ಕಿರುತೆರೆ ನಟನ ಬಂಧನ

Team Udayavani, Apr 4, 2018, 10:55 AM IST

ಬೆಂಗಳೂರು: ಮದುವೆಯಾಗುವುದಾಗಿ ನಂಬಿಸಿ ಮುಂಬೈ ಮೂಲದ ರೂಪದರ್ಶಿ ಜತೆ ದೈಹಿಕ ಸಂಬಂಧ ಬೆಳೆಸಿ ವಂಚಿಸಿದ ಆರೋಪದ ಮೇಲೆ ಕಿರುತೆರೆ ನಟನನ್ನು ರಾಜರಾಜೇಶ್ವರಿನಗರ ಠಾಣೆ ಪೊಲೀಸರು ಬಂಧಿಸಿದ್ದಾರೆ. ಚನ್ನಸಂದ್ರದ ನಿವಾಸಿ ಕಿರಣ್‌ ಕುಮಾರ್‌ (25) ಬಂಧಿತ.

ಮುಂಬೈನಲ್ಲಿ ಶೂಟಿಂಗ್‌ ವೇಳೆ ಆರೋಪಿ ಕಿರಣ್‌ ಕುಮಾರ್‌ ಸಂತ್ರಸ್ತೆಯನ್ನು ಪರಿಚಯಸಿಕೊಂಡು ಕಳೆದ ಐದು ವರ್ಷಗಳಿಂದ ಪ್ರೀತಿಸುತ್ತಿದ್ದ. ಬಳಿಕ ಬೆಂಗಳೂರಿನಲ್ಲಿ ಕೆಲ ಸಮಯ ಲಿವಿಂಗ್‌ ಟುಗೆದರ್‌ ಸಂಬಂಧದಡಿ ಇಬ್ಬರು ಒಟ್ಟಿಗೆ ಇದ್ದರು. ನಂತರ ಕೆಲಸದ ಮೇಲೆ ಸಂತ್ರಸ್ತೆ ಮುಂಬೈಗೆ ತೆರಳಿದ್ದಳು. ಈ ಮಧ್ಯೆ ಮಾ.28ರಂದು ವಾಪಸ್‌ ಬಂದ ಸಂತ್ರಸ್ತೆಯನ್ನು ಆರೋಪಿ ಚಿನ್ನಸಂದ್ರದಲ್ಲಿರುವ ತನ್ನ ಮನೆಗೆ ಕರೆದೊಯ್ದು ಲೈಂಗಿಕ ಸಂಪರ್ಕ ಬೆಳೆಸಿದ್ದಾನೆ. ಅನಂತರ ಮಾ.29ರಂದು ರಾತ್ರಿ ಕಾರಿನಲ್ಲಿ ಹೋಗುವಾಗ ಸಂತ್ರಸ್ಥೆ ಮದುವೆ ವಿಚಾರ ಪ್ರಸ್ತಾಪಿಸಿದಾಗ ಕಿರಣ್‌ ಮದುವೆಗೆ ನಿರಾಕರಿಸಿದ್ದು, ಇಬ್ಬರ ನಡುವೆ ಜಗಳವಾಗಿದೆ. ಒಂದು ಹಂತದಲ್ಲಿ ಕಿರಣ್‌ ಸಂತ್ರಸ್ತೆ ಮೇಲೆ ಹಲ್ಲೆ ನಡೆಸಿದ್ದಾನೆ. ರಾಜರಾಜೇಶ್ವರಿ ನಗರ ಠಾಣೆಗೆ ದೂರು ನೀಡಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.