ಚಿನ್ನಮ್ಮ ಭೇಟಿಯಾಗಿ ಮುಂದಿನ ನಡೆಗೆ ಸಲಹೆ ಕೇಳಿದ ದಿನಕರನ್‌

Team Udayavani, Jun 6, 2017, 12:42 PM IST

ಬೆಂಗಳೂರು: ಅಕ್ರಮ ಆಸ್ತಿಗಳಿಕೆ ಪ್ರಕರಣದಲ್ಲಿ ಜೈಲು ಶಿಕ್ಷೆಗೊಳಗಾಗಿ ಪರಪ್ಪನ ಅಗ್ರಹಾರ ಕೇಂದ್ರ ಕಾರಾಗೃಹದಲ್ಲಿರುವ ಎಐಎಡಿಎಂಕೆ ಮಾಜಿ ಪ್ರಧಾನ ಕಾರ್ಯದರ್ಶಿ ಶಶಿಕಲಾ ನಟರಾಜನ್‌ ಅವರನ್ನು ಆಕೆಯ ಸಂಬಂಧಿ ಹಾಗೂ ಪಕ್ಷದ ಮಾಜಿ ಉಪ ಕಾರ್ಯದರ್ಶಿ ಟಿಟಿವಿ ದಿನಕರನ್‌ ಸೋಮವಾರ ಭೇಟಿ ನೀಡಿ ಕುಶಲೋಪರಿ ವಿಚಾರಿಸಿದ್ದಾರೆ.

ಇತ್ತೀಚೆಗಷ್ಟೇ ಪಕ್ಷದ ಎರಡೆಲೆ ಚಿಹ್ನೆಗೆ ಚುನಾವಣಾ ಆಯೋಗಕ್ಕೆ ಲಂಚ ನೀಡಿದ ಪ್ರಕರಣದಲ್ಲಿ ಬಂಧನಕ್ಕೊಳಗಾಗಿ, ಜಾಮೀನು ಪಡೆದು ಬಿಡುಗಡೆಯಾದ ನಂತರ ಇದೇ ಮೊದಲ ಬಾರಿಗೆ ದಿನಕರನ್‌ ಅವರು ಶಶಿಕಲಾ ನಟರಾಜನ್‌ ಅವರನ್ನು ಭೇಟಿಯಾಗಿ ಗಂಟೆಗೂ ಅಧಿಕ ಕಾಲ ಚರ್ಚೆ ನಡೆಸಿದ್ದಾರೆ.

ದಿನಕರನ್‌ ಜತೆಗೆ ಅವರ ಪತ್ನಿ ಅನುರಾಧ, ನಟಿ ವಿಜಯಶಾಂತಿ, ಶಶಿಕಲಾ ಅವರ ಇನ್ನಿಬ್ಬರು ಸಂಬಂಧಿಕರು ಮಾತುಕತೆ ನಡೆಸಿದ್ದಾರೆ. ಈ ವೇಳೆ ಪಕ್ಷದ ಚಿಹ್ನೆ, ಅಧಿಕಾರ ಎಲ್ಲವನ್ನೂ ಕಳೆದುಕೊಂಡಿರುವ ದಿನಕರನ್‌ ತಮ್ಮ ಮುಂದಿನ ನಡೆ ಬಗ್ಗೆ ಶಶಿಕಲಾ ಅವರಲ್ಲಿ ಸಲಹೆ ಪಡೆದುಕೊಂಡಿದ್ದಾರೆ ಎನ್ನಲಾಗಿದೆ. 

ಒಂದೂವರೆ ಗಂಟೆ ಚರ್ಚೆ: ಸಂಜೆ 4.30ರ ಸುಮಾರಿಗೆ ಜೈಲಿನ ಆವರಣ ಪ್ರವೇಶಿಸಿದ ದಿನಕರನ್‌ ಕುಟುಂಬ ಮತ್ತು ಇಬ್ಬರು ಆಪ್ತರು 6 ಗಂಟೆವರೆಗೆ ಶಶಿಕಲಾ ನಟರಾಜನ್‌ ಜತೆ ಚರ್ಚಿಸಿದ್ದಾರೆ. ಶಶಿಕಲಾ ಶಾಂತಚಿತ್ತರಾಗಿ ಎಲ್ಲವನ್ನೂ ಕೇಳಿಸಿಕೊಂಡಿದ್ದು, ಪಕ್ಷದ ಕುರಿತು ಕೆಲ ಸಲಹೆಗಳನ್ನು ನೀಡಿದ್ದಾರೆ. ಜತೆಗೆ ಮುಂದಿನ ಭೇಟಿಯಲ್ಲಿ ಏನೆಲ್ಲಾ ರಾಜಕೀಯ ತಂತ್ರ ಹೆಣೆಯಬೇಕೆಂಬ ಬಗ್ಗೆ ತಿಳಿಸುವುದಾಗಿ ಸೂಚಿಸಿದ್ದಾರೆ ಎಂದು ತಿಳಿದು ಬಂದಿದೆ.

ಶಾಸಕರಾದ ಸುಬ್ರಮಣಿಯನ್‌, ಬಾಲಸುಬ್ರಮಣಿಯನ್‌, ತಂಗದೊರೈ, ಜಗ್ಗಯನ್‌, ಇಂದುದೊರೈ, ಥಾನಾ ತಮಿಳು ಶೆಲ್ವನ್‌, ವೆಟ್ರಿವೇಲ್‌, ಪಾರ್ಥಿಬನ್‌, ಏಳುಮಲೈ, ಕದಿರ್‌ ಗಮು ಸೇರಿದಂತೆ 11 ಮಂದಿ ಶಶಿಕಲಾ ನಟರಾಜನ್‌ ಅವರ ಭೇಟಿಗೆ ಬಂದಿದ್ದರು. ಆದರೆ, ಅವರಿಗೆ ಪ್ರವೇಶ ನಿರಾಕರಿಸಲಾಯಿತು.

ಅಭಿಮಾನಿಗಳ ಜಮಾವಣೆ: ಶಿಶಿಕಲಾರನ್ನು ದಿನಕರನ ಭೇಟಿ ಮಾಡುವ ವಿಷಯ ತಿಳಿದ ಪಕ್ಷದ ಅಭಿಮಾನಿಗಳು ಮತ್ತು ಮುಖಂಡರು ಜೈಲಿನ ಬಳಿ ನೂರಾರು ಸಂಖ್ಯೆಯಲ್ಲಿ ಜಮಾಯಿಸಿದ್ದರು. ಇನ್ನು ಸಾಮಾನ್ಯ ಕೈದಿಗಳನ್ನು ಭೇಟಿ ಮಾಡುವ ರೀತಿಯಲ್ಲಿಯೇ ದಿನಕರನ್‌ ಅವರನ್ನು ಒಳಗೆ ಬಿಟ್ಟು ಶಶಿಕಲಾರನ್ನು ಭೇಟಿ ಮಾಡಿಸಲಾಯಿತು. ಈ ಮೂಲಕ ಶಶಿಕಲಾರಿಗೆ ಯಾವುದೇ ವಿಶೇಷ ಪ್ರಾತಿನಿಧ್ಯ ಕೊಡುತ್ತಿಲ್ಲ ಎಂದು ಜೈಲಿನ ಹಿರಿಯ ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.

ಶಶಿಕಲಾಗೆ ಇಲ್ಲ ಪೆರೋಲ್‌: ದಿನಕರನ್‌ ಅವರು ಶಶಿಕಲಾ ಅವರನ್ನು ಭೇಟಿ ಮಾಡುವ ಸುದ್ದಿ ಹರಡುತ್ತಿದ್ದಂತೆ ಇಡೀ ತಮಿಳುನಾಡಿನ ಮಾಧ್ಯಮಗಳು ಆರೋಪಿಗೆ ಪೆರೋಲ್‌ ಸಿಕ್ಕಿದೆ ಎಂದು ವರದಿ ಮಾಡಿವೆ. ಆದರೆ, ಯಾವುದೇ ಕಾರಣಕ್ಕೂ ಶಶಿಕಲಾಗೆ ಪೆರೋಲ್‌ ನೀಡಿಲ್ಲ. ಅವರು ಜೈಲಿನಲ್ಲೇ ಇದ್ದಾರೆ. ಅಲ್ಲದೆ, ಶಿಕ್ಷೆ ಪ್ರಕಟವಾಗಿ ಜೈಲಿಗೆ ಬಂದ ಒಂದು ವರ್ಷದವರೆಗೆ ಯಾರಿಗೂ ಪೆರೋಲ್‌ ಕೊಡಲು ಸಾಧ್ಯವಿಲ್ಲ. ಶಶಿಕಲಾರದ್ದು ಇನ್ನೂ ಶಿಕ್ಷೆಯ ಅವಧಿ ಒಂದು ವರ್ಷ ಆಗಿಲ್ಲದ ಕಾರಣ ಅವರಿಗೆ ಪೆರೋಲ್‌ ನೀಡಲು ಸಾಧ್ಯವಿಲ್ಲ  ಎಂದು ಪರಪ್ಪನ ಅಗ್ರಹಾರ ಕೇಂದ್ರ ಕಾರಾಗೃಹದ ಜೈಲರ್‌ ಕೃಷ್ಣ ಕುಮಾರ್‌ ಸ್ಪಷ್ಟ ಪಡಿಸಿದ್ದಾರೆ.

ಚಿನ್ನಮ್ಮನ ಆಶಿರ್ವಾದ: ದಿನಕರನ್‌ ಜೈಲಿನಿಂದ ಹೊರಬರುವಾಗ ಚಿನ್ನಮ್ಮ ಅರ್ಥಾತ್‌ ಶಶಿಕಲಾ ನಟರಾಜನ್‌ ಅವರ ಕಾಲಿಗೆ ಬಿದ್ದು ಆಶೀರ್ವಾದ ಪಡೆದರು. ಈ ವೇಳೆ ವಿಜಯಶಾಂತಿ ಕೂಡ ಇದ್ದರು ಎಂದು ಮೂಲಗಳು ತಿಳಿಸಿವೆ.