Bengaluru: ಅಕ್ರಮವಾಗಿ ಪಟಾಕಿ ಮಾರಾಟ; 2 ದಿನಗಳಲ್ಲಿ 56 ಕೇಸು ದಾಖಲು

Team Udayavani, Nov 2, 2024, 12:44 PM IST

ಬೆಂಗಳೂರು: ನಗರದಲ್ಲಿ ಪಟಾಕಿ ನಿಯಮಾವಳಿ ಉಲ್ಲಂಘಿಸಿದವರ ವಿರುದ್ಧ ಖಾಕಿ ಹದ್ದಿನ ಕಣ್ಣಿಟ್ಟಿದ್ದು, ಅ.31ರಿಂದ ನ.1ರ ವರೆಗೆ 56 ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ. ದೀಪಾವಳಿ ಹಿನ್ನೆಲೆಯಲ್ಲಿ ಅಕ್ರಮವಾಗಿ ಎಲ್ಲೆಂದರಲ್ಲಿ ಪಟಾಕಿ ಮಾರಾಟ ಮಾಡುತ್ತಿರುವವರ ಮೇಲೆ ಪೊಲೀಸರು ನಿಗಾ ಇರಿಸಿ ಪರಿಶೀಲನೆ ನಡೆಸಿದ್ದರು.

ಆ ವೇಳೆ ಕೆಲವು ಪಟಾಕಿ ವ್ಯಾಪಾರಿಗಳು ಸಿಕ್ಕಿ ಬಿದ್ದಿದ್ದಾರೆ. ಅಕ್ರಮವಾಗಿ ಪಟಾಕಿ ದಾಸ್ತಾನು ಮಾಡಿಕೊಂಡಿರುವುದು, ತಳ್ಳುವ ಗಾಡಿಯಲ್ಲಿ ಪಟಾಕಿ ಮಾರಾಟ, ಕೆಲವು ಅಪಾರ್ಟ್‌ ಮೆಂಟ್‌ಗಳ ಪಕ್ಕದಲ್ಲಿ ಅಕ್ರಮವಾಗಿ ಪಟಾಕಿ ಮಾರಾಟ ಮಾಡುವವರ ವಿರುದ್ಧ ಇದುವರೆಗೆ ಒಟ್ಟು 56 ಕೇಸ್‌ ದಾಖಲಾಗಿದೆ. ಪಟಾಕಿ ಮಳಿಗೆ ತೆರೆಯಲು 1,500ಕ್ಕೂ ಹೆಚ್ಚಿನ ಅರ್ಜಿಗಳು ಸ್ವೀಕೃತವಾಗಿದ್ದವು. ಆದರೆ, ಇವುಗಳ ಪೈಕಿ ಲಾಟರಿಗಳ ಮೂಲಕ ಸಾರ್ವಜನಿಕರ ಸಮ್ಮುಖದಲ್ಲಿ 315 ಅರ್ಜಿಗಳಿಗೆ ತಾತ್ಕಾಲಿಕ ಪಟಾಕಿ ಪರವಾನಗಿಗಳನ್ನು ಆನ್‌ಲೈನ್‌ನಲ್ಲಿ ಅಪ್‌ಲೋಡ್‌ ಮಾಡಲಾಗಿತ್ತು. ಆದರೆ, ಬೆಂಗಳೂರಿನೆಲ್ಲೆಡೆ ಪರವಾನಗಿ ಇಲ್ಲದೇ ಚಿಲ್ಲಾರೆಯಾಗಿ ಪಟಾಕಿ ಮಾರಾಟ ಮಾಡುತ್ತಿರುವ ಆರೋಪ ಕೇಳಿ ಬಂದ ಹಿನ್ನೆಲೆಯಲ್ಲಿ ಪೊಲೀಸರು ಈ ಕುರಿತು ಶೋಧ ನಡೆಸಿದ್ದರು.

ಎಲ್ಲೆಲ್ಲಿ ಎಷ್ಟೆಷ್ಟು ಕೇಸ್‌ ?: ಇನ್ನು ಬೆಂಗಳೂರಿನ ಈಶಾನ್ಯ ವಿಭಾಗದಲ್ಲಿ 19, ಉತ್ತರ, ಆಗ್ನೇಯ ಹಾಗೂ ವೈಟ್‌ ಫೀಲ್ಡ್‌ ವಿಭಾಗದಲ್ಲಿ ತಲಾ 9, ಪೂರ್ವ ವಿಭಾಗದಲ್ಲಿ 6, ದಕ್ಷಿಣ ವ್ಯಾಪ್ತಿಯಲ್ಲಿ 4 ಕೇಸ್‌ ದಾಖಲಾಗಿದೆ. ಒಟ್ಟು 56 ಕೇಸ್‌ ದಾಖಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.