ಕೇರಳ ಬಂದ್‌; ಕೆಎಸ್‌ಆರ್‌ಟಿಸಿಗೆ 10 ಲಕ್ಷ ರೂ.ನಷ್ಟ

Team Udayavani, Jan 4, 2019, 12:50 AM IST

ಬೆಂಗಳೂರು: ಕೇರಳ ಬಂದ್‌ ಪರಿಣಾಮ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮ (ಕೆಎಸ್‌ಆರ್‌ಟಿಸಿ)ದ ಮೇಲೂ ಆಗಿದ್ದು, ಗುರುವಾರ ಸುಮಾರು 10.16 ಲಕ್ಷ ರೂ. ನಷ್ಟ ಆಗಿದೆ.

ಪ್ರತಿದಿನ ಬೆಂಗಳೂರು ಸೇರಿದಂತೆ ಕೆಎಸ್‌ಆರ್‌ಟಿಸಿ ವ್ಯಾಪ್ತಿಯ ವಿವಿಧ ವಿಭಾಗಗಳಿಂದ ಸುಮಾರು 180 ಬಸ್‌ಗಳು ಕರ್ನಾಟಕ-ಕೇರಳ ನಡುವೆ 230 ಟ್ರಿಪ್‌ಗ್ಳು ಕಾರ್ಯಾಚರಣೆ ಮಾಡುತ್ತವೆ. 9,200 ಜನ ಸಂಚರಿಸುತ್ತಾರೆ. ಆದರೆ, ಕೇರಳ ಬಂದ್‌ ಹಿನ್ನೆಲೆಯಲ್ಲಿ 92 ಬಸ್‌ಗಳು ಸಂಚಾರ ಸ್ಥಗಿತಗೊಳಿಸಿದವು. ಇದರ ಪರಿಣಾಮ ನಿಗಮಕ್ಕೆ 10.16 ಲಕ್ಷ ರೂ. ಆದಾಯ ಖೋತಾ ಆಗಿದೆ ಎಂದು ಕೆಎಸ್‌ಆರ್‌ಟಿಸಿ ಅಂದಾಜು ಮಾಡಿದೆ.

ಬೆಳಿಗ್ಗೆ 6ರಿಂದ ಸಂಜೆ 6ರವರೆಗೆ ಮೈಸೂರು ಗ್ರಾಮಾಂತರ 12, ಮಂಡ್ಯ 1, ಚಾಮರಾಜನಗರ 9, ಹಾಸನ 1, ಚಿಕ್ಕಮಗಳೂರು 2, ಮಂಗಳೂರು 43, ಪುತ್ತೂರಿನಿಂದ 24 ಬಸ್‌ಗಳು ರದ್ದಾಗಿವೆ. ಇದರಿಂದ 29,120 ಕಿ.ಮೀ. ಸಂಚಾರ ರದ್ದಾಗಿದ್ದು, 10.16 ಲಕ್ಷ ಆದಾಯ ಇಳಿಕೆಯಾಗಿದೆ. ಮಂಗಳೂರು ಮತ್ತು ಪುತ್ತೂರು ವಿಭಾಗದಲ್ಲೇ ಏಳೂವರೆ ಲಕ್ಷ ರೂ. ನಷ್ಟವಾಗಿದೆ ಎಂದು ನಿಗಮದ ಪ್ರಕಟಣೆ ತಿಳಿಸಿದೆ.

ಗುರುವಾರ ರಾತ್ರಿಯಿಂದ ಬಸ್‌ಗಳ ಕಾರ್ಯಾಚರಣೆ ಪುನರಾರಂಭಗೊಂಡಿದ್ದು, ರಾತ್ರಿ 11ರವರೆಗೆ ಸುಮಾರು 90 ಬಸ್‌ಗಳು ಕೇರಳಕ್ಕೆ ತೆರಳಿವೆ ಎಂದೂ ನಿಗಮದ ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.