ನಕಲಿ ಇ-ಮೇಲ್‌ ಕಳುಹಿಸಿ 5 ಲಕ್ಷ ರೂ. ವಂಚನೆ

Team Udayavani, Mar 5, 2022, 12:19 PM IST

ಬೆಂಗಳೂರು: ನಕಲಿ ಇ-ಮೇಲ್‌ ವಿಳಾಸ ಬಳಸಿ ಖಾಸಗಿ ಕಂಪನಿ ಉದ್ಯೋಗಿಯಿಂದ ಸೈಬರ್‌ ವಂಚಕರು 5 ಲಕ್ಷ ರೂ. ದೋಚಿದ್ದಾರೆ. ಈ ಸಂಬಂಧ ಮುನ್ನೇನಕೊಳಲು ನಿವಾಸಿ ಶ್ರೀರಾಮ್‌ ಎಂಬುವವರು ವೈಟ್‌ ಫೀಲ್ಡ್‌ ಸೆನ್‌ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ.

ಖಾಸಗಿ ಕಂಪನಿ ಉದ್ಯೋಗಿಯಾಗಿರುವ ಶ್ರೀರಾಮ್‌, ಪ್ರಾಪರ್ಟಿಸ್‌ ಪ್ರೈವೇಟ್‌ ಲಿಮಿಡೆಟ್‌ ವೊಂದರಲ್ಲಿ ಫ್ಲ್ಯಾಟ್‌ ಖರೀದಿಗೆ ಚಿಂತಿಸಿದ್ದರು.  ಈ ಮಧ್ಯೆ 2021ರ ಜುಲೈನಲ್ಲಿ ಆ ಕಂಪನಿಯ ಹೆಸರ ಬಳಸಿಕೊಂಡು ಅಶೋಕ್‌ಕುಮಾರ್‌ ಎಂಬ ನಕಲಿ ಇ-ಮೇಲ್‌ ವಿಳಾಸದಿಂದ ಫ್ಲ್ಯಾಟ್‌ ಖರೀದಿ ವಿಚಾರ ಪ್ರಸ್ತಾಪಿಸಿ ಸಂದೇಶ ಕಳುಹಿಸಿದ್ದಾರೆ. ಅಲ್ಲದೆ, ಫ್ಲ್ಯಾಟ್‌ ಬೇಕಾದಲ್ಲಿ ಈ ಬ್ಯಾಂಕ್‌ ಖಾತೆಗೆ ಹಣ ವರ್ಗಾವಣೆ ಮಾಡಬೇಕೆಂದು ಸೂಚಿಸಿದ್ದಾರೆ.ಅದನ್ನು ನಂಬಿದ ಶ್ರೀರಾಮ್‌, ಹಂತ-ಹಂತವಾಗಿ 5,31,379 ರೂ. ವರ್ಗಾವಣೆ ಮಾಡಿದ್ದಾರೆ. ಅನಂತರ ಕಂಪನಿ ಸಂಪರ್ಕಿಸಿದಾಗ ನಕಲಿ ಎಂಬುದು ಗೊತ್ತಾಗಿದೆ.

ಕೂಡಲೇ ಪೊಲೀಸ್‌ ಠಾಣೆಗೆ ದೂರು ನೀಡಿದ್ದಾರೆ. ತನಿಖೆ ನಡೆಯುತ್ತಿದೆ ಎಂದು ಪೊಲೀಸರು ಹೇಳಿದರು.