ಮೋಕ್ಷ ಸಿಗುವುದಾದರೆ ನಾನೂ ಪಾದಪೂಜೆ ಮಾಡ್ತೇನೆ: ಎಚ್‌ಡಿಡಿ

Team Udayavani, Feb 26, 2019, 12:30 AM IST

ಬೆಂಗಳೂರು:ಮೋಕ್ಷ ಸಿಗುತ್ತೆ ಎಂದರೆ ನಾನೂ ಪಾದ ಪೂಜೆ ಮಾಡ್ತೇನೆ ಎಂದು ಮಾಜಿ ಪ್ರಧಾನಿ ಎಚ್‌.ಡಿ.ದೇವೇಗೌಡರು ತಿಳಿಸಿದ್ದಾರೆ.

ಪ್ರಧಾನಿಯವರು ಪಾದಪೂಜೆ ಮಾಡಿದ ಕುರಿತು ಪ್ರತಿಕ್ರಿಯಿಸಿದ ಅವರು, ನಾನು ಆ ಬಗ್ಗೆ ಟೀಕೆ ಮಾಡಲ್ಲ. ಮೋಕ್ಷ ಸಿಗುತ್ತದೆ ಅಂದ್ರೆ ನಾನೂ ಪಾದಪೂಜೆ ಮಾಡ್ತೀನಿ ಎಂದು ಹೇಳಿದರು.ಮೋದಿಯವರು ಯಾಕೆ ಪಾದ ಪೂಜೆ ಮಾಡಿದರು ಅಂತ ಗೊತ್ತಿಲ್ಲ. ಪಂಡಿತರನ್ನು ಕೇಳಬೇಕು .  ಏಕೆ ಮಾಡಿರಬಹುದು ಎಂದು ತಿಳಿದವರು ಹೇಳಬೇಕು. ನಾನೂ ಟಿವಿಯಲ್ಲಿ ನೋಡಿದೆ ಎಂದ‌ರು.

ಮಂಡ್ಯ, ಹಾಸನ, ಮೈಸೂರು ಎಲ್ಲ ಕಡೆ ನಾನು ನಿಲ್ಲೋಕೆ ಆಗುತ್ತಾ.  ಈ ಬಾರಿಯ ಚುನಾವಣೆಯಲ್ಲಿ ನಾನು ಏನು ಕೆಲಸ ಮಾಡಿದ್ದೇನೆ ಎಂಬುದನ್ನು ಜನರಿಗೆ ತಿಳಿಸಲಿದ್ದೇನೆ ಎಂದು ಹೇಳಿದರು.

ಕೋನರೆಡ್ಡಿಗೆ ಅಧಿಕಾರ
ಉತ್ತರ ಕರ್ನಾಟಕದಲ್ಲಿ ಪಕ್ಷಕ್ಕೆ ಶಕ್ತಿ ತುಂಬಲು ಕೋನರೆಡ್ಡಿಗೆ ಮುಖ್ಯಮಂತ್ರಿಯವರ ರಾಜಕೀಯ ಕಾರ್ಯದರ್ಶಿ ಸ್ಥಾನ ಕೊಡುತ್ತೇವೆ. ಬಸವರಾಜ ಹೊರಟ್ಟಿಯವರಿಗೆ ಸಭಾಪತಿ ಸ್ಥಾನ ಕೊಡಿಸಲು ಆಗಲಿಲ್ಲ. ಹೀಗಾಗಿ, ಆ ಭಾಗದವರಿಗೆ ಅಧಿಕಾರ ಕೊಡಬೇಕಿದೆ. ಜೆಡಿಎಸ್‌ ಕೋಟಾದ ಎರಡು ಸಚಿವ ಸ್ಥಾನ ಸಮಯ ಬಂದಾಗ ತುಂಬುತ್ತೇವೆ. ಅದಕ್ಕು ರೇವಣ್ಣ ಟೈಂ ನೋಡಬೇಕಲ್ಲವೇ ಎಂದು ಚಟಾಕಿ ಹಾರಿಸಿದರು.