Expensive wedding: ಭಾರತದ ಅದ್ಧೂರಿ ಮದುವೆ ಮೇಲೆ ಈಗ ಐಟಿ ಕಣ್ಣು!

Team Udayavani, Dec 22, 2024, 11:41 AM IST

ಬೆಂಗಳೂರು: ಅದ್ಧೂರಿತನದಿಂದಲೇ ವಿಶ್ವದಲ್ಲಿ ಗುರುತಿಸಿಕೊಂಡಿರುವ ಭಾರತದ ಮದುವೆಗಳ ಮೇಲೆ ಆದಾಯ ತೆರಿಗೆ ಇಲಾಖೆ ಕಣ್ಣಿಟ್ಟಿದೆ. ದಾಖಲೆ ಇಲ್ಲದ ಹಣವನ್ನು ಮದುವೆಗಳಲ್ಲಿ ಖರ್ಚು ಮಾಡಲಾಗುತ್ತಿದೆ ಎಂಬ ಶಂಕೆಯ ಮೇಲೆ ಐಟಿ ಇಲಾಖೆ ತನಿಖೆ ಆರಂಭಿಸಿದೆ.

ಈಗಾಗಲೇ ರಾಜಸ್ಥಾನದಲ್ಲಿನ 20ಕ್ಕೂ ಹೆಚ್ಚು “ಮದುವೆ ಆಯೋಜಕ’ ಸಂಸ್ಥೆಗಳ ಮೇಲೆ ತನಿಖೆ ಆರಂಭಗೊಂಡಿದ್ದು, 7500 ಕೋಟಿ ರೂ.ನಷ್ಟು ದಾಖಲೆಯಿಲ್ಲದ ಹಣ ಬಳಕೆಯಾಗಿದೆ. ಇದಕ್ಕಾಗಿ ನಕಲಿ ಖರ್ಚಿನ ದಾಖಲೆಗಳನ್ನು ಸೃಷ್ಟಿಸಲಾಗುತ್ತಿದೆ. ಹವಾಲಾ ಮೂಲಕ ಹಣ ವರ್ಗಾವಣೆ ಮಾಡಿ ಅದ್ಧೂರಿ ಮದುವೆ ಗಳನ್ನು ಮಾಡಲಾಗುತ್ತಿದೆ. ಇದರಲ್ಲಿ ಬೆಂಗಳೂರು, ಹೈದಾರಾ ಬಾದ್‌ ಮೂಲದ ಸಂಸ್ಥೆಗಳು ಭಾಗಿಯಾಗಿವೆ ಎಂದು ಇ.ಡಿ. ಹೇಳಿದೆ.

ಈ ವಾರದ ಆರಂಭದಲ್ಲಿ ಈ ತನಿಖೆ ಆರಂಭಿಸಲಾಗಿದ್ದು, ಮುಂದಿನ ಕೆಲದಿನಗಳವರೆಗೆ ಮುಂದುವರಿಯಲಿದೆ. ವಿದೇಶಗಳಲ್ಲಿ ನಡೆಯುವ ಮದುವೆಗಳು, ಮದುವೆಗಾಗಿ ಖಾಸಗಿ ವಿಮಾನ ಬಳಕೆಯಂತಹ ಘಟನೆಗಳನ್ನು ಪ್ರಮುಖವಾಗಿ ತನಿಖೆಯ ಭಾಗವಾಗಿಸಿಕೊಳ್ಳಲಾಗಿದೆ ಎಂದು ಅಧಿಕಾರಿಯೊಬ್ಬರು ಹೇಳಿದ್ದಾರೆ.