹಾಗೂ ಮಾರಾಟ ಪ್ರೋತ್ಸಾಹಿಸಲು ಅಗತ್ಯ ಕ್ರಮಕೈಗೊಳ್ಳುವ ಕುರಿತು ಉಪವಿಭಾಗಗಳ ನಿರ್ವಹಣೆ ವಿಭಾಗದ ಎಂಜಿನಿಯರ್‌ಗಳ ಸಭೆ ನಡೆಸುತ್ತಿದೆ. ಸದ್ಯ 4 ವಿಭಾಗಗಳ ಕಡೆಗಳಲ್ಲಿ ಸಭೆ ನಡೆಸಿ, ಅಲ್ಲಿನ ಎಂಜಿನಿಯರ್‌ಗಳಿಗೆ ತಮ್ಮ ವ್ಯಾಪ್ತಿಯಲ್ಲಿ ಅಗತ್ಯ ಕ್ರಮಕ್ಕೆ ಮುಂದಾಗುವಂತೆ ತಿಳಿಸಿದೆ.

ಈಗಾಗಲೇ ಜಲಮಂಡಳಿ, ನಗರದಲ್ಲಿ ಕಟ್ಟಡ ನಿರ್ಮಾಣಕ್ಕೆ ಕೊಳವೆಬಾವಿ ನೀರು ಬಳಸಲು ಕಡಿವಾಣ ಹಾಕಿದೆ. ಕೊಳವೆಬಾವಿ ಕೊರೆಯಲು ಅನುಮತಿ ನೀಡುವಾಗಲೇ ಕಟ್ಟಡ ನಿರ್ಮಾಣ ಉದ್ದೇಶಕ್ಕೊ ಅಥವಾ ಕುಡಿಯುವ ನೀರಿಗಾಗಿಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಲು ಎಂಜಿನಿಯರ್‌ಗಳಿಗೆ ಸೂಚಿಸಿದೆ.

ಬಿಬಿಎಂಪಿ ಜತೆ ಮಾತುಕತೆ: ಈ ಮಧ್ಯೆ, ಸಂಸ್ಕರಿಸಿದ ನೀರು ಬಳಕೆ ಕುರಿತು ಬಿಬಿಎಂಪಿ ಅಧಿಕಾರಿಗಳ ಜತೆ ಮಾತುಕತೆ ನಡೆಸಲಾಗುತ್ತಿದೆ. ಬಿಬಿಎಂಪಿ ಜತೆಗೂ ಒಪ್ಪಂದ ಮಾಡಿಕೊಳ್ಳುವ ಮೂಲಕ ಮುಂದಿನ ದಿನಗಳಲ್ಲಿ ಎಲ್ಲಾ ಕಾಮಗಾರಿ, ಶೌಚಾಲಯ ಹಾಗೂ ಉದ್ಯಾನ ನಿರ್ವಹಣೆಗಳಿಗೆ ಸಂಸ್ಕರಿಸಿದ ನೀರು ಪೂರೈಕೆ ಮಾಡಲಾಗುವುದು ಎಂದು ಜಲಮಂಡಳಿ ಅಧಿಕಾರಿಗಳು ತಿಳಿಸಿದರು.

ಜಲಮಂಡಳಿಯು ತೃತೀಯ ಹಂತದ ಸಂಸ್ಕರಿಸಿದ ನೀರಿನ ಮಾರಟಕ್ಕೆ ಸಂಪೂರ್ಣ ಸಿದ್ಧವಿದೆ. ನಿರ್ಮಾಣ ವಲಯದಲ್ಲೂ ಸಂಸ್ಕರಿಸಿದ ನೀರು ಬಳಕೆಗೆ ಆಸಕ್ತಿ ಇದ್ದು, ಸಾಕಷ್ಟು ಕರೆಗಳು ಬರುತ್ತಿವೆ. ರಿಯಲ್‌ ಎಸ್ಟೇಟ್‌ ಕಂಪನಿಗಳ ಸಭೆ ನಡೆಸಲು ಜಲಮಂಡಳಿ ಅಧ್ಯಕ್ಷರು ನಿರ್ಧರಿಸಿದ್ದು, 40ಕ್ಕೂ ಹೆಚ್ಚು ಉದ್ಯಮಿಗಳು ಭಾಗವಹಿಸುವ ನಿರೀಕ್ಷೆ ಇದೆ.
-ರುದ್ರೇಗೌಡ, ಸಂಸ್ಕರಿಸಿದ ನೀರು ಮಾರಾಟ ಅಧಿಕಾರಿ, ಜಲಮಂಡಳಿ

* ಜಯಪ್ರಕಾಶ್‌ ಬಿರಾದಾರ್‌