ಸಿನಿಮೀಯವಾಗಿ ಮೊಬೈಲ್‌ ಕಳ್ಳರನ್ನು ಬೆನ್ನಟ್ಟಿ ಹಿಡಿದ ಬಿಬಿಎಂಪಿ ಮಾಜಿ ಕಾರ್ಪೋರೇಟರ್‌!

Team Udayavani, Dec 16, 2024, 1:17 PM IST

ಬೆಂಗಳೂರು: ಮಾರಕಾಸ್ತ್ರ ತೋರಿಸಿ ಮೊಬೈಲ್‌ ಕಳ್ಳತನ ಮಾಡಿ ಪರಾರಿಯಾಗುತ್ತಿದ್ದ ಕಳ್ಳರನ್ನು ಬೆನ್ನಟ್ಟಿದ ಮಾಜಿ ಕಾರ್ಪೋರೇಟರ್‌ ಗಣೇಶ್‌ ರೆಡ್ಡಿ ಎಂಬುವರು ಕಾರು ಗುದ್ದಿಸಿ ಮೊಬೈಲ್‌ ವಾಪಸ್‌ ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ.

ಭಾನುವಾರ ಮುಂಜಾನೆ 5 ಗಂಟೆ ಸುಮಾರಿಗೆ ಎಚ್‌ಬಿಆರ್‌ ಲೇಔಟ್‌ನಲ್ಲಿ ಮಾರಕಾಸ್ತ್ರ ತೋರಿಸಿ ವ್ಯಕ್ತಿಯೊಬ್ಬರ ಮೊಬೈಲ್‌ ಕದ್ದು ಪರಾರಿಯಾಗಿದ್ದರು. ಅದೇ ವೇಳೆ ಸ್ಕಾಫಿಯೋ ಕಾರಿನಲ್ಲಿ ಬಂದ ಗಣೇಶ್‌ ರೆಡ್ಡಿ, ಮೊಬೈಲ್‌ ಕಳೆದುಕೊಂಡ ವ್ಯಕ್ತಿಯನ್ನು ಕಾರಿನಲ್ಲಿ ಕೂರಿಸಿಕೊಂಡು ಆರೋಪಿಗಳ ಬೆನ್ನು ಬಿದ್ದಿದ್ದಾರೆ. ಬಳಿಕ ಸಮೀಪದಲ್ಲೇ ಆರೋಪಿಗಳ ಬೈಕ್‌ಗೆ ಡಿಕ್ಕಿ ಹೊಡೆದು ಕೆಳಗೆ ಬೀಳಿಸಿದ್ದಾರೆ. ಆದರೆ, ಆರೋಪಿಗಳು ಮಾರಕಾಸ್ತ್ರ ತೋರಿಸಿ ಬೆದರಿಸಿದ್ದರು. ಆದರೂ ಅಂಜದೆ ಗಣೇಶ್‌ ರೆಡ್ಡಿ ಆರೋಪಿಗಳಿಗೆ ಬೆದರಿಸಿ ಮೊಬೈಲ್‌ ವಾಪಸ್‌ ಪಡೆದುಕೊಂಡಿದ್ದಾರೆ.

ಈ ಕುರಿತು ಮಾಧ್ಯಮಗಳಿಗೆ ಪ್ರತಿಕ್ರಿಯೆ ನೀಡಿದ ಗಣೇಶ್‌ ರೆಡ್ಡಿ, ಭಾನುವಾರ ಬೆಳಗ್ಗೆ 5.40ಕ್ಕೆ ನಾನು ಜಿಮ್‌ ಗೆ ಹೋಗುತ್ತಿದ್ದೆ. ರಸ್ತೆಯಲ್ಲಿ ಒಬ್ಬ ಹುಡುಗ ಮೊಬೈಲ್‌ ಕಳ್ಳತನ ಆಗಿದೆ ಎಂದು ಓಡಿ ಬಂದ. ಇಬ್ಬರು ಹುಡುಗರು ಬೈಕ್‌ನಲ್ಲಿ ಪಾಸ್‌ ಆಗುವುದನ್ನು ನಾನು ನೋಡಿದೆ. ತಕ್ಷಣ ಹುಡುಗನನ್ನು ಕಾರಿನಲ್ಲಿ ಕೂರಿಸಿಕೊಂಡು ಬೈಕ್‌ ಚೇಸ್‌ ಮಾಡಿದೆ. ಎಚ್‌ಬಿಆರ್‌ ಲೇಔಟ್‌ 8ನೇ ಕ್ರಾಸ್‌ ಬಳಿ ನನ್ನ ಕಾರು ಅವರ ಬೈಕ್‌ಗೆ ತುಗುಲಿತು. ಆ ಇಬ್ಬರು ಹುಡುಗರಲ್ಲಿ ಒಬ್ಬ ಮಾರಕಾಸ್ತ್ರ ತೆಗೆದು ಬೆದರಿಸಿದ. ಆಗ ನಾನು ಮೊಬೈಲ್‌ ವಾಪಸ್‌ ಕೊಡು, ಇಲ್ಲ ಅಂದರೆ ನಿಮ್ಮ ಬೈಕ್‌ ಸ್ಟೇಷನ್‌ಗೆ ತೆಗೆದುಕೊಂಡು ಹೋಗುತ್ತೇನೆಂದು ಬೆದರಿಸಿದೆ. ಬಳಿಕ ಮೊಬೈಲ್‌ ಎಸೆದು ಇಬ್ಬರು ಪರಾರಿಯಾದರು. ಬಳಿಕ ಆ ಹುಡುಗನಿಗೆ ಮೊಬೈಲ್‌ ಕೊಟ್ಟು ವಾಪಸ್‌ ಹೋದೆ ಎಂದು ತಿಳಿಸಿದ್ದಾರೆ.