ಕೆಎಎಸ್‌ ಅಧಿಕಾರಿ ಟಿ.ಕೆ.ಗೌಡ ವಿರುದ್ಧ ಎಫ್ಐಆರ್‌ ದಾಖಲು

Team Udayavani, Mar 14, 2018, 12:08 PM IST

ಬೆಂಗಳೂರು: ರಾಜ್ಯ ಯುವಜನ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆಯ 13 ಲಕ್ಷ ಹಣ ದುರ್ಬಳಕೆ ಆರೋಪದ ಮೇಲೆ ಹಿರಿಯ ಕೆಎಎಸ್‌ ಅಧಿಕಾರಿ ಟಿ.ಕೆ.ಗೌಡರ ವಿರುದ್ಧ ಇಲಾಖೆಯ ಜನರಲ್‌ ತಿಮ್ಮಯ್ಯ ರಾಷ್ಟ್ರೀಯ ಸಾಹಸ ಅಕಾಡೆಮಿ ಆಡಳಿತಾಧಿಕಾರಿ ಜೀತೇಂದ್ರ ಶೆಟ್ಟಿ ಹಲಸೂರು ಗೇಟ್‌ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ.

2007 ಆಗಸ್ಟ್‌ ನಿಂದ 2009ರ ಮಾರ್ಚ್‌ವರೆಗೆ ಜನರಲ್‌ ತಿಮ್ಮಯ್ಯ ರಾಷ್ಟ್ರೀಯ ಸಾಹಸ ಅಕಾಡೆಮಿ ಆಡಳಿತಾಧಿಕಾರಿಯಾಗಿ ಕರ್ತವ್ಯ ನಿರ್ವಹಿಸಿದ್ದ ಟಿ.ಕೆ.ಗೌಡ, ತಮ್ಮ ಅಧಿಕಾರವಧಿಯಲ್ಲಿ ಜೇತನಾ ವತಿಯಿಂದ ಆಯೋಜಿಸಿದ್ದ ಸಾಹಸ ಕ್ರೀಡಾ ಕಾರ್ಯಕ್ರಮಗಳಿಗೆ ಇಲಾಖೆಯಿಂದ ಮೀಸಲಿಟ್ಟ 16.16 ಲಕ್ಷ ಹಣವನ್ನು ಮುಂಗಡವಾಗಿ ಪಡೆದುಕೊಂಡಿದ್ದಾರೆ.

ಮೂರು ಲಕ್ಷಕ್ಕೆ ಮಾತ್ರ ಲೆಕ್ಕ ನೀಡಿದ್ದರು. ಲೆಕ್ಕ ಪರಿಶೋಧನೆ ವೇಳೆ ದುರ್ಬಳಕೆ ಪತ್ತೆಯಾಗಿದೆ ಎಂದು ಪೊಲೀಸರು ತಿಳಿಸಿದರು. ಮಾ.24 ಇಲಾಖೆಯ ಸಚಿವ ಡಾ.ಪ್ರಮೋದ್‌ ಮಧ್ವರಾಜ್‌ ನೇತೃತ್ವದಲ್ಲಿ ಆಡಳಿತ ಮಂಡಳಿ ಸಭೆ ನಡೆದಿತ್ತು. ಈ ಸಭೆಯಲ್ಲಿ ಇಲಾಖೆ ಕಾರ್ಯದರ್ಶಿ ಹಾಗೂ ನಿರ್ದೇಶಕರು ಪಾಲ್ಗೊಂಡಿದ್ದರು.

ಇಲಾಖೆಯಲ್ಲಿ ಲಕ್ಷಾಂತರ ರೂ. ಹಣ ದುರ್ಬಳಕೆ ಮಾಡಿಕೊಂಡಿರುವ ಕುರಿತು ಸಚಿವರು ಹಾಗೂ ಹಿರಿಯ ಅಧಿಕಾರಿಗಳ ಗಮನಕ್ಕೆ ಬಂದಾಗ ಆರೋಪಿತ ಅಧಿಕಾರಿಯ ವಿರುದ್ಧ ದೂರು ನೀಡುವಂತೆ  ಸಭೆಯಲ್ಲಿ ನಿರ್ಣಯಕೈಗೊಳ್ಳಲಾಯಿತು. ಅದರಂತೆ ಜಿತೇಂದ್ರ ಶೆಟ್ಟಿ ದೂರಿತ್ತಿದ್ದಾರೆ.