ನೆಗೆಟಿವ್‌ ಇದ್ದರಷ್ಟೇ ಎಂಟ್ರಿ

ಏರ್‌ಶೋ ಪ್ರವೇಶಕ್ಕೆ ಕೋವಿಡ್‌ ಪರೀಕ್ಷೆ ಕಡ್ಡಾಯ

Team Udayavani, Jan 23, 2021, 11:44 AM IST

ಬೆಂಗಳೂರು: ನಗರದ ಯಲಹಂಕ ವಾಯುನೆಲೆ ಯಲ್ಲಿ ಫೆ.3ರಿಂದ 5ರವರೆಗೆ ನಡೆಯಲಿರುವ ಏರೋ ಶೋ ಪ್ರದರ್ಶನಕ್ಕೆ ಸಿದ್ಧತೆಗಳು ಭರದಿಂದ ಸಾಗಿದೆ. ಜಾಗತಿಕ ಮಹಾಮಾರಿ ಕೋವಿಡ್‌-19 ಸಂದರ್ಭದಲ್ಲಿ ನಡೆಯುತ್ತಿರುವ ವಿಶ್ವದ ಮೊದಲ ವೈಮಾನಿಕ ಪ್ರದರ್ಶನ ಮೇಳ ಇದಾಗಿದ್ದು ಭಾಗಿಯಾಗುವ ಎಲ್ಲರಿಗೂ ಕೋವಿಡ್‌ ಪರೀಕ್ಷೆ ಕಡ್ಡಾಯವಾಗಿದೆ. ಏರ್‌ಶೋ ವೀಕ್ಷಣೆಗೆ ಬರುವ 72 ಗಂಟೆಗೂ ಹಿಂದಿನ ಆರ್‌ಟಿಪಿಸಿಆರ್‌ ಪರೀಕ್ಷಾ ವರದಿ ತೋರಿಸಿ, ಪ್ರವೇಶ ಪಡೆಯಬೇಕು ಎಂದು ಭಾರತೀಯ ವಾಯುಪಡೆಯ ಏರ್‌ ಕಮಾಡರ್‌ ಶೈಲೇಂದ್ರ ಸೂದ್‌ ಶುಕ್ರವಾರ ನಡೆದ ಸುದ್ದಿಗೋಷ್ಠಿ ಯಲ್ಲಿ ಮಾಹಿತಿ ನೀಡಿದ್ದಾರೆ.

ಕೋವಿಡ್‌ ಹಾವಳಿ ಇರುವುದರಿಂದ ಸಾಧ್ಯವಾದಷ್ಟು ಭಾಗವಹಿಸುವವರ ಸಂಖ್ಯೆಯನ್ನು ತಗ್ಗಿಸಲಾಗುತ್ತಿದೆ. ಸಾಮಾನ್ಯವಾಗಿ 4ರಿಂದ 5 ದಿನಗಳು ನಡೆಯುತ್ತಿದ್ದ ಪ್ರದರ್ಶನವನ್ನು ಮೂರು ದಿನಗಳಿಗೆ ಸೀಮಿತಗೊಳಿಸಲಾಗಿದೆ. ಅಲ್ಲದೆ, ಒಂದು ದಿನಕ್ಕೆ ಒಟ್ಟಾರೆ 15 ಸಾವಿರ ಜನ ಭೇಟಿ ನೀಡಲು ಅವಕಾಶ ಕಲ್ಪಿಸಲಾಗಿದೆ. ಇದರಲ್ಲಿ 3 ಸಾವಿರ ಜನರಿಗೆ ಮಾತ್ರ ವೈಮಾನಿಕ ಪ್ರದರ್ಶನ ವೀಕ್ಷಣಾ ಪ್ರದೇಶ (ಎಡಿವಿಎ)ದಲ್ಲಿ ಪ್ರವೇಶ ಕಲ್ಪಿಸಲಾಗುತ್ತಿದೆ ಎಂದರು. ಪ್ರದರ್ಶನದಲ್ಲಿ ನಾಲ್ಕು ತುರ್ತು ವೈದ್ಯಕೀಯ ತಂಡಗಳನ್ನು ರಚಿಸಿದ್ದು, ಇದರಲ್ಲಿ 26 ವೈದ್ಯರು, 46 ವೈದ್ಯಕೀಯ ಸಿಬ್ಬಂದಿ, 5 ಆ್ಯಂಬುಲನ್ಸ್‌ಗಳನ್ನು ನಿಯೋಜಿಸಲಾಗುತ್ತಿದೆ. ಜತೆಗೆ 14 ಸರ್ಕಾರಿ ಮತ್ತು 48 ಖಾಸಗಿ ಆಸ್ಪತ್ರೆಗಳಲ್ಲಿ ವ್ಯವಸ್ಥೆ ಮಾಡಲಾಗಿದೆ. ನಾಲ್ಕು ಹೆಲಿಕಾಪ್ಟರ್‌ಗಳನ್ನೂ ಇದಕ್ಕಾಗಿ ಮೀಸಲಿಡಲಾಗಿದೆ ಎಂದರು.

ಆದರೆ, ಇದಕ್ಕಾಗಿ ಭಾರತೀಯ ವಾಯು ಪಡೆ ಎಲ್ಲ ಅಗತ್ಯ ಸಿದ್ಧತೆ ಗಳನ್ನೂ ಮಾಡಿ ಕೊಂಡಿದೆ. ಮೊದಲ ಬಾರಿಗೆ ಹೈಬ್ರಿಡ್‌ ಪ್ರದರ್ಶನ ನಡೆಯುತ್ತಿದ್ದು, ಹಿಂದೆಂದಿಗಿಂತ ಹೆಚ್ಚು ಜನ ಆನ್‌ಲೈನ್‌ ಮೂಲಕ ಇದರಲ್ಲಿ ಭಾಗವಹಿಸುವ ನಿರೀಕ್ಷೆ ಇದೆ ಎಂದರು.

ಕೋವಿಡ್‌ ಹಾವಳಿ ಹಿನ್ನೆಲೆಯಲ್ಲಿ ಆರು ತಿಂಗಳು ಮುಂಚಿತವಾಗಿಯೇ ಸಿದ್ಧತೆ ಮಾಡಿಕೊಳ್ಳಲಾಗುತ್ತಿದೆ. ಪ್ರದರ್ಶನದಲ್ಲಿ ವಿದೇಶಿ ಏರೋಬಾಟಿಕ್‌ ತಂಡಗಳು, ಯುದ್ಧವಿಮಾನಗಳ ಭಾಗವಹಿಸಲು ಈಗಲೂ ನೋಂದಣಿಗೆ ಮುಕ್ತ ಅವಕಾಶ ಇದೆ. ತಿಂಗಳಾಂತ್ಯಕ್ಕೆ ಎಷ್ಟು ತಂಡಗಳು ಭಾಗವಹಿಸಲಿವೆ ಎಂಬುದರ ಸ್ಪಷ್ಟಚಿತ್ರ ತಿಳಿಯಲಿದೆ. ಪ್ರಸ್ತುತ ಫ್ರಾನ್ಸ್‌, ಅಮೆರಿಕ ಸೇರಿದಂತ ಹಲವು ದೇಶಗಳಿಂದ ನೋಂದಣಿ ಮಾಡಿಕೊಂಡಿವೆ ಎಂದು ಹೇಳಿದರು.

ಇದನ್ನೂ ಓದಿ:ಸ್ಪೋಟಕ ಸಾಗಿಸುವವರನ್ನು ಬಿಟ್ಟು, ಮರಳು ತುಂಬಿದ ಗಾಡಿ ಮಾತ್ರ ವಶಪಡೆಯುತ್ತಾರೆ: ಖಾದರ್ ಆಕ್ರೋಶ

ಡ್ರೋಣ್‌ ನಿಷಿದ್ಧ

ವಿಮಾನಗಳ ಕಸರತ್ತು ಹಾಗೂ ಪ್ರದರ್ಶನದ ಹಿನ್ನೆಲೆಯಲ್ಲಿ ಜ. 24ರಿಂದ ಫೆ. 5ರವರೆಗೆ ಯಲಹಂಕ ವಾಯುನೆಲೆ ಸುತ್ತಲಿನ ಪ್ರದೇಶದಲ್ಲಿ ಡ್ರೋಣ್‌ ಹಾರಾಟ ನಿಷೇಧಿಸಲಾಗಿದೆ. ಅದೇ ರೀತಿ, ಹದ್ದು ಮತ್ತಿತರ ಪಕ್ಷಿಗಳ ಅಡತಡೆಯನ್ನು ತಪ್ಪಿಸಲು ವಾಯುನೆಲೆ ಸುತ್ತಲಿನ 10 ಕಿ.ಮೀ. ವ್ಯಾಪ್ತಿಯಲ್ಲಿ ಈಗಾಗಲೇ ಮಾಂಸ ಮತ್ತು ಮೀನು ಮಾರಾಟವನ್ನು ಬಿಬಿಎಂಪಿ ನಿಷೇಧಿಸಿದೆ. ಫೆ. 7ರವರೆಗೂ ಈ ನಿಯಮ ಜಾರಿಯಲ್ಲಿರಲಿದೆ