ಶಾಸಕ, ಸಚಿವರ ಆಪ್ತರ ಹುದ್ದೆಗೆ ಭಾರೀ ಲಾಬಿ

Team Udayavani, Jun 14, 2018, 6:25 AM IST

ಬೆಂಗಳೂರು: ಸಮ್ಮಿಶ್ರ ಸರಕಾರದಲ್ಲಿ ನೂತನ ಸಚಿವರಿಗೆ ಖಾತೆ ಹಂಚಿಕೆಯಾಗಿ ತಮ್ಮ ಇಲಾಖೆಗಳ ಕುರಿತು ಸಭೆ ನಡೆಸಲು ಮುಂದಾಗುತ್ತಿದ್ದಂತೆ ಸಚಿವರ ಬಳಿ ಆಪ್ತ ಕಾರ್ಯದರ್ಶಿ, ಆಪ್ತ ಸಹಾಯಕ, ವಿಶೇಷ ಕರ್ತವ್ಯಾಧಿಕಾರಿಯಾಗಿ ಸೇರಿ ಕೊಳ್ಳಲು ದೊಡ್ಡ ಮಟ್ಟದ ಕಸರತ್ತು ನಡೆದಿದೆ.

ವಿಧಾನಸೌಧ ಹಾಗೂ ವಿಕಾಸಸೌಧದ ಸಚಿವರ ಕೊಠಡಿಗಳ ಮುಂದೆ ಸಚಿವರಿಗೆ “ಆಪ್ತ’ರಾಗಲು ಆಕಾಂಕ್ಷಿಗಳ ದೊಡ್ಡ ದಂಡು ಸುಳಿದಾಡುತ್ತಿದೆ. ಪ್ರತಿಯೊಬ್ಬ ಸಚಿವರಿಗೂ ನಾಲ್ವರು ಆಪ್ತ ಸಹಾಯಕರು, ಒಬ್ಬರು ಆಪ್ತ ಕಾರ್ಯದರ್ಶಿ, ಮೂವರು ಗನ್‌ಮ್ಯಾನ್‌ಗಳು, ನಾಲ್ವರು “ಡಿ’ ದರ್ಜೆ ನೌಕರರನ್ನು ನೇಮಿಸಿಕೊಳ್ಳಲು ಅವಕಾಶವಿದೆ. ಶಾಸಕರಿಗೆ ಇಬ್ಬರು ಆಪ್ತ ಸಹಾಯಕರನ್ನು ನೇಮಿಸಿಕೊಳ್ಳಲು ಅವಕಾಶ ಕಲ್ಪಿಸಲಾಗಿದೆ.

ಶಾಸಕರು ಹಾಗೂ ಸಚಿವರು ತಮಗೆ ಬೇಕಾದ ಖಾಸಗಿ ಆಪ್ತ ಸಹಾಯಕರನ್ನು ನೇಮಿಸಿಕೊಳ್ಳಲೂ ಅವಕಾಶವಿದೆ. ಖಾಸಗಿಯಾಗಿ ನೇಮಿಸಿಕೊಳ್ಳುವ ಆಪ್ತ ಸಿಬಂದಿಗೆ ಆಡಳಿತ ಸುಧಾರಣಾ ಇಲಾಖೆ ಮೂಲಕ ವೇತನ ನೀಡಲಾಗುತ್ತದೆ. ಒಂದು ವೇಳೆ ಸಚಿವರಿಗೆ ಹೆಚ್ಚಿನ ಸಿಬಂದಿ ಅಗತ್ಯವಿದ್ದರೆ, ಸರಕಾರದ ವಿವಿಧ ಇಲಾಖೆಗಳಲ್ಲಿ ಕಾರ್ಯ ನಿರ್ವಹಿಸುತ್ತಿರುವವರನ್ನು ನಿಯೋಜನೆ ಮೇಲೆ ನೇಮಿಸಿಕೊಳ್ಳಲು ಅವಕಾಶವಿದೆ.

ನೆಲೆ ಕಂಡುಕೊಳ್ಳಲು ಕಸರತ್ತು: ವಿವಿಧ ಇಲಾಖೆಗಳಿಂದ ಸಚಿವರ ಕಚೇರಿಗೆ ನಿಯೋಜಿಸಲು ಇಷ್ಟೇ ಜನರೆನ್ನುವ ನಿರ್ಬಂಧವಿಲ್ಲ. ಅವರು ನಿಯೋಜನೆ ಮೇಲೆ ಸಚಿವರ ಕಚೇರಿಯಲ್ಲಿ ಕಾರ್ಯ ನಿರ್ವಹಿಸಿದರೂ ಸಂಬಂಧಪಟ್ಟ ಇಲಾಖೆಯಿಂದ ವೇತನ ಪಡೆಯಲು ಅವಕಾಶ ಕಲ್ಪಿಸಲಾಗಿದೆ. ಹೀಗಾಗಿ ಅನೇಕ ಪ್ರಥಮ ಹಾಗೂ ದ್ವಿತೀಯ ದರ್ಜೆ ನೌಕರರು ಸಚಿವರ ಬಳಿ ಸೇರಿಕೊಂಡು ಸರಕಾರ ಇರುವವರೆಗೂ ವಿಧಾನಸೌಧದಲ್ಲಿ ನೆಲೆ ಕಂಡುಕೊಳ್ಳಲು ಪ್ರಯತ್ನ ನಡೆಸಿದ್ದಾರೆ.

ಸಿಎಂ ಕಚೇರಿಯಲ್ಲೂ ಲಾಬಿ: ಮುಖ್ಯಮಂತ್ರಿ ಕಚೇರಿಯಲ್ಲೂ ಆಪ್ತ ಸಿಬಂದಿ ನೇಮಕಕ್ಕೆ ಯಾವುದೇ ನಿರ್ಬಂಧ ಇಲ್ಲ. ತಮಗೆ ಬೇಕಾದಷ್ಟು ಸಿಬಂದಿಯನ್ನು ಗುತ್ತಿಗೆ ಆಧಾರದ ಮೇಲೆ ನೇಮಿಸಿಕೊಳ್ಳುತ್ತಾರೆ. ಹೀಗಾಗಿ ಸಿಎಂ ಕಚೇರಿ ಸೇರಿಕೊಳ್ಳಲು ದೊಡ್ಡಮಟ್ಟದ ಪೈಪೋಟಿಯೇ ನಡೆಯುತ್ತಿದೆ.

ಸಿಎಂ ಆಪ್ತರಿಂದಲೂ ಪ್ರಯತ್ನ: ಸಾಮಾನ್ಯ ವಾಗಿ ಸಚಿವರ ಆಪ್ತ ಕಾರ್ಯದರ್ಶಿಯನ್ನಾಗಿ ಕೆಎಎಸ್‌ ಅಧಿಕಾರಿಗಳನ್ನು ನೇಮಿಸಲಾಗುತ್ತದೆ. ಅವರು ಸಚಿವರ ಅಧಿಕೃತ ಕಾರ್ಯ ಚಟುವಟಿಕೆಗಳ ಜವಾಬ್ದಾರಿ ನೋಡಿಕೊಳ್ಳುತ್ತಾರೆ. 

ಹೊರತಾಗಿ ಸಚಿವರು ವಿಶೇಷ ಅಧಿಕಾರಿಯನ್ನು ನೇಮಿಸಿ ಕೊಳ್ಳಲು ಅವಕಾಶವೂ ಇದೆ. ಕಡ್ಡಾಯವಾಗಿ ಸರಕಾರಿ ಅಧಿಕಾರಿಯೇ ಆಗಿರಬೇಕೆಂದೇನೂ ಇಲ್ಲ. ಸಚಿವರು ತಮಗೆ ಆಪ್ತರಾಗಿರುವ ಯಾರನ್ನಾದರೂ ನೇಮಿಸಿಕೊಳ್ಳಬಹುದು. ವಿಶೇಷ ಕರ್ತವ್ಯಾಧಿಕಾರಿ ಹುದ್ದೆಗೆ ಸಾಮಾನ್ಯವಾಗಿ ನಿವೃತ್ತ ಕೆಎಎಸ್‌ ಅಧಿಕಾರಿಗಳು, ವಿವಿಧ ಇಲಾಖೆಗಳಲ್ಲಿ ಕಾರ್ಯ ನಿರ್ವಹಿಸುತ್ತಿರುವ ಅಧಿಕಾರಿಗಳು, ಕಾಲೇಜು ಪ್ರೊಫೆಸರ್‌ಗಳು ಲಾಬಿ ನಡೆಸುತ್ತಾರೆ.

ಒಟ್ಟಾರೆ ಆಪ್ತ ಕಾರ್ಯದರ್ಶಿ ಮತ್ತು ಸಹಾಯಕರಾ ಗಲು ಜಾತಿ, ಪ್ರಾದೇಶಿಕತೆ, ಹಿಂದಿನ ಸರಕಾರದಲ್ಲಿ ಸಚಿವರಾಗಿದ್ದವರ ಅಥವಾ ಪಕ್ಷದ ಹಿರಿಯ ನಾಯಕರ ಶಿಫಾರಸುಗಳ ಆಧಾರದಲ್ಲಿ ಆಕಾಂಕ್ಷಿ ಗಳು ಮಂತ್ರಿಗಳ ಕಚೇರಿಗಳಿಗೆ ಅಲೆಯುತ್ತಿದ್ದಾರೆ.

ನಾವು ಸರಕಾರ ಮತ್ತು ಜನರ ನಡುವೆ ಕೊಂಡಿಯಾಗಿ ಕೆಲಸ ಮಾಡುತ್ತೇವೆ. ಆದರೆ ನಮ್ಮದು ಅತಂತ್ರ ಬದುಕು. ಪ್ರತಿಬಾರಿ ಹೊಸ ಸರಕಾರ ಬಂದಾಗ ಶಾಸಕರು ಸಚಿವರನ್ನು ಹುಡುಕಿಕೊಂಡು ಹೋಗಬೇಕು. ಸರಕಾರ ನಮ್ಮನ್ನು ಖಾಯಂ ಆಪ್ತ ಸಹಾಯಕರನ್ನಾಗಿ ನೇಮಕ ಮಾಡಿಕೊಂಡರೆ ಇತರ ಸಿಬಂದಿ ಯಂತೆಯೇ ನಾವೂ ಸಚಿವರು ಮತ್ತು ಶಾಸಕರ ಆಪ್ತ ಸಹಾಯಕರಾಗಿ ಕಾರ್ಯ ನಿರ್ವಹಿಸಲು ಅನುಕೂಲವಾಗುತ್ತದೆ.
 - ಪ್ರವೀಣ್‌ ಸಾಲಿಮಠ, 
ಆಪ್ತ ಸಹಾಯಕರ ಸಂಘದ ಪ್ರಧಾನ ಕಾರ್ಯದರ್ಶಿ