“ಹಂಪಿ ಉತ್ಸವಕ್ಕೆ ಆರ್ಥಿಕ ನೆರವು ನೀಡಲು ಸಿದ್ಧ: ಜನಾರ್ದನ ರೆಡಿ

Team Udayavani, Dec 4, 2018, 6:00 AM IST

ಬೆಂಗಳೂರು: ರಾಜ್ಯ ಸರ್ಕಾರ ಹಂಪಿ ಉತ್ಸವ ನಡೆಸಲು ಮುಂದಾಗದೆ ಕುಂಟು ನೆಪ ಹೇಳುತ್ತಿರುವುದು ದುರದೃಷ್ಟಕರ ಎಂದಿರುವ ಮಾಜಿ ಸಚಿವ ಜಿ.ಜನಾರ್ದನರೆಡ್ಡಿ, ಹಂಪಿ ಉತ್ಸವ ಮೂರು ದಿನ ಅದ್ದೂರಿಯಾಗಿಯೇ ಆಚರಣೆಯಾಗಲಿ. ಅಗತ್ಯಬಿದ್ದರೆ ಆರ್ಥಿಕ ನೆರವು ಸೇರಿ ಎಲ್ಲ ರೀತಿಯ ಸಹಕಾರ, ನೆರವು ನೀಡಲು ಸಿದ್ಧ ಎಂದು ಹೇಳಿದ್ದಾರೆ.

ಸಾಮಾಜಿಕ ಜಾಲತಾಣ “ಫೇಸ್‌ಬುಕ್‌’ನಲ್ಲಿ ಸುದೀರ್ಘ‌ವಾಗಿ ತಮ್ಮ ಅಭಿಪ್ರಾಯ ಹಂಚಿಕೊಂಡಿರುವ ಜನಾರ್ದನರೆಡ್ಡಿ, ಸರ್ಕಾರ ಹಾಗೂ ಕೆಲ ಸಚಿವರ ಹೆಸರು ಪ್ರಸ್ತಾಪಿಸದೆ ವಾಗ್ಧಾಳಿ ನಡೆಸಿದ್ದಾರೆ. ನಾಡಿನ ನಾನಾ ಕಡೆ ಉತ್ಸವಗಳನ್ನು ಆಚರಿಸಲು ಉತ್ಸಾಹ ತೋರುವ ರಾಜ್ಯ ಸರ್ಕಾರ, ಹಂಪಿ ಉತ್ಸವ ಆಚರಣೆಯನ್ನು ಕುಂಟು ನೆಪ ಹೇಳಿ ಕೈಬಿಟ್ಟಿರುವುದು ಸರಿಯಲ್ಲ. ರಾಷ್ಟ್ರದ ಹೆಮ್ಮೆಯ ಪ್ರತೀಕವಾಗಿರುವ ಹಂಪಿ ಉತ್ಸವವು ರಾಜ್ಯದ ಜನತೆ ಅದರಲ್ಲೂ ಉತ್ತರ ಕರ್ನಾಟಕದ ಜನತೆಯೊಂದಿಗೆ ಭಾವನಾತ್ಮಕ ಬೆಸುಗೆ ಬೆಸೆಯುವಂಥದ್ದು. ಹಾಗಿದ್ದರೂ ಉತ್ಸವ ಆಚರಣೆ ಕೈಬಿಡುವ ಮೂಲಕ ಸರ್ಕಾರ ಹಾಗೂ ಕೆಲ ಸಚಿವರು ಬಳ್ಳಾರಿ ಜನತೆ, ಉತ್ತರ ಕರ್ನಾಟಕದ ಜನತೆಯನ್ನು ಕಡೆಗಣಿಸುತ್ತಿದ್ದಾರೆಂದು ಆರೋಪಿಸಿದ್ದಾರೆ. 

ನ.3ರಂದು ನಡೆದ ಬಳ್ಳಾರಿ ಲೋಕಸಭಾ ಉಪಚುನಾವಣೆಯಲ್ಲಿ ಅಕ್ರಮವಾಗಿ ಸಾಕಷ್ಟು ಹಣ ಖರ್ಚು ಮಾಡಿದವರಿಗೆ ಹಾಗೂ ಕೃತಜ್ಞತಾ ಸಮಾವೇಶ ನಡೆಸಿದವರಿಗೆ ಬರಗಾಲ ಕಾಣಲಿಲ್ಲವೇ ಪ್ರಶ್ನಿಸಿದ್ದಾರೆ.