ಕನ್ನಡ ಭಾಷಾಭಿವೃದ್ಧಿ ಸ್ಟಾರ್ಟ್‌ಅಪ್‌ಗೆ ಆದ್ಯತೆ

Team Udayavani, Aug 6, 2017, 11:48 AM IST

ಬೆಂಗಳೂರು: ಕನ್ನಡ ಭಾಷೆ ಅಭಿವೃದ್ಧಿ ಪಡಿಸುವ ಸ್ಟಾರ್ಟ್‌ಅಪ್‌ಗ್ಳಿಗೆ ಆದ್ಯತೆ ನೀಡಲಾಗುವುದು ಎಂದು ವಿಜ್ಞಾನ ಹಾಗೂ ತಂತ್ರಜ್ಞಾನ ಸಚಿವ ಪ್ರಿಯಾಂಕ್‌ ಖರ್ಗೆ ಹೇಳಿದ್ದಾರೆ.  ಮಾಹಿತಿ ತಂತ್ರಜ್ಞಾನ ಇಲಾಖೆ ಹೊಸದಾಗಿ ಕೈಗೆತ್ತಿಕೊಂಡಿರುವ ಎಲಿವೇಟ್‌100 ಯೋಜನೆಯಲ್ಲಿ ಸ್ಟಾರ್ಟ್‌ಅಪ್‌ ಕಂಪನಿಗಳ ಪಿಚ್ಚಿಂಗ್‌ ಕಾರ್ಯವನ್ನು ವೀಕ್ಷಣೆ ಮಾಡಿ ಉದಯವಾಣಿಯೊಂದಿಗೆ ಮಾತನಾಡಿದರು.

ಹೊಸ ತಂತ್ರಜ್ಞಾನದ ಮೂಲಕ ಕನ್ನಡ ಭಾಷೆ ಉಳಿಸಿ ಬೆಳೆಸುವ ಕಂಪನಿಗೆ ಆದ್ಯತೆ ನೀಡುವುದು ನಮ್ಮ ಕರ್ತವ್ಯ, ಅಂತಹ ಸ್ಟಾರ್ಟ್‌ಅಪ್‌ಗ್ಳು ಬಂದರೆ ಹೆಚ್ಚಿನ ಪ್ರೋತ್ಸಾಹ ನೀಡುವುದಾಗಿ ತಿಳಿಸಿದರು. ಈಗಾಗಲೇ ಕನ್ನಡ ಭಾಷೆ ಬಳಕೆಯ ಅನೇಕ ಸಾಪ್ಟ್ವೇರ್‌ಗಳನ್ನು ಅಭಿವೃದ್ಧಿ ಪಡಿಸಲಾಗಿದೆ. ಯುನಿಕ್‌ ಆಗಿ ಎಲ್ಲರೂ ಬಳಸುವಂತಹ ಒಂದು ಕನ್ನಡ ಸಾಪ್ಟವೇರ್‌ ಬಳಕೆ ಮಾಡುವಂತ ಯಾವುದಾದರೂ ಆವಿಷ್ಕಾರ ಆದರೆ ಇನ್ನೂ ಅನುಕೂಲವಾಗಲಿದೆ ಎಂದರು. 

ಐಟಿ ಬಿಟಿ ಇಲಾಖೆ ಘೋಷಿಸಿರುವ ಎಲಿವೇಟ್‌ 100 ಕಾರ್ಯಕ್ರಮಕ್ಕೆ ರಾಜ್ಯಾದ್ಯಂತ ಉತ್ತಮ ಪ್ರತಿಕ್ರಿಯೆ ದೊರೆತಿದೆ. ಇದರಿಂದ ರಾಜ್ಯದಲ್ಲಿ ಐಟಿ ಕ್ಷೇತ್ರದಲ್ಲಿ ಸಾಕಷ್ಟು ಹೊಸ ಆವಿಷ್ಕಾರಗಳು ನಡೆಯುತ್ತಿರುವುದನ್ನು ಸೂಚಿಸುತ್ತದೆ. ಐಟಿ ಕ್ಷೇತ್ರ ಎಂದರೆ ಕೇವಲ ಬೆಂಗಳೂರು ಎಂದು ಎಲ್ಲರೂ ಭಾವಿಸಿಕೊಳ್ಳುತ್ತಾರೆ. ನಾವು ಮೈಸೂರು, ಕಲಬುರಗಿ, ಮಂಗಳೂರು ಹಾಗೂ ಹುಬ್ಬಳ್ಳಿಯಲ್ಲಿಯೂ ಸ್ಟಾರ್ಟ್‌ಅಪ್‌ಗ್ಳಿಗೆ ಆದ್ಯತೆ ನೀಡಿದ್ದೇವೆ.

ಇದರ ಪರಿಣಾಮ 450 ನವೋದ್ಯಮಗಳು ಗ್ರಾಮೀಣ ಪ್ರದೇಶದಿಂದ ನೋಂದಣಿ ಮಾಡಿಕೊಂಡಿವೆ. ಆವಿಷ್ಕಾರ ಹೊಸ ಯೋಚನೆ ಯಾವುದೇ ಮೂಲೆಯಿಂದ ಬಂದರೂ ಸರ್ಕಾರ ಅದಕ್ಕೆ ಆದ್ಯತೆ ನೀಡುತ್ತದೆ. ಎಲಿವೇಟ್‌ 100 ಕಾರ್ಯಕ್ರಮಕ್ಕೆ ಸ್ಪೇಸ್‌ ತಂತ್ರಜ್ಞಾನದಿಂದ ಹಿಡಿದು, ಕೃಷಿ, ಆರೋಗ್ಯ ರಕ್ಷಣೆ, ಸಂಗೀತದಲ್ಲಿ ತಂತ್ರಜ್ಞಾನ ಬಳಕೆ, ಅನೇಕ ಬಗೆಯಲ್ಲಿ ಹೊಸ ಆವಿಷ್ಕಾರಗಳು ಸ್ಟಾರ್ಟ್‌ಅಪ್‌ ಮೂಲಕ ಬೆಳಕಿಗೆ ಬಂದಿವೆ.

ಅವುಗಳಲ್ಲಿ ಅತ್ಯುತ್ತಮ 100 ನವೋದ್ಯಮಗಳನ್ನು ಗುರುತಿಸಿ ಸರ್ಕಾರ ಅವರಿಗೆ ಪ್ರೋತ್ಸಾಹ ನೀಡುತ್ತದೆ. ಉಳಿದ ನವೋದ್ಯಮಗಳ ತಂತ್ರಜ್ಞಾನ ಮತ್ತು ಆವಿಷ್ಕಾರ ಕಂಡು ಅವರಿಗೆ ಪ್ರೋತ್ಸಾಹ ನೀಡಲು 75 ಕ್ಕೂ ಹೆಚ್ಚು ಕಂಪನಿಗಳು ಮುಂದೆ ಬಂದಿವೆ. ಖಾಸಗಿ ಐಟಿ ಕಂಪನಿಗಳೂ ಕೂಡ ಸರ್ಕಾರದ ಈ ಯೋಜನೆ ಜೊತೆಗೆ ಕೆಲಸ ಮಾಡಲು ಮುಂದೆ ಬಂದಿವೆ. 

ಮಹಿಳಾ ನವೋದ್ಯಮಕ್ಕೆ ಪ್ರೋತ್ಸಾಹ: ಎಲಿವೇಟ್‌ 100 ಯೋಜನೆಯಲ್ಲಿ ಮಹಿಳಾ ನವೋದ್ಯಮಕ್ಕೆ ವಿಶೇಷ ಪ್ರಾಧಾನ್ಯತೆ ನೀಡಲಾಗಿದೆ. 350 ಮಹಿಳಾ ನವೋದ್ಯಮಿಗಳು ತಮ್ಮ ತಂತ್ರಜ್ಞಾನದ ಪ್ರದರ್ಶನಕ್ಕೆ ಅರ್ಜಿ ಹಾಕಿದ್ದಾರೆ. ಅವರಿಗಾಗಿಯೇ 10 ಕೋಟಿ ರೂ. ಮೀಸಲಿಡಲಾಗಿದೆ. 

ಈಗ ಮೊದಲ ಹಂತದ ಆಯ್ಕೆ ಪ್ರಕ್ರಿಯೆಯಲ್ಲಿ 700 ನವೋದ್ಯಮಗಳನ್ನು ಆಯ್ಕೆ ಮಾಡಿ, ಎರಡನೇ ಹಂತದ ಆಯ್ಕೆ ಪ್ರಕ್ರಿಯೆ ನಡೆಯುತ್ತಿದೆ. ಅವುಗಳಲ್ಲಿ ಉತ್ತಮವಾದ 250 ಸ್ಟಾರ್ಟ್‌ಅಪ್‌ಗ್ಳನ್ನು ಆಯ್ಕೆ ಮಾಡಿ ಅಂತಿಮವಾಗಿ ಆಗಸ್ಟ್‌ 29 ಮತ್ತು 30 ರಂದು ಅತ್ಯುತ್ತಮ 100 ಸ್ಟಾರ್ಟ್‌ಅಪ್‌ಗ್ಳನ್ನು ಆಯ್ಕೆ ಮಾಡಿ, ಸರ್ಕಾರದಿಂದ ಪ್ರೋತ್ಸಾಹ ಧನ ನೀಡಲಾಗುವುದು ಎಂದು ಪ್ರಿಯಾಂಕ್‌ ಖರ್ಗೆ ಹೇಳಿದರು.