ಮಾಜಿ ಪ್ರೇಯಸಿಗೆ ಕಿರುಕುಳ: ಆರೋಪಿ ಬಂಧನ

Team Udayavani, May 12, 2019, 3:02 AM IST

ಬೆಂಗಳೂರು: ಮಾಜಿ ಪ್ರೇಯಸಿಯ ಖಾಸಗಿ ಫೋಟೋಗಳನ್ನು ಬಹಿರಂಗಪಡಿಸುವುದಾಗಿ ಕಿರುಕುಳ ನೀಡುತ್ತಿದ್ದ ಆರೋಪಿಯನ್ನು ತಲ್ಲಘಟ್ಟಪುರ ಪೊಲೀಸರು ಬಂಧಿಸಿದ್ದಾರೆ.

ಆಂಧ್ರಪ್ರದೇಶ ಮೂಲದ ಭಾಸ್ಕರ್‌ ನರದಾಸಿ (29) ಬಂಧಿತ. 27 ವರ್ಷದ ಸಂತ್ರಸ್ತೆ ನೀಡಿದ ದೂರಿನ ಆಧಾರದ ಮೇಲೆ ಆರೋಪಿಯನ್ನು ಬಂಧಿಸಲಾಗಿದೆ ಎಂದು ಪೊಲೀಸರು ಹೇಳಿದರು.

2012ರಲ್ಲಿ ಸ್ನೇಹಿತರೊಬ್ಬರ ಮೂಲಕ ಆರೋಪಿ ಭಾಸ್ಕರ್‌ನನ್ನು ಸಂತ್ರಸ್ತೆ ಪರಿಚಯ ಮಾಡಿಕೊಂಡಿದ್ದಾರೆ. ಆ ನಂತರ ಇಬ್ಬರ ಸ್ನೇಹ, ಪ್ರೀತಿಗೆ ತಿರುಗಿತ್ತು. ಈ ವೇಳೆ ಇಬ್ಬರೂ ಒಟ್ಟಿಗೆ ಇರುವಂತಹ ಕೆಲ ಫೋಟೋಗಳನ್ನು ಆರೋಪಿ ತೆಗೆದುಕೊಂಡಿದ್ದ. ಈ ಮಧ್ಯೆ ಇಬ್ಬರೂ ಜಗಳ ಮಾಡಿಕೊಂಡು ದೂರವಾಗಿದ್ದರು.

ಹೀಗಾಗಿ ಆರೋಪಿ 2015ರಿಂದ ಪ್ರತಿನಿತ್ಯ ಕರೆ ಮಾಡಿ, “ನಾನು ಹೇಳಿದಂತೆ ಕೇಳದಿದ್ದರೆ ನ‌ನ್ನ ಬಳಿಯಿರುವ ಫೋಟೋಗಳನ್ನು ಸಂಬಂಧಿಕರು ಹಾಗೂ ಸ್ನೇಹಿತರಿಗೆ ಕಳುಹಿಸುತ್ತೇನೆ’ ಎಂದು ಕಿರುಕುಳ ನೀಡುತ್ತಿದ್ದ.

ಈ ವಿಚಾರ ತಿಳಿದು ಸಂತ್ರಸ್ತೆಯ ಪೋಷಕರು ಕೂಡ ಆರೋಪಿಗೆ ಬುದ್ದಿ ಹೇಳಿದ್ದರು. ಕೆಲ ದಿನಗಳು ಸುಮ್ಮನಿದ್ದ ಆರೋಪಿ, ಕಳೆದ ಏಪ್ರಿಲ್‌ನಿಂದ ಮತ್ತೆ ಫೋನ್‌ ಕರೆ ಮಾಡಿ, “ನಾನು ಕರೆದಲ್ಲಿ ಬರಬೇಕು.

ಇಲ್ಲವಾದಲ್ಲಿ ಭಾವಚಿತ್ರಗಳನ್ನು ಬಹಿರಂಗ ಪಡಿಸುತ್ತೇನೆ’ ಎಂದು ಕಿರುಕುಳ ನೀಡುತ್ತಿದ್ದಾನೆ ಎಂದು ಸಂತ್ರಸ್ತೆ ಮೇ 1ರಂದು ದೂರು ನೀಡಿದ್ದರು. ಈ ಸಂಬಂಧ ಪ್ರಕರಣ ದಾಖಲಿಸಿಕೊಂಡ ಪೊಲೀಸರು, ಆರೋಪಿಯನ್ನು ಬಂಧಿದ್ದಾರೆ. ತಲ್ಲಘಟ್ಟಪುರ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.