ಒಳ್ಳೆ ಹೆಸರು ಉಳಿಸಿಕೊಳ್ಳೋದು ಕಷ್ಟ 

Team Udayavani, Jun 5, 2017, 12:22 PM IST

ಬೆಂಗಳೂರು: ಸಾರ್ವಜನಿಕ ಜೀವನದಲ್ಲಿ ಒಳ್ಳೆಯ ಹೆಸರು ಉಳಿಸಿಕೊಳ್ಳುವುದು, ಗಾಂಧೀಜಿಯವರ ತತ್ವ ಪಾಲಿಸುವುದು ಎರಡೂ ಅತ್ಯಂತ ಕಷ್ಟಕರ ಕೆಲಸ ಎಂದು ಮಾಜಿ ಶಿಕ್ಷಣ ಸಚಿವ ಕಿಮ್ಮನೆ ರತ್ನಾಕರ ಅಭಿಪ್ರಾಯಪಟ್ಟರು. 

ಕೋಣಂದೂರು ವೆಂಕಪ್ಪಗೌಡ ಪ್ರತಿಷ್ಠಾನವು ಕನ್ನಡ ಸಾಹಿತ್ಯ ಪರಿಷತ್ತಿನಲ್ಲಿ ಭಾನುವಾರ ಆಯೋಜಿಸಿದ್ದ ಸಮಾರಂಭದಲ್ಲಿ ಸಾರ್ವಜನಿಕ ಗ್ರಂಥಾಲಯ ಇಲಾಖೆಯ ನಿವೃತ್ತ ನಿರ್ದೇಶಕ ಕೆ.ಜಿ. ವೆಂಕಟೇಶ್‌ ಅವರಿಗೆ “ಕೋಣಂದೂರು ವೆಂಕಪ್ಪಗೌಡ ಪ್ರಶಸ್ತಿ’ ಪ್ರದಾನ ಮಾಡಿ ಅವರು ಮಾತನಾಡಿದರು.

“ಸಾರ್ವಜನಿಕ ಕ್ಷೇತ್ರದಲ್ಲಿ ಒಳ್ಳೆಯ ಹೆಸರು ಗಳಿಸಿದ್ದ ಶಾಂತವೇರಿ ಗೋಪಾಲಗೌಡ ಅವರು ಅತ್ಯಂತ ಪ್ರಾಮಾಣಿಕರು ಮತ್ತು ನಿಷ್ಠೆಯುಳ್ಳವರು. ನನಗೆ ರಾಜಕೀಯ ಗುರುವೂ ಆಗಿದ್ದರು. ಆದರೆ ಅಂದಿನ ರಾಜಕಾರಣಕ್ಕೂ, ಈಗಿನ ರಾಜಕಾರಣಕ್ಕೂ ಅಜಗಜಾಂತರ ವ್ಯತ್ಯಾಸವಿದೆ. ಪ್ರಸ್ತುತ ಸಾರ್ವಜನಿಕ ಬದುಕಿನಲ್ಲಿ ಒಳ್ಳೆಯ ಹೆಸರು ಉಳಿಸಿಕೊಳ್ಳುವುದು ಕಷ್ಟ,’ ಎಂದರು. 

“ದೇಶದಲ್ಲಿ ಮತದಾರರು ಜಾತಿ, ಧರ್ಮ, ಹಣಕ್ಕೆ ಮಾನ್ಯತೆ ನೀಡದೆ ಅರ್ಹತೆ ನೋಡಿ ಎಲ್ಲಿಯವರೆಗೆ ಮತ ಹಾಕುವುದಿಲ್ಲವೋ ಅಲ್ಲಿಯವರೆಗೆ ಸಮಾಜ ಬದಲಾಗಲು ಸಾಧ್ಯವಿಲ್ಲ. ಆಸೆ, ಆಮಿಷಗಳಿಗೆ ಬಲಿಯಾಗಿ ಓಟು ಹಾಕುವಂತಹ ರಾಜಕಾರಣಿಗಳಿಂದ ನೀವು ಏನನ್ನೂ ನಿರೀಕ್ಷಿಸಬಾರದು.

ಕೋಣಂದೂರು ವೆಂಕಪ್ಪಗೌಡ ಅವರು ಜೀವನದುದ್ದಕ್ಕೂ ಹೋರಾಟ ಮಾಡುತ್ತಲೇ ಬಂದಿದ್ದರೂ ಪ್ರಾಮಾಣಿಕರಾಗಿದ್ದರು. ಅವರಂಥ ಸಾಧಕರ ಹೆಸರಿನಲ್ಲಿ ಸ್ಥಾಪಿಸಲಾಗಿರುವ ಪ್ರಶಸ್ತಿಯನ್ನು ಕೆ.ಜಿ. ವೆಂಕಟೇಶ್‌ ಅವರಿಗೆ ನೀಡುತ್ತಿರುವುದು ಅರ್ಥಪೂರ್ಣವಾಗಿದೆ,’ ಎಂದು ಹೇಳಿದರು.

ಕಾರ್ಯಕ್ರಮದಲ್ಲಿ ಬೆಂಗಳೂರು ತಾಂತ್ರಿಕ ಮಹಾವಿದ್ಯಾಲಯದ ನಿರ್ದೇಶಕ ಪ್ರೊ. ಕೆ. ಮಲ್ಲಯ್ಯ, ವೆಂಕಪ್ಪಗೌಡ ಪ್ರತಿಷ್ಠಾನದ ಅಧ್ಯಕ್ಷೆ ನಳಿನಿ ವೆಂಕಪ್ಪ, ಸಾಹಿತಿ ಶೂದ್ರ ಶ್ರೀನಿವಾಸ್‌, ಪತ್ರಕರ್ತ ಇ.ವಿ. ಸತ್ಯನಾರಾಯಣ ಮತ್ತಿತರರು ಉಪಸ್ಥಿತರಿದ್ದರು.