ನಗರದ ವಿವಿಧ ಠಾಣೆಗಳಿಗೆ ಗೃಹ ಸಚಿವರ ದಿಢೀರ್‌ ಭೇಟಿ

Team Udayavani, Nov 4, 2017, 11:01 AM IST

ಬೆಂಗಳೂರು: ಗೃಹ ಸಚಿವ ರಾಮಲಿಂಗಾರೆಡ್ಡಿ ಶುಕ್ರವಾರ ನಗರದ ವಿವಿಧ ಪೊಲೀಸ್‌ ಠಾಣೆಗಳಿಗೆ ದಿಢೀರ್‌ ಭೇಟಿ ನೀಡಿ ಪರಿಶೀಲಿಸಿದರು. ಅಧಿಕಾರಿಗಳು ತಡಬಡಾಯಿಸಿದ ಪ್ರಸಂಗವೂ ನಡೆಯಿತು. ಶುಕ್ರವಾರ ಮಧ್ಯಾಹ್ನ 4 ಗಂಟೆ ಸುಮಾರಿಗೆ ದಿಢೀರನೆ ಕಬ್ಬನ್‌ಪಾರ್ಕ್‌ ಠಾಣೆಗೆ ಆಗಮಿಸಿದ ಸಚಿವರು ಮತ್ತು ನಗರ ಪೊಲೀಸ್‌ ಆಯುಕ್ತ ಟಿ.ಸುನೀಲ್‌ ಕುಮಾರ್‌ ಅವರನ್ನು ಕಂಡ ಠಾಣಾ ಸಿಬ್ಬಂದಿ ಆಶ್ಚರ್ಯಗೊಂಡರು.

ಈ ವೇಳೆ ಠಾಣಾ ಅವರಣ ಗಮನಿಸಿದ ಸಚಿವರು, ಆವರಣದೊಳಗೆ ಸ್ವತ್ಛತೆಯಿರಬೇಕು, ಅಶಿಸ್ತು ಸಹಿಸುವುದಿಲ್ಲ ಎಂದರು. ಬಳಿಕ ಯುಬಿ ಸಿಟಿ, ಎಂ.ಜಿ.ರಸ್ತೆ, ಕುಂಬ್ಳೆ ವೃತ್ತ, ಕ್ವೀನ್ಸ್‌ ಸರ್ಕಲ್‌ ಸೇರಿದಂತೆ ಸುಮಾರು 20 ಕಡೆಗಳಲ್ಲಿ ಅಳವಡಿಸಿರುವ ಸಿಸಿಟಿವಿ ಕ್ಯಾಮರಾಗಳನ್ನು ಪರಿಶೀಲಿಸಿದರು. ಠಾಣಾ ಸಿಬ್ಬಂದಿ ಕುಂದುಕೊರತೆ ಆಲಿಸಿ, ಅಪರಾಧಗಳ ಕುರಿತು ಮಾಹಿತಿ ಸಂಗ್ರಹಿಸಿ ಕೆಲವ ಸೂಚನೆ ನೀಡಿದರು.

ಬಳಿಕ ಅಶೋಕ್‌ನಗರ ಠಾಣೆಗೆ ಭೇಟಿ ನೀಡಿ, ಠಾಣಾಧಿಕಾರಿ ಶಶಿಧರ್‌ ಅವರಿಂದ ಠಾಣಾ ವ್ಯಾಪ್ತಿಯ ಅಪರಾಧಗಳ ಬಗ್ಗೆ ಮಾಹಿತಿ ಸಂಗ್ರಹಿಸಿದರು, ಹೊಯ್ಸಳ ಬೀಟ್‌, ಚೀತಾ ಬೀಟ್‌ ವ್ಯವಸ್ಥೆಯ ಕಾರ್ಯವೈಖರಿ ಚರ್ಚಿಸಿದರು. ಸುಮಾರು ಮೂರು ಗಂಟೆಗಳ ಕಾಲ ಠಾಣೆಯಲ್ಲಿದ್ದ ಸಚಿವರು, ಅಪರಾಧ ದಾಖಲೆ ಪುಸ್ತಕ, ವಾಕಿಟಾಕಿ ನಿರ್ವಹಣೆ, ಅಧಿಕಾರಿಗಳ ಹಾಜರಿ, ಗೈರು ಇನ್ನಿತರೆ ವ್ಯವಸ್ಥೆಗಳ ಪರಿಶೀಲಿಸಿದರು.

ದೂರು ಪೆಟ್ಟಿಗೆ: ಸಚಿವರು ಭೇಟಿ ನೀಡಿದ ಎರಡು ಪೊಲೀಸ್‌ ಠಾಣೆಗಳಲ್ಲಿ ಸಾರ್ವಜನಿಕರ ದೂರು ಪೆಟ್ಟಿಗೆಯನ್ನು ಠಾಣೆಯೊಳಗೆ ಇಡಲಾಗಿತ್ತು. ಇದನ್ನು ನೋಡಿ ಸಿಬ್ಬಂದಿಗೆ ಪ್ರಶ್ನಿಸಿದ ಅವರು, ದೂರು ಪೆಟ್ಟಿಗೆ ಹೊರಗಡೆ ಇಟ್ಟು ಜನಸ್ನೇಹಿಯಾಗಿ ಕಾರ್ಯನಿರ್ವಹಿಸಬೇಕೆಂದು ಸಲಹೆ ನೀಡಿದರು. 

ಸೂಚನೆ: ಬೇಟಿ ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿ, ನಗರದ ನಾಲ್ಕು ಠಾಣೆಗಳಿಗೆ ಭೇಟಿ ನೀಡಿದ್ದೇನೆ. ಶಾಲಾ, ಕಾಲೇಜುಗಳಿಗೆ ಬೀಟ್‌ ವ್ಯವಸ್ಥೆ ಹಾಗೂ ಮೀಟಿಂಗ್‌ ನಡೆಸುವಂತೆ ಸೂಚಿಸಲಾಗಿದೆ. ರೌಡಿಶೀಟರ್‌ಗಳನ್ನು ಮಟ್ಟಹಾಕುವಂತೆ ಪೊಲೀಸರಿಗೆ ಖಡಕ್‌ಎಚ್ಚರಿಕೆ ನೀಡಿದ್ದೇನೆ ಎಂದರು.

ನೋಡ್ರಿ ಸುನೀಲ್‌ ಕುಮಾರ್‌ ಏನಿದು?: ಹಲಸೂರು ಠಾಣೆಗೆ ಭೇಟಿ ನೀಡಿದ ಸಂದರ್ಭದಲ್ಲಿ ಆವರಣದಲ್ಲಿನ ಕಸ ಕಂಡ ಸಚಿವರು, ನೋಡ್ರಿ ಸುನೀಲ್‌ ಕುಮಾರ್‌ ಏನಿದು ಪೊಲೀಸ್‌ ಠಾಣೆಯಲ್ಲಿ ಕಸ ಇದೆ ಯಾಕೆ ಪ್ರತಿನಿತ್ಯ ಸ್ವಚ್ಚಗೊಳಿಸಲ್ವಾ?. ಅದಕ್ಕೂ ಆದೇಶ ಕೊಡಬೇಕು ಎಂದು ಪೊಲೀಸ್‌ ಆಯುಕ್ತರ ಮುಂದೆಯೇ ಇನ್‌ಸ್ಪೆಕ್ಟರ್‌ ಮತ್ತು ಎಸಿಪಿಗೆ ತರಾಟೆಗೆ ತೆಗೆದುಕೊಂಡರು. ಎಸಿಪಿ, ಪಿಎಸ್‌ಐಗೆ ನೋಟಿಸ್‌ ಜಾರಿಗೊಳಿಸುವಂತೆ ಆದೇಶಿಸಿದರು.