Lalbagh Flower Show: ಲಾಲ್‌ಬಾಗ್‌ನಲ್ಲಿ ಇಂದಿನಿಂದ 11 ದಿನ ಫ‌ಲಪುಷ್ಪ ಮೇಳ

Team Udayavani, Jan 16, 2025, 11:56 AM IST

ಬೆಂಗಳೂರು: ರಾಮಾಯಣ ಮಹಾಕಾವ್ಯ ರಚನೆ ಮಾಡಿದ ವಾಲ್ಮೀಕಿ ಮಹರ್ಷಿಯ ಜೀವನ, ರಾಮನ ಪಟ್ಟಾಭಿಷೇಕದ ಸಮಯದಲ್ಲಿ ವಾಲ್ಮೀಕಿ, ಪುಷ್ಪ ಪಿರಾಮಿಡ್‌, ಜಟಾಯು, ಪಂಚವಟಿ ಜತೆಗೆ ಪಂಪ, ಕುವೆಂಪು, ನಾಗಚಂದ್ರರನ್ನು ಒಟ್ಟಿಗೆ ನೋಡಬೇಕೆಂದಿದ್ದರೆ ಈ ಬಾರಿಯ ಲಾಲ್‌ಬಾಗ್‌ ಫ‌ಲಪುಷ್ಪ ಪ್ರದರ್ಶನವು ಸೂಕ್ತವಾಗಿದೆ.

ಹೌದು, ಈ ಬಾರಿ ಗಣರಾಜ್ಯೋತ್ಸವದ ಪ್ರಯುಕ್ತ ತೋಟಗಾರಿಕೆ ಇಲಾಖೆಯಿಂದ ನಗರದ ಲಾಲ್‌ಬಾಗ್‌ನಲ್ಲಿ ಜ.16ರಿಂದ 27ರವರೆಗೆ “ಆದಿಕವಿ ಮಹರ್ಷಿ ವಾಲ್ಮೀಕಿ’ ವಿಷಯಾಧಾರಿತ 217ನೇ ಫಲಪುಷ್ಪ ಪ್ರದರ್ಶನ ಆಯೋಜಿಸಲಾಗಿದ್ದು, ಒಟ್ಟು 11 ದಿನಗಳ ಕಾಲ ನಡೆಯಲಿದೆ.

ಉದ್ಘಾಟನೆ: ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಗುರು ವಾ ರ ಬೆಳಗ್ಗೆ 10ಕ್ಕೆ ಲಾಲ್‌ಬಾಗ್‌ನ ಗಾಜಿನ ಮನೆ ಯಲ್ಲಿ ಫ‌ಲಪುಷ್ಪ ಪ್ರದರ್ಶನವನ್ನು ಉದ್ಘಾಟಿಸಲಿದ್ದಾರೆ. ಈ ವೇಳೆ ಉಪಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್‌, ತೋಟಗಾರಿಕಾ ಸಚಿವ ಎಸ್‌.ಎಸ್‌.ಮಲ್ಲಿಕಾರ್ಜುನ್‌, ಸಾರಿಗೆ ಸಚಿವ ರಾಮಲಿಂಗಾರೆಡ್ಡಿ ಭಾಗಿಯಾಗಲಿದ್ದಾರೆ.

ತರಕಾರಿ ಕೆತ್ತನೆ‌ ಪ್ರದರ್ಶನ: ಜ.18ರಂದು ಇಕೆಬಾನ, ತರಕಾರಿ ಕೆತ್ತನೆ, ಪುಪ್ಪಭಾರತಿ, ಬೋನ್ಸಾಯ್‌, ಡಚ್‌ ಹೂವಿನ ಜೋಡಣೆ, ಥಾಯ್‌ ಆರ್ಟ್ಸ್, ಜಾನೂರು ಮತ್ತು ಪೂರಕ ಕಲೆಗಳ ಪ್ರದರ್ಶನವನ್ನು ನಟಿ ಪ್ರೇಮಾ ಉದ್ಘಾಟಿಸಲಿದ್ದಾರೆ.

ಜ.24ರಂದು ಲಾಲ್‌ಬಾಗ್‌ನ ಡಾ.ಎಂ.ಎಚ್‌. ಮರಿಗೌಡ ಸ್ಮಾರಕ ಭವನದಲ್ಲಿ ಫ‌ಲಪುಷ್ಪ ಪ್ರದರ್ಶನದ ಪ್ರಯುಕ್ತ ಹಮ್ಮಿಕೊಳ್ಳಲಾದ ವಿವಿಧ ಕಾರ್ಯಕ್ರಮಗಳ ಬಹುಮಾನ ವಿತರಣೆ ನಡೆಯಲಿದೆ. ಈ ಕಾರ್ಯ ಕ್ರಮದಲ್ಲಿ ಚಿಕ್ಕಪೇಟೆ ಶಾಸಕ ಉದಯ್‌ ಬಿ.ಗರುಡಾ ಚಾರ್‌, ತೋಟಗಾರಿಕೆ ಮತ್ತು ರೇಷ್ಮೆ ಇಲಾಖೆಯ ಕಾರ್ಯದರ್ಶಿ ಡಾ.ಶಾಮ್ಲಾ ಇಕ್ಬಾಲ್‌ ಸೇರಿದಂತೆ ಹಲವರು ಭಾಗಿಯಾಗಲಿದ್ದಾರೆ.

ಈ ಬಾರಿಯ ಆಕರ್ಷಣೆಗಳಿವು: ಗಾಜಿನ ಮನೆಯ ಪ್ರದೇಶದಲ್ಲಿ ಇಂಡೋ -ಅಮೆರಿಕನ್‌ ಹೈಬ್ರಿಡ್‌ ಸೀಡ್ಸ್‌ ಕಂಪನಿಯಿಂದ ಮಹರ್ಷಿ ವಾಲ್ಮೀಕಿ ಅವರ ಪುತ್ಥಳಿ ನಿರ್ಮಿಸಲಾಗಿದೆ. ಇದಕ್ಕಾಗಿ ಎಕ್ಸಾಟಿಕ್‌ ಆರ್ಕಿಡ್ಸ್‌ ಗಳಾದ ಪೆಲನಾಪ್ಸಿಸ್‌, ಡೆಂಡೊಬಿಯಂ, ವಾಂಡಾ, ಮೊಕಾರಾ, ಕ್ಯಾಟ್ನಿಲಿಯಾ, ಅನ್ಸಿಡಿಯಂ ಸೇರಿದಂತೆ ವೈವಿಧ್ಯಮಯ ಜಿರೇನಿಯಂಗಳು, ಫೋಲಿಯೇಜ್‌ ಗಿಡಗಳನ್ನು ಬಳಸಲಾಗಿದೆ.

ವಾಲ್ಮೀಕಿ ಹುತ್ತಕ್ಕೆ 3 ಲಕ್ಷ ಗುಲಾಬಿ ಬಳಕೆ: ಗಾಜಿನ ಮನೆಯ ಕೇಂದ್ರ ಭಾಗದಲ್ಲಿ ಬೃಹತ್‌ ಹುತ್ತವನ್ನು ನಿರ್ಮಿಸಲಾಗಿದ್ದು, ಇದಕ್ಕಾಗಿ ಒಂದು ಬಾರಿಗೆ 1.5 ಲಕ್ಷ ಡಚ್‌ ಗುಲಾಬಿ, 400 ಕೆ.ಜಿ. ಪಿಂಚ್ಡ್ ಗುಲಾಬಿ ಹಾಗೂ 300 ಕೆ.ಜಿ. ಹೈದರಾಬಾದ್‌ ಸೇವಂತಿಗೆಯನ್ನು ಬಳಸಲಾಗಿದೆ. ಎರಡನೇ ಬಾರಿಗೆ 3 ಲಕ್ಷ ಡಚ್‌ ಗುಲಾಬಿ, 800 ಕೆ.ಜಿ. ಪಿಂಚ್‌x ಗುಲಾಬಿ ಹಾಗೂ 600  ಕೆ. ಜಿ.ಹೈದರಾಬಾದ್‌ ಸೇವಂತಿಗೆಯನ್ನು ಬಳಸಲಾಗಿದೆ. ಈ ಹುತ್ತವು 10 ಅಡಿ ಎತ್ತರ ಹಾಗೂ 38 ಅಡಿ ಸುತ್ತಳತೆಯನ್ನು ಹೊಂದಿದೆ.

ಇದರೊಂದಿಗೆ ಮಹರ್ಷಿ ವಾಲ್ಮೀಕಿಯ 6 ಅಡಿ ಎತ್ತ ರದ ಕಾವ್ಯ ರಚನೆಯಲ್ಲಿ ನಿರತರಾಗಿರುವ ಪ್ರತಿಮೆ, ಮಹರ್ಷಿ ವಾಲ್ಮೀಕಿ ಅವರ ಆಶ್ರಮದ ಪುಷ್ಪ ಮಾದರಿ ಮತ್ತು ರಾಮಾಯಣ ರಚನೆಗೆ ಮೂಲ ಕಾರಣವಾಗಿ ರುವ ಸನ್ನಿವೇಶದ ಪ್ರದರ್ಶನ, ರಾಮಾಯಣದ ನಂತ ರದ ಕವಿಗಳ ಕಲಾಕೃತಿ, ವರ್ಟಿಕಲ್‌ ಗಾರ್ಡನ್‌ ಮಾದ ರಿಯ ರಾಮಾಯಣ ಕಲಾಕೃತಿಗಳು, ಹನುಮ-ಜಾಂಬ ವಂತ-ಜಟಾಯು -ಅಳಿಲು ಕಲಾಕೃತಿ, ಹತ್ತು ಆಕರ್ಷಕ  ಪಿರಾಮಿಡ್‌ಗಳು ಹಾಗೂ ರಾಮಾಯಣ ಪಾತ್ರಧಾರಿಗಳ ಚಿತ್ರವನ್ನು ನಿರ್ಮಿಸಲಾಗಿದೆ.

3ಡಿ ಕಲಾಕೃತಿ ರಚನೆ: ರಾಮಾಯಣದಲ್ಲಿ ಬರುವ ಪಂಚವಟಿ, ರಾಮನ ಎಲೆ ಮನೆಯನ್ನು ಸಾಂಕೇತಿಕ ವಾಗಿ ಬಿಂಬಿಸುವ 3ಡಿ ಕಲಾಕೃತಿಯನ್ನು ಪ್ರದರ್ಶಿಸಲಾಗುತ್ತದೆ. ಇದರೊಂದಿಗೆ ಪಾತ್ರಧಾರಿಗಳ ಹಾಗೂ ಸನ್ನಿವೇಶದ ಬಗ್ಗೆ ಮಾಹಿತಿಯೂ ಇರಲಿದೆ.

ಕುಡಿಯುವ ನೀರು, ಶೌಚಾಲಯ ವ್ಯವಸ್ಥೆ: ಲಾಲ್‌ಬಾಗ್‌ ಸಸ್ಯತೋಟದಲ್ಲಿ ಪ್ರಸ್ತುತ 10 ಕುಡಿಯುವ ನೀರಿನ ಘಟಕಗಳಿದ್ದು, ಪ್ರದರ್ಶನದ ಅವಧಿಯಲ್ಲಿ ಹೆಚ್ಚುವರಿಯಾಗಿ ಆಯ್ದ 10 ಸ್ಥಳಗಳಲ್ಲಿ ಮಿನರಲ್‌ ವಾಟರ್‌ ಕುಡಿಯುವ ನೀರಿನ ವ್ಯವಸ್ಥೆಯನ್ನು ಕಲ್ಪಿಸಲಾ ಗಿದೆ. ಹಾಗೆಯೇ ಸಸ್ಯತೋಟದ ವ್ಯಾಪ್ತಿಯಲ್ಲಿ ಒಟ್ಟಾರೆ ಏಳು ಶೌಚಾಲಯಗಳಿದ್ದು, ಪ್ರದರ್ಶನದ ಅವಧಿಯಲ್ಲಿ ಹೆಚ್ಚುವರಿಯಾಗಿ 5 ಆಯ್ದ ಸ್ಥಳಗಳಲ್ಲಿ ಸಂಚಾರಿ ಶೌಚಾಲಯಗಳ ವ್ಯವಸ್ಥೆಯನ್ನು ಕಲ್ಪಿಸಲಾಗಿದೆ.

ಭದ್ರತೆ, ರಕ್ಷಣೆಗೆ ವಿಶೇಷ ಒತ್ತು: ಲಾಲ್‌ಬಾಗ್‌ನ ಎಲ್ಲಾ ದ್ವಾರಗಳಲ್ಲಿಯೂ ವಿಶೇಷ ತಪಾಸಣೆ, ಭದ್ರತೆಗಾಗಿ ಒಟ್ಟು 136 ಸಿಸಿ ಕ್ಯಾಮೆರಾ ಅಳವಡಿಕೆ, ಎಲ್ಲಾ ಪ್ರವೇಶ ದ್ವಾರದಲ್ಲಿಯೂ ಆ್ಯಂಬುಲೆನ್ಸ್‌ ಸೇವೆ, ಆಯ್ದ ಸ್ಥಳಗಳಲ್ಲಿ ಎತ್ತರದ ಟವರ್‌ ನಿಂದ ಪೊಲೀಸ್‌ ಕಣ್ಗಾವಲು, 38 ಪ್ರಥಮ ಚಿಕಿತ್ಸಾ ಪಟ್ಟಿಗೆ ಅಳವಡಿಸಲಾಗಿದೆ.

ವಾಹನ ನಿಲುಗಡೆಗೆ ವ್ಯವಸ್ಥೆ

ಫ‌ಲಪುಷ್ಪ ಪ್ರದರ್ಶನಕ್ಕೆ ಸ್ವಂತ ವಾಹನದ ಮೂಲಕ ಆಗಮಿಸುವವರಿಗೆ ಜೋಡಿ ರಸ್ತೆಯ ಶಾಂತಿ ನಗರದ ಬಸ್‌ ನಿಲ್ದಾಣದ ಬಳಿ ಇರುವ ಬಹುಮಹಡಿಯಲ್ಲಿ ವಾಹನ ನಿಲುಗಡೆ, ಹಾಪ್‌ಕಾಮ್ಸ್‌ ಆವರಣ, ಜೆಸಿ ರಸ್ತೆಯಲ್ಲಿನ ಬಿಎಂಪಿ ಬಹುಮಹಡಿ ವಾಹನ ನಿಲುಗಡೆ, ದ್ವಿಚಕ್ರವಾಹನಗಳನ್ನು ಲಾಲ್‌ಬಾಗ್‌ ಮುಖ್ಯದ್ವಾರದ ಬಳಿಯ ಅಲ್‌ ಅಮೀನ್‌ ಕಾಲೇಜು ಆವರಣದಲ್ಲಿ ವ್ಯವಸ್ಥೆ ಕಲ್ಪಿಸಿಕೊಡಲಾಗಿದೆ.

ಪುಷ್ಪ ಪ್ರದರ್ಶನಕ್ಕೆ  2.75 ಕೋಟಿ ವೆಚ್ಚ:

ಫ‌ಲಪುಷ್ಪ ಪ್ರದರ್ಶನ ಕುರಿತು ಲಾಲ್‌ಬಾಗ್‌ನ ಮಾಹಿತಿ ಕೇಂದ್ರದಲ್ಲಿ ಬುಧವಾರ ಆಯೋಜಿಸಿದ್ದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಇಲಾಖೆ ನಿರ್ದೇಶಕ ಡಿ.ಎಸ್‌. ರಮೇಶ್‌, ಈ ಬಾರಿ ಪ್ರದರ್ಶನವು 2.75 ಕೋಟಿ ರೂ.ವೆಚ್ಚದಲ್ಲಿ ನಡೆಯುತ್ತಿದ್ದು, 9.50 ರಿಂದ 10 ಲಕ್ಷಕ್ಕೂ ಅಧಿಕ ಮಂದಿ ಭಾಗವಹಿಸುವ ನಿರೀಕ್ಷೆಯಿದೆ ಎಂದು ಮಾಹಿತಿ ನೀಡಿದರು.

ಆನ್‌ಲೈನ್‌ನಲ್ಲೂ ಟಿಕೆಟ್‌ ಪಡೆಯಿರಿ:

ಮುಂಗಡ ಆನ್‌ಲೈನ್‌ ಟಿಕೆಟ್‌ ಬುಕಿಂಗ್‌ ಸೌಲಭ್ಯ ಲಭ್ಯವಿದ್ದು, ಟಿಕೆಟ್‌ ಕಾಯ್ದಿರಿಸಲು https://hasiru.karnataka.gov.in/fl owershow/login.aspx ವೆಬ್‌ ಸೈಟ್‌ಗೆ ಭೇಟಿ ನೀಡಬಹುದು. ಸಾಮಾನ್ಯ ದಿನಗಳಲ್ಲಿ ವಯಸ್ಕರಿಗೆ ತಲಾ 80ರೂ. ಹಾಗೂ ರಜಾದಿನಗಳಲ್ಲಿ 100 ರೂ.ಇರಲಿದೆ. ಮಕ್ಕಳಿಗೆ (12 ವರ್ಷದೊಳಗಿನ) ಎಲ್ಲಾ ದಿನಗಳಲ್ಲಿ 30 ರೂ. ಹಾಗೂ ಶಾಲಾ ಸಮವಸ್ತ್ರ ಧರಿಸಿ ಬರುವ 10ನೇ ತರಗತಿ ವರೆಗಿನ ಎಲ್ಲಾ ವಿದ್ಯಾರ್ಥಿಗಳಿಗೆ ಉಚಿತ ಪ್ರವೇಶ ಇರಲಿದೆ.

ಸಂಚಾರ ದಟ್ಟಣೆ ತಪ್ಪಿಸಲು ಮೆಟ್ರೋ ಬಳಸಿ:

ಸಂಚಾರ ದಟ್ಟಣೆಯನ್ನು ತಪ್ಪಿಸುವ ಉದ್ದೇಶದಿಂದ ಲಾಲ್‌ಬಾಗ್‌ ವೆಸ್ಟ್‌ಗೇಟ್‌ಗೆ ಹೊಂದಿಕೊಂಡಂತೆ ಲಾಲ್‌ ಬಾಗ್‌ ಮೆಟ್ರೋ ನಿಲ್ದಾಣ ಇರುವುದರಿಂದ ಸಾರ್ವಜನಿಕರಿಗೆ ಮೆಟ್ರೋ ರೈಲು ಬಳಕೆಗೆ ಮನವಿ ಮಾಡಲಾಗಿದೆ. ವೀಕ್ಷಕರ ಅನುಕೂಲಕ್ಕಾಗಿ ಈ ಸಮಯದಲ್ಲಿ ಹೆಚ್ಚುವರಿ ಮೆಟ್ರೋ ಸಂಚಾರವೂ ಇರಲಿದೆ.

ಸಾರ್ವಜನಿಕರು ಫ‌ಲಪುಷ್ಪ ಪ್ರದರ್ಶನ ವೇಳೆ ಹೆಚ್ಚಿನ ಸ್ವತ್ಛತೆಯನ್ನು ಕಾಪಾಡಬೇಕು. ಎಚ್‌ಎಂಪಿವಿ ವೈರಸ್‌ ಸೊಂಕಿನ ಹಿನ್ನೆಲೆಯಲ್ಲಿ ಬೇಕಾ ಬಿ ಟ್ಟಿ ಕಸ ಎಸೆಯುವುದು, ಉಗುಳುವುದನ್ನು ಮಾಡಬಾರದು. ಲಾಲ್‌ಬಾಗ್‌ನ ಒಳಭಾಗದಲ್ಲಿ ಪ್ಲಾಸ್ಟಿಕ್‌ ಬಳಸಬಾರದು.-ಡಿ.ಎಸ್‌. ರಮೇಶ್‌, ತೋಟಗಾರಿಕೆ ಇಲಾಖೆಯ ನಿರ್ದೇಶಕ