ಉದ್ಯಮಿ ಜೆ ಪಿ ನಾರಾಯಣಸ್ವಾಮಿ ನಿಧನ

Team Udayavani, Feb 10, 2017, 11:26 AM IST

ಬೆಂಗಳೂರು: ರಾಜ್ಯ ಆರ್ಯ ಈಡಿಗರ ಸಂಘದ ಅಧ್ಯಕ್ಷ ಜೆ.ಪಿ.ನಾರಾಯಣ ಸ್ವಾಮಿ (66) ಅವರು ಸದಾಶಿವನಗರದಲ್ಲಿನ ತಮ್ಮ ನಿವಾಸದಲ್ಲಿ ಗುರುವಾರ ನಿಧನರಾಗಿದ್ದಾರೆ. ಕೆಲವು ದಿನಗಳಿಂದ ಅವರು ಅನಾರೋಗ್ಯದಿಂದ ಬಳಲುತ್ತಿದ್ದರು.

ಪುಟ್ಟಪ್ಪ ಮತ್ತು ಯಲ್ಲಮ್ಮ ದಂಪತಿಯ ಪುತ್ರರಾಗಿದ್ದ ನಾರಾಯಣ ಸ್ವಾಮಿ 10ನೇ ವಯಸ್ಸಿನಲ್ಲಿ ತಂದೆಯನ್ನು ಕಳೆದುಕೊಂಡಿದ್ದರು. 17ನೇ ವಯಸ್ಸಿಗೆ ವ್ಯಾಪಾರ ಆರಂಭಿಸಿ, ಸಾರಾಯಿ ಗುತ್ತಿಗೆ ಪಡೆದು ವ್ಯಾಪಾರ ನಡೆಸಿದರು. ತರುವಾಯ ಜೆ.ಪಿ.ಡಿಸ್ಟ್ರಿಲರಿಸ್‌ ಪ್ರೈ. ಲಿ., ಮದ್ಯ ತಯಾರಿಕಾ ಕಂಪನಿ ಆರಂಭಿಸಿದರು.

ಹೊಟೇಲ್‌ ಉದ್ಯಮದಲ್ಲಿಯೂ ತೊಡಗಿಸಿಕೊಂಡಿದ್ದರು.  2002ರಿಂದ ಕರ್ನಾಟಕ ಪ್ರದೇಶ ಆರ್ಯ ಈಡಿಗರ ಸಂಘದ ಅಧ್ಯಕ್ಷರಾಗಿದ್ದ ಅವರು, ಸುಧಾ ಕೋ-ಆಪರೇಟಿವ್‌ ಬ್ಯಾಂಕಿನ ಅಧ್ಯಕ್ಷರು ಸಹ ಆಗಿದ್ದರು. ಬಡ, ಪ್ರತಿಭಾವಂತ ವಿದ್ಯಾರ್ಥಿಗಳಿಗೆ ಶಿಕ್ಷಣ ಒದಗಿಸಲು ತಂದೆ ಪುಟ್ಟಪ್ಪ ಹೆಸರಲ್ಲಿ ತುಮಕೂರಿನಲ್ಲಿ ವಿದ್ಯಾರ್ಥಿ ನಿಲಯ ಸ್ಥಾಪಿಸಿದ್ದರು.

ಸದಾಶಿವನಗರದ ಮನೆಯಲ್ಲಿ ಮಧ್ಯಾಹ್ನ 12.30ರವರೆಗೆ ಪಾರ್ಥಿವ ಶರೀರವನ್ನು ಸಾರ್ವಜನಿಕ ದರ್ಶನಕ್ಕೆ ಇಡಲಾಗುತ್ತದೆ. ಸಂಜೆ 4 ಗಂಟೆಗೆ ನೆಲಮಂಗಲ ಬಳಿಕ ಮಾಕಳಿ ಜೆ.ಪಿ.ಡಿಸ್ಟ್ರಿಲರಿಸ್‌ ಪ್ರೈ.ಲಿ.ಆವರಣದಲ್ಲಿ ಅಂತ್ಯಕ್ರಿಯೆ ನಡೆಯಲಿದೆ ಎಂದು ಕುಟುಂಬ ವರ್ಗ ತಿಳಿಸಿದೆ.