ತಾಯಿ, ತಂಗಿಯನ್ನು ಹತ್ಯೆಗೈದು ಆತ್ಮಹತ್ಯೆಗೆ ಯತ್ನಿಸಿದ ವೈದ್ಯ

Team Udayavani, Dec 1, 2018, 3:49 PM IST

ಬೆಂಗಳೂರು: ತಾಯಿ ಮತ್ತು ತಂಗಿ ಹಾಗೂ ತನಗೆ ತಾನು ಓವರ್ (ವಿಷ) ಡೋಸ್ ಇಂಜೆಕ್ಷನ್ ನೀಡಿ ಆತ್ಮಹತ್ಯೆಗೆ ಯತ್ನಿಸಿದ ಘಟನೆ ರಾಜರಾಜೇಶ್ವರಿ ನಗರದ ಠಾಣಾ ವ್ಯಾಪ್ತಿಯಲ್ಲಿ ಶನಿವಾರ ನಡೆದಿದ್ದು, ತಾಯಿ, ತಂಗಿ ಸಾವನ್ನಪ್ಪಿದ್ದಾರೆ. ವೈದ್ಯ ಗೋವಿಂದ ಖಾಸಗಿ ಆಸ್ಪತ್ರೆಯಲ್ಲಿ ಸಾವು-ಬದುಕಿನ ಹೋರಾಟ ನಡೆಸುತ್ತಿದ್ದಾರೆ ಎಂದು ವರದಿ ತಿಳಿಸಿದೆ.

ತಾಯಿ ಮೂಕಾಂಬಿಕಾ (75ವರ್ಷ), ತಂಗಿ ಶ್ಯಾಮಲಾ(40ವರ್ಷ)ಗೆ ವಿಷದ ಓವರ್ ಡೋಸ್ ಇಂಜೆಕ್ಷನ್ ನೀಡಿದ್ದರಿಂದ ಸಾವನ್ನಪ್ಪಿದ್ದರು. ಬಳಿಕ ವೈದ್ಯ ಗೋವಿಂದ ಪ್ರಕಾಶ್ ಕೂಡಾ ಇಂಜೆಕ್ಷನ್ ಚುಚ್ಚಿಕೊಂಡು ಆತ್ಮಹತ್ಯೆಗೆ ಯತ್ನಿಸಿದ್ದ.

ಆರ್.ಆರ್. ನಗರದ ಮುನಿವೆಂಕಟಪ್ಪ ರಂಗಮಂದಿರದ ಬಳಿ ಇರುವ ನಿವಾಸದಲ್ಲಿ ಇಂದು ಬೆಳಗ್ಗೆ ಈ ಘಟನೆ ನಡೆದಿದೆ. ಅನಾರೋಗ್ಯದ ಕಾರಣಕ್ಕಾಗಿ ಆತ್ಮಹತ್ಯೆ ಮಾಡಿಕೊಳ್ಳುತ್ತಿರುವುದಾಗಿ ಡೆತ್ ನೋಟ್ ನಲ್ಲಿ ಬರೆದಿರುವುದಾಗಿ ವರದಿ ತಿಳಿಸಿದೆ.

ಡಾ.ಗೋವಿಂದ ಪ್ರಕಾಶ್ ವಿಜಯನಗರದ ಹಂಪಿನಗರದಲ್ಲಿ ಖಾಸಗಿ ಕ್ಲಿನಿಕ್ ನಡೆಸುತ್ತಿದ್ದು, ಇವರು ಅವಿವಾಹಿತರಾಗಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ. ಮನೆಯಲ್ಲಿ ತಾಯಿ, ತಂದೆ, ತಂಗಿ ಮತ್ತು ವೈದ್ಯ ಗೋವಿಂದ ಅವರು ವಾಸಿಸುತ್ತಿದ್ದು, ತಂದೆ ಸುಬ್ಬರಾವ್ ಭಟ್ ಅವರು ಆತ್ಮಹತ್ಯೆಗೆ ಒಪ್ಪಿರಲಿಲ್ಲವಾಗಿತ್ತು ಎಂದು ವರದಿ ಹೇಳಿದೆ.