ನಾಣ್ಯ ಬೇಕಿಲ್ಲ, ಸ್ಕ್ಯಾನ್‌ ಮಾಡಿದರೆ ನೀರು ಬರುತ್ತೆ

Team Udayavani, Jul 6, 2023, 2:17 PM IST

ಬೆಂಗಳೂರು: ಶುದ್ಧ ಕುಡಿಯುವ ನೀರಿನ ಘಟಕದಲ್ಲಿ 5 ರೂ. ನಾಣ್ಯ ಹಾಕಿಯೇ ನೀರು ಪಡೆಯುವುದು ದೊಡ್ಡ ತಲೆನೋವಾಗಿತ್ತು. ಆದರೆ, ಇನ್ನು ಮುಂದೆ ಕಾಯಿನ್‌ಗಾಗಿ ಹುಡುಕಬೇಕಿಲ್ಲ. ಮೊಬೈಲ್‌ನಲ್ಲಿ ಸ್ಕ್ಯಾನ್‌ ಮಾಡಿ ಕ್ಷಣಮಾತ್ರದಲ್ಲಿ ನೀರು ಪಡೆಯಬಹುದು!

ಬೆಂಗಳೂರು ಸೇರಿದಂತೆ ರಾಜ್ಯದ ಹಳ್ಳಿಗಳು ಹಾಗೂ ನಗರ ಪ್ರದೇಶಗಳಲ್ಲಿ ಸಹಸ್ರಾರು ಶುದ್ಧ ಕುಡಿಯುವ ನೀರಿನ ಘಟಕವಿದೆ. ಪ್ರತಿದಿನ ನೂರಾರು ಗ್ರಾಹಕರು ಇಲ್ಲಿಗೆ ಭೇಟಿ ನೀಡಿ 5 ರೂ. ಕಾಯಿನ್‌ ಹಾಕಿಯೇ ನೀರು ಪಡೆಯಬೇಕಿತ್ತು. 5 ರೂ. ಕಾಯಿನ್‌ ಇಲ್ಲದೇ ಕುಡಿಯುವ ನೀರಿಗಾಗಿ ಪರದಾಡಿದ ಹಲವು ಉದಾಹರಣೆಗಳಿವೆ. ಇಂತಹ ಸಮಸ್ಯೆಗಳಿಗೆ ಮುಕ್ತಿ ನೀಡಲೆಂದು ಗ್ರಾಹಕ ಸ್ನೇಹಿ ಸ್ಕ್ಯಾನಿಂಗ್‌ ವ್ಯವಸ್ಥೆ ಜಾರಿಗೆ ಬಂದಿದೆ.

ಬೆಂಗಳೂರಿನ ರಾಘವನಗರ, ಮನೋರಾಯನಪಾಳ್ಯ, ಜಕ್ಕೂರು, ಮಲ್ಲತ್ತಹಳ್ಳಿ, ಬೆಳಗಾವಿಯ ಗೋಕಾಕ್‌ ಸೇರಿ 10 ಕಡೆ ಪ್ರಾಯೋಗಿಕವಾಗಿ ಈ ತಂತ್ರಜ್ಞಾನ ಅಳವಡಿಸಲಾಗಿದೆ. ಸಾರ್ವಜನಿಕರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾದ ಬೆನ್ನಲ್ಲೇ ಬೆಂಗಳೂರಿನಲ್ಲಿ ರುವ 10 ಸಾವಿರಕ್ಕೂ ಅಧಿಕ ಶುದ್ದ ಕುಡಿಯುವ ನೀರಿನ ಘಟಕದ ಮಾಲೀಕರು ತಮ್ಮ ಘಟಕಗಳಿಗೆ ಈ ವ್ಯವಸ್ಥೆ ಅಳವಡಿಸಲು ಮುಂದಾಗಿದ್ದಾರೆ.

ಸ್ಕ್ಯಾನ್‌ ಮಾಡಿ ನೀರು ಪಡೆಯುವುದು ಹೇಗೆ ?: ಶುದ್ಧ ನೀರಿನ ಘಟಕದ ಮುಂದೆ ಕ್ಯೂ ಆರ್‌ ಕೋಡ್‌ ಅಳವಡಿಸಲಾಗಿದೆ. ಅದರ ಕೆಳಗಿರುವ ಪೈಪಿನ ಕೆಳಗೆ ನೀರಿನ ಕ್ಯಾನ್‌ ಇಟ್ಟು ಮೊಬೈಲ್‌ನಲ್ಲಿ ಗೂಗಲ್‌ ಪೇ, ಫೋನ್‌ ಪೇ ಸೇರಿ ಯಾವುದೇ ಯುಪಿಐ ಮೂಲಕ ಕ್ಯೂಆರ್‌ ಕೋಡ್‌ ಸ್ಕ್ಯಾನ್‌ ಮಾಡಬೇಕು. ಆಗ ಮೊಬೈಲ್‌ನಲ್ಲಿ ತೋರಿಸುವ 5 ರೂ. ಅನ್ನು ಪೇ ಮಾಡಿದರೆ ಸಾಕು. ತಕ್ಷಣ ಕ್ಯಾನ್‌ಗೆ ನೀರು ತುಂಬಲಿದೆ. ಅಂಗಡಿಗಳಲ್ಲಿ ಪೇಟಿಎಂನಲ್ಲಿ ಕ್ಯೂಆರ್‌ ಕೋಡ್‌ ಸ್ಕ್ಯಾನ್‌ ಮಾಡಿ ವ್ಯಾಲೆಟ್‌ಗೆ ದುಡ್ಡು ಜಮೆಯಾದ ತಕ್ಷಣ ವಾಯಿಸ್‌ ನೋಟಿಫಿಕೇಶನ್‌ ಬರುವ ಮಾದರಿಯಲ್ಲಿ ಇಲ್ಲೂ ತಂತ್ರಜ್ಞಾನ ಅಳವಡಿಸಲಾಗಿದೆ.

ಒಂದೂವರೆ ವರ್ಷದ ಸಂಶೋಧನೆಯ ಫ‌ಲ: ಡಿಪ್ಲೊಮಾ ಎಂಜಿನಿಯರಿಂಗ್‌, ಬಿಸಿಎ ವ್ಯಾಸಂಗ ಮುಗಿದ ಬಳಿಕ ಹೊಸ ತಂತ್ರಜ್ಞಾನ ಸಂಶೋಧಿಸುವ ಹಂಬಲ ವಿತ್ತು. ಒಂದೂವರೆ ವರ್ಷ ಗಳಿಂದ ನಡೆಸಿದ ಸಂಶೋಧನೆಯ ಫ‌ಲವಾಗಿ ನೀರಿನ ಘಟಕದ ಸ್ಕ್ಯಾನಿಂಗ್‌ ತಂತ್ರಜ್ಞಾನ ಕಂಡು ಹಿಡಿದಿದ್ದೇನೆ. 1 ವರ್ಷ ಗ್ಯಾರಂಟಿ ನೀಡುತ್ತೇವೆ. ದೇಶದಲ್ಲಿ ಈ ಹಿಂದೆ ಕೆಲವು ಸಂಸ್ಥೆಗಳು ಇಂತಹ ವ್ಯವಸ್ಥೆ ಜಾರಿಗೆ ತರಲು ವಿಫ‌ಲ ಯತ್ನ ನಡೆಸಿದೆ ಎನ್ನುತ್ತಾರೆ ಈ ತಂತ್ರಜ್ಞಾನದ ಸಂಶೋಧಕ ಮೋಹನ್‌.

ನೀರಿನ ಘಟಕದ ಯಂತ್ರಕ್ಕೆ ಸಾಫ್ಟ್ವೇರ್‌ ಅಳವಡಿಕೆ : ಸ್ಪೀಕರ್‌ ಬಾಕ್ಸ್‌ಗಳನ್ನು ಪೇಟಿಎಂನವರು ಪೂರೈ ಸುತ್ತಾರೆ. ಇದಕ್ಕೆ ಹೆಚ್ಚುವರಿ ಮಾರ್ಪಾಡು ಮಾಡಿ ಸ್ಪೀಕರ್‌ ಬಾಕ್ಸ್‌ನೊಳಗೆ ಸಿಮ್‌ಕಾರ್ಡ್‌, ಮೈನ್‌ ಬೋರ್ಡ್‌, ಇಂಟರ್‌ನೆಟ್‌ ಪ್ಯಾಕ್‌ ನಂತಹ ವ್ಯವಸ್ಥೆ ಅಳವಡಿಸಲಾಗಿದೆ. ಅದರಿಂದ ಡೇಟಾ ತೆಗೆದುಕೊಳ್ಳುತ್ತೇವೆ. ಇನ್ನು ಕ್ಯೂಆರ್‌ ಕೋಡ್‌ ಅನ್ನು ಕೊಂಚ ಮಾರ್ಪಾಡು ಮಾಡಿ ಅದಕ್ಕೆ ಮುಂಗಡ ದುಡ್ಡು ಹಾಕುತ್ತೇವೆ. ಗ್ರಾಹಕರು 5 ರೂ. ಕಾಯಿನ್‌ ಅನ್ನು ಯಂತ್ರದೊಳಗೆ ಹಾಕಿದಾಗ ನೀರು ಬರುವ ತಂತ್ರಜ್ಞಾನಕ್ಕೆ ಈ ಸಾಫ್ಟ್ವೇರ್‌ ಅನ್ನು ಲಿಂಕ್‌ ಮಾಡಲಾಗಿದೆ. ಕನೆಕ್ಟರ್‌, ಅಡಾಪ್ಟರ್‌ನಂತಹ ಹಲವು ಉಪಕರಣ ಬಳಸಿ ಅಳವಡಿಸಲಾಗುತ್ತದೆ.

ಈ ಹಿಂದೆ ನೀರಿನ ಘಟಕದ ಮುಂದೆ ಜನ 5 ರೂ. ನಾಣ್ಯ ಸಿಗದೇ ಆಗಾಗ ನಮ್ಮಲ್ಲಿ ಚಿಲ್ಲರೆ ಕೇಳುತ್ತಿದ್ದರು. ಇದೀಗ ನಮ್ಮ ಘಟಕದಲ್ಲಿ ಸ್ಕ್ಯಾನರ್‌ ವ್ಯವಸ್ಥೆ ಅಳವಡಿಸಿದ ಮೇಲೆ ಈ ಸಮಸ್ಯೆ ಇಲ್ಲ. ಗ್ರಾಹಕರೂ ಖುಷಿಯಿಂದ ನೀರು ತೆಗೆದುಕೊಂಡು ಹೋಗುತ್ತಿದ್ದಾರೆ. – ಯೋಗೇಶ್‌, ನೀರಿನ ಘಟಕದ ಮಾಲೀಕ, ರಾಘವನಗರ

– ಅವಿನಾಶ ಮೂಡಂಬಿಕಾನ