ದೇಶದ ರೈಲು ನಿಲ್ದಾಣಗಳ ಅಭಿವೃದ್ಧಿ ಫ್ರಾನ್ಸ್‌ನ ನೆರವು

Team Udayavani, Jun 13, 2019, 3:00 AM IST

ಬೆಂಗಳೂರು: ದೇಶದಲ್ಲಿನ ರೈಲು ನಿಲ್ದಾಣಗಳ ಅಭಿವೃದ್ಧಿಗೆ ಫ್ರಾನ್ಸ್‌ ನೆರವು ನೀಡಲಿದೆ. ಈ ಉದ್ದೇಶಕ್ಕಾಗಿ ಭಾರತೀಯ ರೈಲು ನಿಲ್ದಾಣ ಅಭಿವೃದ್ಧಿ ನಿಗಮ ನಿಯಮಿತ (ಐಆರ್‌ಎಸ್‌ಡಿಸಿ) ಮತ್ತು ಫ್ರಾನ್ಸ್‌ನ ರೈಲ್ವೆ ಇಲಾಖೆ ಸೋಮವಾರ ಒಪ್ಪಂದಕ್ಕೆ ಸಹಿ ಹಾಕಿವೆ.

ರೈಲ್ವೆ ಖಾತೆ ಸಹಾಯಕ ಸಚಿವ ಸುರೇಶ್‌ ಅಂಗಡಿ ಮತ್ತು ಫ್ರಾನ್ಸ್‌ನ ಐರೋಪ್ಯ ಮತ್ತು ವಿದೇಶಾಂಗ ಖಾತೆ ಸಹಾಯಕ ಸಚಿವ ಜೀನ್‌ ಬ್ಯಾಪ್ಟಿಸ್ಟ್‌ ಲಿಮೋನ್‌ ನಡುವಿನ ಮಾತುಕತೆ ಬಳಿಕ ಈ ನಿರ್ಧಾರಕ್ಕೆ ಬರಲಾಗಿದೆ. ಒಪ್ಪಂದದ ಅನ್ವಯ ಫ್ರಾನ್ಸ್‌ 7 ಲಕ್ಷ ಯೂರೋಗಳನ್ನು ಫ್ರಾನ್ಸ್‌ನ ನ್ಯಾಷನಲ್‌ ರೈಲ್ವೇ-ಹಬ್‌ ಆ್ಯಂಡ್‌ ಕನೆಕ್ಷನ್ಸ್‌ ಮೂಲ ನೀಡಲಿದೆ.

ಜತೆಗೆ ಐಆರ್‌ಎಸ್‌ಡಿಸಿ ಗೆ ತಾಂತ್ರಿಕ ನೆರವನ್ನೂ ನೀಡಲಿದೆ. ಫ್ರಾನ್ಸ್‌ ನೀಡುವ ನೆರವಿನಿಂದ ಭಾರತೀಯ ರೈಲ್ವೆ ಮತ್ತು ಐಆರ್‌ಎಸ್‌ಡಿಸಿಗೆ ಯಾವುದೇ ರೀತಿಯಲ್ಲಿ ವಿತ್ತೀಯ ಹೊರೆ ಉಂಟಾಗುವುದಿಲ್ಲ. ಈ ಬಗ್ಗೆ ಪ್ರತಿಕ್ರಿಯೆ ನೀಡಿದ ಸುರೇಶ್‌ ಅಂಗಡಿ “ಭಾರತ ಮತ್ತು ಫ್ರಾನ್ಸ್‌ ನಡುವಿನ ಸಹಯೋಗವನ್ನು ಮತ್ತಷ್ಟು ವೃದ್ಧಿಸುವ ನಿಟ್ಟಿನಲ್ಲಿ ಈ ಒಪ್ಪಂದ ನೆರವಾಗಲಿದೆ. ಜತೆಗೆ ಭಾರತೀಯ ರೈಲ್ವೆ ವ್ಯವಸ್ಥೆಯನ್ನು ವಿಶ್ವದರ್ಜೆಗೆ ಏರಿಸುವುದಕ್ಕೆ ನೆರವಾಗಲಿದೆ’ ಎಂದಿದ್ದಾರೆ.