ಫೇಸ್‌ಬುಕ್‌ ಲೈವ್‌ನಲ್ಲಿ ಪ್ರಥಮ್‌ ಆತ್ಮಹತ್ಯೆ ಪ್ರಹಸನ

Team Udayavani, Apr 6, 2017, 12:36 PM IST

ಬೆಂಗಳೂರು: ಬಿಗ್‌ಬ್ಯಾಸ್‌ ಖ್ಯಾತಿಯ ಪ್ರಥಮ್‌ ನಿದ್ದೆ ಮಾತ್ರೆ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿದ್ದು, ಅವರನ್ನು ಖಾಸಗಿ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ. ಸದ್ಯ ಅವರು ಪ್ರಾಣಾಪಾಯದಿಂದ ಪಾರಾಗಿದ್ದಾರೆ. ಬುಧವಾರ ಮುಂಜಾನೆ ನಾಲ್ಕು ಗಂಟೆ ಸಮಯದಲ್ಲಿ ಈ ಘಟನೆ ನಡೆದಿದೆ. ಆತ್ಮಹತ್ಯೆ ಯತ್ನಕ್ಕೂ ಮುನ್ನ ಪ್ರಥಮ್‌ ಫೇಸ್‌ಬುಕ್‌ ಲೈವ್‌ ವಿಡಿಯೋ ಮಾಡಿದ್ದರು.

ವಿಡಿಯೋ ಮಾಡುತ್ತಲೇ ಪ್ರಥಮ್‌ ಎರಡು ನಿದ್ದೆ ಮಾತ್ರೆ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿದ್ದರು. ಇದನ್ನು ಕಂಡ ಕೆಲವರು ಕೂಡಲೇ ಅವರ ಆಪ್ತರು ಹಾಗೂ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ನಂತರ ಮನೆಗೆ ಧಾವಿಸಿ ಅಸ್ವಸ್ಥಗೊಂಡ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಪ್ರಥಮ್‌ ಅವರ ವಿಡಿಯೋ ವೈರಲ್‌ ಆಗಿದ್ದರಿಂದ ರಾಜ್ಯಾದ್ಯಂತ ಸುದ್ದಿಯಾಯಿತು.

ಬಿಗ್‌ಬಾಸ್‌ ರಿಯಾಲಿಟಿ ಶೋನಲ್ಲಿ ವಿಜೇತನಾಗಿದ್ದರಿಂದ ಗಳಿಸಿದ್ದ ಬಹುಮಾನ ಹಣ ತನಗೂ ನೀಡುವಂತೆ ಸ್ನೇಹಿತ ಲೋಕೇಶ್‌ ಎಂಬಾತ ಕಿರುಕುಳ ನೀಡುತ್ತಿದ್ದರಿಂದ ಬೇಸರಗೊಂಡು ಆತ್ಮಹತ್ಯೆಗೆ ಯತ್ನಿಸಿದ್ದಾಗಿ ಪ್ರಥಮ್‌ ವಿಡಿಯೋದಲ್ಲಿ ತಿಳಿಸಿದ್ದಾರೆ. ಅಲ್ಲದೆ, ಕೆಲವು ದೃಶ್ಯ ಮಾಧ್ಯಮಗಳ ವಿರುದ್ಧವೂ ಕಿರುಕುಳ ಆರೋಪ ಮಾಡಿದ್ದಾರೆ.

ಏನಿದು ಹಣದ ಜಗಳ?: ಪ್ರಥಮ್‌ ಹಾಗೂ ಸಿನಿಮಾ ನಿರ್ದೇಶಕ ಲೋಕೇಶ್‌ ಎಂಬಾಧಿತನ ನಡುವೆ ಹಣಕಾಸಿನ ವಿಚಾರವಾಗಿ ಜಗಳವಾಗಿತ್ತು. ಈ ವಿಚಾರವಾಗಿ ಲೋಕೇಶ್‌ನನ್ನು ಪ್ರಥಮ್‌ ಮೊಬೈಲ್‌ನಲ್ಲಿ ಅವಾಚ್ಯವಾಗಿ ನಿಂದಿಸಿದ್ದರು. ಇದರ ಜತೆಗೆ, ಕೆಲವರು ನನ್ನ ಹೆಸರು ಹೇಳಿಕೊಂಡು ಪ್ರಚಾರ ಪಡೆದುಕೊಳ್ಳುತ್ತಿದ್ದಾರೆ ಎಂದು ಪ್ರಥಮ್‌ ಸೆಲ್ಫಿ ವಿಡಿಯೋ ಮಾಡಿ ಫೇಸ್‌ಬುಕ್‌ಗೆ ಹಾಕಿದ್ದರು.

ಇದನ್ನು ಟೀಕಿಸಿ ಲೋಕೇಶ್‌ ಕೂಡ ಸೆಲ್ಫಿ ವಿಡಿಯೋ ಹಾಗೂ ಪ್ರಥಮ್‌ ನಿಂದನೆ ಮಾಡಿದ್ದ ಆಡಿಯೋವನ್ನು ಫೇಸ್‌ಬುಕ್‌ನಲ್ಲಿ ಪ್ರಕಟಿಸಿದ್ದರು. ಇದೇ ವಿಚಾರವಾಗಿ ಪ್ರಥಮ್‌ ಮತ್ತು ಲೋಕೇಶ್‌ ನಡುವೆ ಜಗಳವಾಗಿತ್ತು. ವಿಡಿಯೋ ಮತ್ತು ಆಡಿಯೋ ಅಳಿಸದಿದ್ದರೆ ಆತ್ಮಹತ್ಯೆ ಮಾಡಿಕೊಳ್ಳುವುದಾಗಿ ಲೋಕೇಶ್‌ಗೆ ಪ್ರಥಮ್‌ ಬೆದರಿಕೆಯೊಡ್ಡಿದ್ದರು. ಇದರಿಂದ ಗಾಬರಿಗೊಂಡ ಲೋಕೇಶ್‌ ಆಡಿಯೋ ಮತ್ತು ವಿಡಿಯೋವನ್ನು ಅಳಿಸಿದ್ದರು.

ಇದೇ ವಿಚಾರವಾಗಿ ಮಂಗಳವಾರ ರಾತ್ರಿ 11 ಗಂಟೆ ಸುಮಾರಿಗೆ ಲೋಕೇಶ್‌ಗೆ ಕರೆ ಮಾಡಿದ್ದ ಪ್ರಥಮ್‌ ಕುರುಬರಹಳ್ಳಿ ವೃತ್ತದ ಬಳಿ ಬರುವಂತೆ ತಿಳಿಸಿದ್ದ. ಅದರಂತೆ ಸ್ಥಳಕ್ಕೆ ಬಂದ ಲೋಕೇಶ್‌ ಜತೆ ಪ್ರಥಮ್‌ ಜಗಳ ತೆಗೆದ್ದರು ಎನ್ನಲಾಗಿದೆ. ಈ ವೇಳೆ ಕೆರಳಿದ ಪ್ರಥಮ್‌ ಲೋಕೇಶ್‌ ಮೇಲೆ ಹಲ್ಲೆ ನಡೆಸಿದ್ದಾರೆ. ಈ ಹಿನ್ನೆಲೆಯಲ್ಲಿ ಲೋಕೇಶ್‌ ಬಸವೇಶ್ವರನಗರ ಠಾಣೆಗೆ ಪ್ರಥಮ್‌ ವಿರುದ್ಧ ದೂರು ನೀಡಿದ್ದರು.

ತನ್ನ ವಿರುದ್ಧ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಾಗಿರುವುದು ಮಾಧ್ಯಮಗಳಲ್ಲಿ ಪ್ರಕಟವಾಗುತ್ತಿದ್ದಂತೆ ಪ್ರಥಮ್‌ ಫೇಸ್‌ಬುಕ್‌ ಲೈವ್‌ನಲ್ಲಿ ಸ್ನೇಹಿತ ಲೋಕೇಶ್‌ ಹಾಗೂ ಕೆಲ ದೃಶ್ಯಮಾಧ್ಯಮಗಳ ವಿರುದ್ಧ ಹರಿಹಾಯ್ದು ನಿದ್ದೆ ಮಾತ್ರೆ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿದ್ದಾರೆ ಎಂದು ಹೇಳಲಾಗಿದೆ.

ಫೇಸ್‌ಬುಕ್‌ ಲೈವ್‌ನಲ್ಲಿ ಪ್ರಥಮ್‌ ಹೇಳಿರುವುದಿದು: ಆತ್ಮಹತ್ಯೆ ಯತ್ನಕ್ಕೂ ಮುಂಚೆ ಭಾವನಾತ್ಮಕವಾಗಿ ಮಾತನಾಡಿರುವ ಪ್ರಥಮ್‌, ಯಾಕೋ ನನಗೆ ಈ ಬಟ್ಟೆ ಹಾಕಿಕೊಳ್ಳಬೇಕು ಎನಿಸಿತು. ಇದು “ಬಿಗ್‌ಬಾಸ್‌’ನಲ್ಲಿ ಗೆದ್ದಾಗ ಧರಿಸಿದ್ದ ಬಟ್ಟೆ. ಸ್ವಲ್ಪ ಮಾತನಾಡಬೇಕು ಎನಿಸಿತು. ಬೇಸರವಾಗಿದ್ದರೆ ಕ್ಷಮಿಸಿ.

“ಬಿಗ್‌ಬಾಸ್‌’ನಲ್ಲಿ ಗೆದ್ದ ಹಣ ಬಂದಿದೆ, ನಾನು ಮೊದಲೇ ಕಮಿಟ್‌ ಆಗಿದ್ದ ಪ್ರಕಾರ 50 ಲಕ್ಷ ರೂ. ಒಂದು ರೂ. ಕೂಡ ನನಗೆ ಬೇಡ ಅಂತ. ಈಗಲೂ ಅದೇ ಮಾತಿಗೆ ಬದ್ಧ. ನನಗೆ ಇತ್ತೀಚೆಗೆ ಮಾನಸಿಕವಾಗಿ ತುಂಬಾ ಡಿಸ್ಟರ್ಬ್ ಆಗುತ್ತಿದೆ. ಕೆಲವರು ತುಂಬಾ ಹರ್ಟ್‌ ಮಾಡುತ್ತಿದ್ದಾರೆ. ನಾನು ಮಾನಸಿಕ ಹಿಂಸೆಯಲ್ಲಿದ್ದೇನೆ.

ನಾನು ಏನೇ ಮಾಡಿದರೂ, ಬೇರೆ ರೀತಿ ಪ್ರಚಾರ ಮಾಡುತ್ತಿದ್ದಾರೆ’ ಎನ್ನುತ್ತಲೇ ಕಣ್ಣೀರಿಟ್ಟಿದ್ದು, “ಲೋಕಿ ನನಗೆ ತುಂಬಾ ಹರ್ಟ್‌ ಮಾಡುತ್ತಿದ್ದೀಯಾ. ತುಂಬಾ ನೋವು ಕೊಡುತ್ತಿದ್ದೀಯಾ, ತುಂಬಾ ಚಿತ್ರಹಿಂಸೆ ಕೊಡುತ್ತಿದ್ದೀಯಾ… ಇನ್ನು ನನ್ನ ಕೈಯಲ್ಲಿ ಬದುಕೋಕೆ ಆಗಲ್ಲ, ನನಗೆ ಏನೇ ಆದರೂ ನೀನೇ ಕಾರಣ’ ಎಂದೂ ಹೇಳಿರುವುದು ದಾಖಲಾಗಿದೆ.

ಪ್ರಥಮ್‌ ವಿರುದ್ಧ ದೂರು?
ಸುಪ್ರೀಂಕೋರ್ಟ್‌ ತೀರ್ಪು ಪ್ರಕಾರ ಆತ್ಮಹತ್ಯೆ ಮಾಡಿಕೊಳ್ಳುವುದು ಅಪರಾಧ. ಹೀಗಾಗಿ, ಪ್ರಥಮ್‌ ವಿರುದ್ಧ ಪೊಲೀಸರು ದೂರು ದಾಖಲಿಸುವ ಸಾಧ್ಯತೆಯಿದೆ ಎಂದು ಪೊಲೀಸ್‌ ಮೂಲಗಳು ತಿಳಿಸಿವೆ.

ಪ್ರಥಮ್‌ ಹಲ್ಲೆ ನಡೆಸಿದ್ದಾರೆ ಎಂದು ಸಿನಿಮಾ ನಿರ್ದೇಶಕ ಲೋಕೇಶ್‌ ದೂರು ನೀಡಿದ್ದಾರೆ. ಸದ್ಯ ಪ್ರಥಮ್‌ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಗುಣಮುಖರಾದ ಬಳಿಕ ಪ್ರಥಮ್‌ ಹೇಳಿಕೆ ಆಧರಿಸಿ ತನಿಖೆ ನಡೆಸಲಾಗುವುದು.
-ಎಂ.ಎನ್‌.ಅನುಚೇತ್‌, ಡಿಸಿಪಿ