ವಾಯುವಜ್ರದಲ್ಲಿ ಗುಂಪು ಟಿಕೆಟ್‌ಗೆ ರಿಯಾಯಿತಿ

Team Udayavani, Jan 28, 2018, 11:19 AM IST

ಬೆಂಗಳೂರು: ಮಾಸಿಕ ಬಸ್‌ ಪಾಸ್‌, ರಿಯಾಯಿತಿ ಬಸ್‌ ಪಾಸ್‌ ನಂತರ ಇದೀಗ ಬಿಎಂಟಿಸಿಯಲ್ಲಿ ಹವಾನಿಯಂತ್ರಿತ (ವಜ್ರ ಹಾಗೂ ವಾಯುವಜ್ರ) ಬಸ್‌ಗಳಲ್ಲಿ ಗುಂಪು ಟಿಕೆಟ್‌ ಖರೀದಿಗೆ ಶೇ.15ರಷ್ಟು ರಿಯಾಯಿತಿ ಯೋಜನೆ ಜಾರಿಗೆ ತರಲಾಗಿದೆ. 

ಒಮ್ಮಲೆ ಮೂರು ಅಥವಾ ಮೂರಕ್ಕಿಂತ ಹೆಚ್ಚು ಟಿಕೆಟ್‌ ಖರೀದಿಸಿದರೆ ಶೇ.15 ರಷ್ಟು ರಿಯಾಯಿತಿ ದೊರೆಯಲಿದೆ. ಶನಿವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಸಾರಿಗೆ ಸಚಿವ ಎಚ್‌.ಎಂ.ರೇವಣ್ಣ, ಇಂದಿನಿಂದಲೇ ಬಿಎಂಟಿಸಿಯಲ್ಲಿ ವಜ್ರ ಹಾಗೂ ವಾಯುವಜ್ರ ಬಸ್‌ಗಳಲ್ಲಿ ಗುಂಪು ಟಿಕೆಟ್‌ ಯೋಜನೆ, ರಿಯಾಯಿತಿ ಸೌಲಭ್ಯ ಜಾರಿಯಾಗಲಿದೆ ಎಂದು ತಿಳಿಸಿದ್ದಾರೆ.

“ಸಾರ್ವಜನಿಕರು ಕುಟುಂಬ ಸಮೇತ ಬಿಎಂಟಿಸಿ ಬಸ್ಸುಗಳಲ್ಲೇ ಪ್ರಯಾಣಿಸಲಿ ಎಂಬ ಉದ್ದೇಶದಿಂದ ರಿಯಾಯಿತಿ ನೀಡಲಾಗುತ್ತಿದೆ. ಬಸ್‌ನಲ್ಲಿ ಪ್ರಯಾಣಿಸುವವರು ಮೂರಕ್ಕಿಂತ ಹೆಚ್ಚು ಟಿಕೆಟ್‌ಗಳನ್ನು ಒಟ್ಟಿಗೇ ಖರೀದಿಸಿದರೆ ಶೇ.15ರಷ್ಟು ರಿಯಾಯಿತಿ ನೀಡಲಾಗುವುದು.

ವಜ್ರ ಬಸ್‌ಗಳ ಟಿಕೆಟ್‌ ದರದಲ್ಲಿ ಶೇ.37ರಷ್ಟು ಕಡಿತಗೊಳಿಸಿದ್ದ ಸರ್ಕಾರ, ಜನವರಿ 1ರಿಂದ ಪರಿಷ್ಕೃತ ದರವನ್ನು ಪ್ರಾಯೋಗಿಕವಾಗಿ ಜಾರಿಗೊಳಿಸಿತ್ತು. ಪ್ರಸ್ತುತ ಇನ್ನೂ ಹೆಚ್ಚಿನ ಸಂಖ್ಯೆಯ ಸಾರ್ವಜನಿಕರು ಸಮೂಹ ಸಾರಿಗೆ ಬಳಸಲು ಪ್ರೋತ್ಸಾಹಿಸುವ ನಿಟ್ಟಿನಲ್ಲಿ ಗುಂಪು ಟಿಕೆಟ್‌ ಖರೀದಿಗೆ ರಿಯಾಯಿತಿ ನೀಡಲಾಗುತ್ತಿದೆ,’ ಎಂದು ಮಾಹಿತಿ ನೀಡಿದರು.